[POLITICHE]

Vinars ai 2 di Setembar, il grop “No Tav” furlan al fâ une manifestazion devant de prefeture di Udin a 18. Il fin de manifestazion al è chel di protestâ cuintri de politiche dal ministeri dai afârs internis a rivuart des manifestazions “No Tav”.

[CONVIGNIS]

La “Bcc” di Starançan e di Vilès, in convigne cun “Istituto di Storia Sociale e Religiosa” di Guriz e Filologiche, e organize une convigne su “Luigi Faidutti (1861-1931) e il movimento cattolico nel Friuli austriaco. La Cassa Rurale di Staranzano”. Il confront, vinars ai 2 di Setembar, al tacarà a 20.30 li dal teatri “San Pio X” d Starnçan. Di chê strade, si podarà visitâ la mostre “Luigi Faidutti (1861-1931) e il movimento cattolico nel Friuli austriaco”, par cure di Ivan Portelli.

[MUSICHE]

Lis “Vacanze musicali a Sappada”, vinars ai 2 di Setembar, a presentin il “Requiem in do minore” di Luigi Cherubini. Al sarà eseguît a 21 li de glesie parochiâl di a Plodn/Sapade des corâls “Seghizzi” di Gurize, de Basiliche di Aquilee e “Lorenzo Perosi” di Flumisel, compagnadis dal pianist David Giovanni Leonardi e direzudis di Italo Montiglio.

[CINE]

Il proget “Mala apokalipsa”, par cure di Martina Humar e di Alvaro Petricig, al cjape part a “Invisible City”, rassegne inmaneade a Ruimte in Beweging, Schiedam (Olande). Tant che un “ditic”, a saran proietâts i documentaris “Sarce od hise” (1998) e “Starmi cajt. Il tempo ripido” (2003) di Alvaro Petricig. Proiezions ai 2 di Setembar di 19 a 23 e dai 3 ai 4 di Setembar di misdì a 18.

[AMBIENT]

Domenie ai 4 di Setembar, ad ôr dal Tiliment, un conciert al onore il flum dal Friûl e al marche la necessitât di protegilu dal proget di colegament autostradâl fra A28 e A23. L’apontament al tacarà a 15, te localitât Pontaibe, daprûf Pinçan. Si esibissaran a gratis, fin soresere, Carantan, Straulino, Fedele & Vescovo, “Bande Tzingare”, “Tarnoom”, “Renzo Stefanutti Ensemble”, il poet Maurizio Mattiuzza, DJ Tubet, “Orchestra Cortile”, Fabian Riz, “Nosisà”, “Mad Men Blues”, “Canzonîr di Dael”. A organizin comitât “Arca” e “Onde furlane”.

[MUSICHE]

La rassegne musicâl “Dulinvie”, domenie ai 4 di Setembar, e propon “Cantastorie”, un conciert cun Lino Straulino e Giovanna Marini. Lunis ai 5 di Setembar, e tire adilunc cu la serade “L’onoranda compagnia, una storia esemplare”. Di chê strade, al sarà proponût il documentari di Christiane Rorato “La rosade dal Timp”, dedicade ai cjantôrs di Çurçuvint. “Dulinvie” al è un proget di Valter Colle.

[MOSTRIS]

Ai 3 e ai 4 di Setembar, li dal vieri covent di San Jacum di Pulcinic, si podarà visitâ la mostre su lis formis di vite plui strasordenaris fra chês ch’a vivin te aghe. Mediant di cheste iniziative, ch’e jentre te sagre dai “Sest 2011”, si smire di popolarizâ il paradîs naturalistic dai contors di Cjanive, di Pulcinic e di Buduee, là ch’al cor la Livence.

[CONVIGNIS]

Pre’ Pierluigi Dipiazza e pre’ Mario Vatta, domenie ai 4 di Setembar, a son i protagoniscj di une conversazion su “Trovare rifugio, in senso alpinistico e non”, domenie ai 4 di Setembar, a 17.30 li dal ripâr “Julius Kugy”, daprûf Valbrune. Al organize “Assorifugi Nordest”.

[MOSTRIS]

Domenie ai 4 di Setembar, si scree a 19 li dal “Cerido” di Flumisel” une mostre dai artiscj di Gjenue Romy Barrile, Enzo Dente e Domenico Cova. Vie pal mês di Setembar, e restarà vierte ogni sabide vie pe gnot, viergint a 22 par sierâ a 10 de domenie.

[TEATRI]

Spetacui, laboratoris artistics, convignis e leturis a jemplin placis e stradis di Dartigne dilunc dai 4 di Setembar, di chê strade de manifestazion “Trallallero”, par cure de companie “Teatro al Quadrato”.