[POLITICHE]

Joibe ai 2 di Jugn, il comitât “2 Sì per l’acqua Bene comune” al organize la manifestazion “Pedaliamo per l’acqua bene comune”. L’apontament al è a 16.30 in Zardin grant, a Udin. La spassizade e passarà devant dai uficis dal “Cafc” (Consorzio acquedotto Friuli centrale) e de redazion udinese di “Rai Triest”, devant dal teatri di Udin, dulà che il prefet al organize un conciert pe fieste de Republiche taliane, e devant de “Casa dell’acqua” di Felet.

[MOSTRIS]

“Signori, si parte! Come viaggiavamo nella Mitteleuropa 1815-1915”: la mostre imbastide li di palaç Della Torre di strade Carducci 2, a Gurize, si podarà visitâle fintremai ai 24 di Lui. Vinars e sabide, orari 10-13 / 15-19; domenie e dîs di fieste, 10-19. Ogni domenie visite guidade a 17.30.

[CULTURE]

La viere strade de Val Celine, joibe ai 2 di Jugn, e torne a viergi. Si podarà percorile di Barcis ogni domenie di 10 a 18. Vie pal mês di Lui ancje la sabide e po, dai 25 di Lui ai 28 di Avost, ducj i dîs de setemane. L’orari al sarà indaûr ridusût tal mês di Setembar, cuant che si podarà viazâ dome domenie. Par cumò, il bocon di strade viert al sarà chel fra il puint Antoi e l’ingrès des grotis de viere dighe.

[MUSICHE]

Il dom di San Denêl, joibe ai 2 di Jugn, al vierç lis sôs puartis a 20.45 par cun conciert dal “Ruhrkohle-Chor” di Herne, te regjon todescje de Westfalia. La corâl dai muradôrs de Ruhr e proponarà musichis popolârs e classichis.

[MOSTRIS]

Dai 2 ai 25 di Jugn, il centri “Cerido” di Flumisel (tal borc di sant Antoni) al presente la mostre “Cerido Expo Giugno 2011” cun oparis des artistis pisanis Raffaella Maria Sateriale e Marcela Bracalenti. La scree e je stabilide a 18.30 di joibe ai 2 di Jugn. Oraris: sabide e domenie, di 17 a 20.

[MOSTRIS]

La mostre “Cavatappi - Gjavastrops: Tre secoli di ingegno, arte e design nelle collezioni internazionali e locali” e restarà imbastide li dal “Museo dell’arte fabbrile e delle coltellerie” insin ai 8 di Setemabr. Oraris: lunis, joibe, vinars, sabide e domenie, 9.30-12.30 / 15.30-18.30; martars e miercus, 9.30-12.30.

[SPORT]

Ducj i atletis ch’a àn finît 30 agns a podaran dâsi in note, fintremai ai 12 di Jugn, pe I edizion dai “European Masters Games” (www.facebook.com/EuropeanMastersGames.Lignano2011 - http://twitter.com/#!/Lignano2011EMG), programâts dai 10 ai 20 di Setembar a Sabbiadoro e in altris 17 paîs furlans.

[CONCORS]

Si varà di dâsi in note dentri dai 15 di Jugn par podê cjapâ part al concors “Corto a Muris”, il festival dl curts metraçs ch’al smire di valorizâ la produzion cinematografihe locâl. Lis voris, po, a varan di jessi prontis e consegnadis pai 18 di Avost.

[POLITICHE]

«E je une bataie di fonde, che il moviment pe aghe e il comitât referendari a puedin vinci ricorint ae propie ricjece plui preziose: la difusion teritoriâl e la capacitât di vê coinvolt in cheste vere e propie bataie di civiltât une fulugne di feminis e di oms ae lôr prime esperience di ativisim, costruint un grant anticuarp sociâl par une jessude de crisi alternative ae consegne de vite interie des personis aes leçs dal marcjât. Vierzint la strade parcè che la aghe e torni publiche, si vierç ancje chê de ridefinizion di un gnûf model di public, fondât su la partecipazion de int, o sei sociâl»: cussì, tal editoriâl dal numar dal mês di Jugn, il sfueut furlanist “Ladins dal Friûl” al presente l’apontament dai referendum cuintri de privatizazion da l’aghe. Pal zornâl, chel dai 12 e dai 13 di Jugn al sarà un apontament politic decisîf parcè che – al marche “Tarvos”, alias Renzo Balzan – «si scrîf aghe, ma si lei democrazie. E parcè che dome la partecipazion e je libertât!».

[CONVIGNIS]

Al rive a Faedis il confront su l’energie nucleâr. Vinars ai 3 di Jugn, a 20.30 li dal municipi, e je programade une convigne su “Il nucleare è l’energia del futuro o vi sono altre risorse da sfruttare?”. I reladôrs a saran: il sindic Cristiano Shaurli, il radioterapist Tino Ceschia, l’espert di radioprotezion Valerio Barbina e il president regjonâl dal “Wwf” Roberto Pizzutti. A fasaran di moderatôrs i miedis di famee di Faedis, Chiara Toffoletti, e di Paulêt, Alessandro Fornasier.