[POLITICHE]

Miercus ai 2 di Fevrâr, il Moviment Provincie Pordenon-Puart al clame dongje il so consei, a 20.30 li dal ambient “alla Botte” di Puart. Si discorarà dal rinovament dal moviment e dai siei animadôrs, de samblee dal 2011 e de visite dai 3 di Avrîl tai Cumons de Alta Valmarecchia, ch’a àn bielzà otignût il passaç di Regjon.

[ECONOMIE]

La Cjamare di cumierç taliane di Budapest, dulà ch’a lavorin de fondazion incà un biel scjap di operadôrs economics furlans, e organize in colaborazion cu la Comission des cjamaris di cumierç europeanis un confront su “La strategie e i obietîfs dal guvier ongjarês pal timp ch’al varà la direzion de Union europeane”. Joibe ai 3 di Fevrâr, al fasarà di reladôr il ministri de economie, Gyorgy Matolcsy. La convigne e tacarà a misdì. I uficis de Cjamare di cumierç a son li dal Váci Utca Center di Budapest (Váci utca 81).

[AMBIENT]

Framieç di tantis menacis, sociâls (espropiazion de propietât coletive), economichis (abandon de pescje lagunâr tradizionâl par colpe des concessions e de “molluschicoltura”; progets di svilup turistic massîf e diportistic…) e ambientâls (incuinament industriâl dal pôl chimic; cassis di “colmata”…), un câs pardabon particulâr al è chel de “Valle Grotari”. La cuistion e je presentade su la rêt, in gracie dal lûc internet www.facebook.com/photo.php?pid=1945042&l=ae229a2579&id=1483280112.

[SPORT]

Dai 3 ai 6 di Fevrâr, al è programât a Lignan, li di “Getur”, un “stage” di “Rugby in carrozzina”. L’iniziative e sarà curade di “Asd SportEqual”, di “Fispes” e dal Comitât talian paralimpic, in colaborazion cun “Inail”. I protagoniscj dal “Wheelchair Rugby” a son tetraplegics e personis cun disabilitâts di chê fate. La dissipline e misture regulis dal “rugby”, de bale tal gei e dal “hockey”.

[CONCORS]

Romançs inedits in 180 batudis di calcoladôr, spedîts par “e mail”, e “sms” a puedin concori a la II edizion dal concors “In trê riis”. Par cjapâ part al premi, inmaneât de clape culturâl “Colonos”, si varà timp fint ai 23 di Avrîl. Lis voris ineditis a varan di jessi prontadis di autôrs sot dai 35 agns. Lis direzions dal concors a son: info@colonos.it pe sezion dai romançs e 345 2923767 par chê dai “sms”.

[AMBIENT]

A tirin adilunc lis “Zornadis te nêf”, par cure dal Parc des Dolomitis furlanis. Apontament domenie ai 6 di Fevrâr (5 oris par cognossi la nêf; convigne a 10 li dal centri pes visitis di Cimolais e prenotazion dentri misdì dai 5 di Fevrâr).

[LIBRIS]

L’Institût di storie sociâl e religjose di Gurize (skype: issrgo) al presente a Udin il volum di Valerio Perna “Relazioni tra Santa Sede e Repubbliche baltiche (1918-1940). Monsignor Zecchini diplomatico”. L’apontament al tacarà a 18, miercus ai 2 di Fevrâr li dal “Spazio eventi” de librarie “la Feltrinelli” (strade Canciani, 15). A presentin il studi sul deplomatic furlan (www.friul.net/dizionario_biografico.php) Valerio Perna e Ferruccio Tassin.

[TEATRI]

Dai 2 ai 5 di Fevrâr, li dal “Teatro Nuovo” di Udin, si podarà viodi il spetacul “L’arca”, direzût di Julie Lachance. La companie canadese “L’Arsenal”, tal An internazionâl de Biodiviersitât, e à prontât un spetacul cun musiche, bal, art di “nouveau cirque” e multimedialitât par judâ a viergi i voi su la crise ecologiche e su la distruzions dal ambient naturâl. Lis rapresentazions a tacaran a 20.45.

[CONVIGNIS]

La “Scuele catoliche di culture” di Udin e propon 3 convignis su “Patrie e Patriis. Stât e nazion”. I apontaments a colaran ai 3 di Fevrâr (“La Patria del Friuli e il Risorgimento italiano”), ai 10 (“Dalle patrie locali all’Unità d’Italia”) e ai 17 di Fevrâr (“Modelli di stato: dal centralismo al federalismo”). Si tache ogni volte a 18, li dal Centri culturâl “Paolino di Aquileia” (borc di Trep 5, a Udin). Reladôrs: Cvesare Scalon, Fulvio Salimbeni e Giovanni Sartori.

[CONVIGNIS]

Joibe ai 3 di Fevrâr, apontament li de sale polifunzionâl di Cjampfuarmit par discori su “La relazione tra i genitori e i loro figli”. A 20.30, si confrontaran pre’ Pierluigi Di Piazza e la neuropsichiatre Silvana Cremaschi.