[INFORMAZION]

L’Ufici pastorâl pe famee de Glesie udinese al à rinovât il so lûc internet, dentri vie dal sît de Diocese di Udin. La direzion e je www.diocesiudine.it, dulà che si pues cricâ l’acès “famiglia”, a man drete dal calcoladôr.

[MOSTRIS]

Carlo Innocenti, fintremai ai 5 di Novembar, al presente a Udin la mostre “Appunti fotografici su personaggi della cultura e della storia del Friuli”. L’Art gallery “Laboratorio 2 International” di strade Giusti e vierç ogni dì di 11 a 13 e di 18 a 20. «Innocenti ha uno strumento potente per raccontare in un attimo la vita dei 24 friulani che ha scelto di fotografare – al scrîf Antonio Giusa, te presentazion de rassegne fotografiche –. Non si serve più di tanto degli artifici della tecnica, ma del suo occhio, che porta in sé la cultura secolare del fotografo che interpreta i sentimenti di chi si fa ritrarre, per avvicinarci alla sua anima».

[CINE]

E comence la V edizion di “Gli occhi dell’Africa”, la rassegne pordenonese di cine african par cure de “Caritas” (www.caritaspordenone.it). La scree e je stabilide joibe ai 3 di Novembar, li di “Cinemazero” a 20.45, cuant che si tacarà cu la proiezion dal film “Un homme qui crie” di Mahamat-Saleh Haroun, presint il missionari combonian pre’ Alex Zanotelli. La rassegne e larà indevant fintremai ai 7 di Decembar, compagnade ancje de mostre fotografiche su lis feminis tal mont rurâl african di Francesco Laera (li de galarie “Zeroimage”). www.cinemazero.org

[GLESIE FURLANE]

Joibe ai 3 di Novembar, l’Ufici pastorâl pe famee de Glesie udinese al invide a Udin il diretôr dal Ufici talian, pre’ Paolo Gentili, par un confront su la cuistion: “La famiglia interroga la comunità cristiana: prospettive e risorse”. La convigne e tacarà a 18, li dal Centri culturâl “Paulin di Aquilee” (tal borc di Trep al numar 5).

[CULTURE]

La clape culturâl “Giorgio Ferigo”, ch’e intint di puartâ indevant l’impegn dal inteletuâl di Comeliàns (www.friul.net/dizionario_biografico.php), e à rinovât il so diretîf. I components a son Annalisa Comuzzi, Fabrizio Ferigo, Gian Paolo Gri (sot president), Claudio Lorenzini (president), Elisa Miani, Claudio Pellizzari, Paolo Pischiutti, Norma Zamparo, Toni Zogno (secretari).

[LIBRIS]

“Centro Balducci” e “Movimento propositivo” a proponin un dibatiment su Gesù di Nazaret. I protagoniscj, joibe ai 3 di Novembar a Çuian li dal centri pal biel acet a 20.30, a saran pre’ Pierluigi Di Piazza e Paolo Flores d’Arcais, autôr dal libri “Gesù, l’invenzione del Dio cristiano”.

[AMBIENT]

Ors, lôfs e siacâi… a son i abitatôrs gnûfs dai boscs e des monts de Furlanie. La lôr presince e impliche une coabitazion ch’e je ancje une «disfide di civiltât». Cussì le batie il Museu furlan di storie naturâl che, intant de “Setemane dai mamifars”, al à inmaneât dôs convignis su “Il ritorno dei predatori”. Il secont apontament al cole joibe ai 3 di Novembar, a 18 li de sale “Ajace” dal municipi di Udin. A cjacararan Stefano Filacorda, Luca Lapini e Elisa Avanzinelli dal “Centro gestione grandi carnivori”.

[CONVIGNIS]

Il missionari pacifist, pre’ Alex Zanotelli, joibe ai 3 di Novembar, al interven a Vilegnove di Pordenon. La Glesie dal Crist e organize une convigne a 17, tai ambients di Case Rosse.

[SALÛT]

“Ocjo: la sicurezza un bene comune: costruiamola insieme”: al sarà chest il titul de serade inmaneade a Comeliàns, vinars ai 4 di Novembar, dal “Inail” regjonâl, cul jutori de Ass numar 3, de Associazion intercomunâl dal Cjanâl di Guart e de clape culturâl “Giorgio Ferigo”. L’apontament al tacarà a 18, li de sale “L’Alpina”. A intervegnaran Paolo Pischiutti e Bruzio Bisignano. Po al sarà presentât un spetacul di “cabaret” de companie “I Trigeminus”, cun leturis di Leonardo Zanier e musichis dal “Canzoniere di Aiello”.

[SALÛT]

Attilio Speciani e Claudio Petracco, vinars ai 4 di Novembar, a saran i protagoniscj de convigne “Mangiare bene per vivere bene”, inmaneade a 18.30 li de “Residenza Universitaria delle Grazie”, tal Borc di Praclûs 21 a Udin. Speciani al è diretôr di “Eurosalus” (www.eurosalus.com) e dal “Recaller Program” (www.recallerprogram.com). Petracco al è un “bio-cogo”, insegnant di cusine naturâl e vegetariane, ch’al propon gustâ tradizionâi e regjonâi.