[LIBRIS]

La “Fondazione Villa Russiz” di Caprive, a 17.30 di sabide ai 2 di Avrîl te sô sede, e organize la presentazion dal “Vocabolario Italiano - Friulano Friulano - Italiano” di Gianni Nazzi, saltât fûr vie pal 2010, par cure di “Clape culturâl Acuilee” e di “Designgraf”. De opare dal lessicolic udinês (www.friul.net/dizionario_biografico.php) a cjacararan Mario Turello e Hans Kitzmüller. Al fasarà i onôrs di cjase il president de Fondazion Silvano Stefanutti.

[SALÛT]

Ancje la clape “Progetto autismo Fvg”, sabide ai 2 di Avrîl, e celebre la “Zornade mondiâl dal autisim”, ch’e je dedicade «a lis nestris fameis, ai nestris fruts e a lis “dibisugnis speciâls” di aprendiment e di vite cuotidiane ch’a àn». Di chê strade, “Progetto autismo” al propon il so premi ch’al promôf l’utilitât dal “video-modeling” come strategie par insegnâur abilitâts gnovis ai fruts malâts di autisim.

[AMBIENT]

Ai 2 e ai 4 di Avrîl, a Sacîl si fronte la cuistion de mobilitât sustignibil e de educazion stradâl. Si comence sabide ai 2 cuntune convigne, a 15.30 li di palaç Ragazzoni, dulà che si cjacararà de cuistion “Il ruolo educativo del progetto Pedibus per la nostra città”. Lunis ai 4, li dal teatri “Zancanaro” a 18, Leonardo Indiveri al presentarà la lezion-spetacul par grancj e piçui “Katedromos Kids”.

[AMBIENT]

La “Consulta di bacino del fiume Ledra”, sabide ai 2 di Avrîl, e presente a Dartigne lis ativitâts fatis vie pal 2010. Daspò des jentradis, a 9.30 li dal municipi, a saran proponudis lis relazions di Federica Lippi e di Daniela Iervolino (”Il piano di tutela delle acque in Friuli-V. G. e i corpi idrici superficiali nel bacino del fiume Ledra”) e di Claudia Orlandi (“La qualità delle acque superficiali del bacino del fiume Ledra nella Direttiva 2000/60/Ce: obiettivi, metodi e primi risultati”. Dentri te Consulte, a son i Cumons di Buje di Dartigne, di Glemone, di Majan, di Magnan, di Montenârs, di Osôf e di San Denêl.

[CINE]

Te suage des celebrazions pai 3 di Avrîl, “Fieste de Patrie dal Friûl”, sabide ai 2 di Avrîl si proiete a Majan il film “Nûfcent - Videosclesis dal Friûl”. A 20.45, li dal Auditorium comunâl.

[CONVIGNIS]

Sabide ai 2 di Avrîl, a 18.30 li dal Polifunzionâl di Colorêt di Prât, la Pro loco e celebre la fieste dai 3 di Avrîl, cuntune convigne di Massimo Lavarone de Societât furlane di archeologie su la Patrie dal Friûl e di Feliciano Della Mora su “Il recupero di un’antica carta topografica di Colloredo di Prato”.

[LIBRIS]

Al è saltât fûr il numar 28 de riviste da l’Union scritôrs fulans “Gnovis pagjinis furlanis”. Tal numar curât dal diretôr Renzo Balzan si onore la memorie di Carli Sgorlon, di Tito Maniacco, di Carli Michelstaedter e di Tarcisio Petracco, fondatôr de Universitât furlane. Un altri articul al è dedicât ai 80 agn dal poet e animadôr culturâl (“Scuele libare furlane”, “La Cjarande”…), pre’ Domeni Zannier.

[CONCORS]

I fruts dal Friûl a varan timp fint ai 14 di Avrîl par cjapâ part al concors fotografic “Pezzata rossa italiana: la signora del Friuli-V. G.”. Il premi al è proponût di “Ersagricola Marianis-Volpares”, “Anapri”, Forestâl e “Ersa”.

[CINE]

Il “Cinema Splendor” di San Denêl al presente “Il Grinta”, sabide ai 2 di Avrîl a 21 e domenie ai 3 a 16.30, e po “The fighter”, martars ai 5 di Avrîl a 21.

[DIASPORE]

Il Comun di Trep Grant cul Servizi associât culture de Comunitât culinâr dal Friûl, sabide ai 2 di Avrîl a 18, al proiete li dal cjistiel di Colorêt il documentari “Farcadice, diari di viaç: il Friûl in Italie” di Carlo Della Vedova e di Luca Peresson.