[DIASPORE]

L’“Alef” argjentin (www.alefargentina.com.ar) e il Circul furlan di Santa Maria (Brasîl - www.aism.com.br), a àn sielzût i zovins ch’a cjaparan part ai Cors di Bioetiche e “Valôrs identitari e imprenditorialitât” de Universitât furlane. De Argjentine, a rivaran in Friûl pal cors di Bioetiche María José Fernández Rivera e Erika Michelutti de la Universidad de Cuyo (Mendoza), Andrés Catalá dal Instituto Universitario Nacional Italiano Rosario (Santa Fe) e Florencia Anahí Fernández de la Universidad Adventista del Plata - Libertador San Martín (Entre Ríos). Come “Chairperson” al sarà presint il professôr Gustavo Irico de la Universidad de Córdoba. Dal Rio Grande do Sul a saran mandâts Sarah Rossi Arseno, Mariele Bevilaqua e Giullia Menuci Chianca al cors di Bioetiche. Pal cors sui valôrs identitaris, la clape furlane di Santa Maria e à sielzût Eduardo Kneipp Londero (Santa Maria), Gabriela Giacobe (Sobradinho), Roberta Rossi (Santa Maria) e Rubia Fernanda Lourenço Poletto (Porto Alegre).

[LIBRIS]

Il libri di Valerio Marchi “«L’orribile calunnia». Polemiche goriziane sull’omicidio rituale ebraico (1896, 1913)” (“Kappa Vu” 2010) al sarà studiât intant di un ’seminari li dal Dipartiment di storie de Facultât di Letaris de Universitât romane “Tor Vergata”. A la convigne, inmaneade lunis ai 2 di Mai a 11, in colaborazion cul Centro romano di studi sull’Ebraismo (“CeRSE”), a intervegnaran Anna Foa, Tommaso Caliò e Francesco Scorza Barcellona (coordenadôr). Al sarà presint ancje l’autôr.

[CINE]

In gracie dal 5x1000, chest an, si podarà prudelâ ancje la clape di San Denêl “Officine d’Autore”, ch’e je l’anime dal “Cinema Splendor” e po des rassegnis itinerantis “CircuitoCinema” e “MontagnaCinema”.

[CONVIGNIS]

Ai 3 di Mai, il fondatôr di “Solidarnosc”, Lech Walesa, ch’al à stât ancje il prin president de Polonie deliberade dal comunisim, al sarà a Pordenon par presentâ il so libri “Sulle ali della libertà. Fede e solidarietà: insieme fanno miracoli” (Libreria Editrice Vaticana). Walesa al cjacararà a 20.30 li dal teatri “Verdi”. Po il sindicalist polonês si fermarà tal Friûl ocidentâl fint ai 5 di Mai, par une schirie d’impegns inmaneâts dal circul “Eureka”.

[ECONOMIE]

Dai 3 ai 7 di Mai, la Federazion europeane de vacje rosse stelade e fâs il so XXIX congrès in Friûl. Lis voris a son programadis, a Udin, tal palaç de Regjon di strade Sabbadini.

[CONVIGNIS]

Il miedi Chiara Castellani, a vore in Nicarague dal 1983 al 1990 e po tal Congo, dulà ch’e gestìs un ospedâl de associazion taliane “Amici di Raoul Follereau”, martars ai 3 di Mai, e contarà la sô storie a San Denêl, cjacarant li dal auditorium “Alla Fratta” a 21.

[AMBIENT]

Monfalcon, Pordenon e Udin, cun altris citâts da l’Italie, a cjapin part a la manifestazion “Il Giretto d’Italia - I Campionato nazionale della ciclabilità urbana”, par cure di “Legambiente”, “Fiab” e “Cittàinbici”. La gare e larà indevant di 7.30 a 9.30, contant dute la int ch’a passaràn cu la biciclete pai ingrès segnalâts dai Cumons a l’organizazion.

[POLITICHE]

Al è saltât fûr a Parîs, par cure di Carlos Eduardo Pacheco Amaral e dal editôr “L’Harmattan”, il volum “Autonomie régionale et rélations internationales: Nouvelles dimensions de la gouvernance multilatérale”. L’opare e calcole la difusion des autonomiis regjonâls come un dai fats politics ch’a àn marcât di plui la seconde metât dal secul XX. Pacheco Amaral al lavore li dal Dipartiment di Storia, Filosofie e Siencis sociâls de Universidade dos Açores.

[POLITICHE]

Par cure dal “Forum sull’acqua pubblica”, fintremai ai 13 di Jugn, un chiosc cun banderis, volantins e informazions al sarà atîf te place principâl di Puart par incuintrâ la int e motivâ la reson dai sì a l’aghe “Ben comun” e cuintri dal nucleâr Par informazion: 3388310582.

[LIBRIS]

Miercus ai 4 di Mai, a 18 li di palaç Frisacco di Tumieç, il professôr Angelo Floramo al presente il libri di Jacopo Valvason di Maniago “Descrittione della Patria del Friuli”.