[DIASPORE]

Di chê strade de esposizion “Il Presepio dei Cramârs/Die Krämerkrippe” (li de glesie dal Spirtussant di Monai), domenie ai 2 di Genâr, il demograf de Universitât furlane Alessio Fornasin al propon une lezion intitulade “Nel paese di Esterai. Emigrazione e relazioni commerciali tra la montagna friulana e la Stiria”. La convigne e tacarà a 15, te sale dal Bar Sport di Ravasclêt.

[NAZIONS]

Tal “Klender 2011”, l’institût culturâl mochen “Bersntoler Kulturinstitut” di Palai en Bersntol (Trent) al fronte la cuistion dai ûs dal len in dì di vuê e tes etis passadis. L’opare, curade di Claudia Marchesoni e di Leo Toller, e proferìs lis fotos dal institût che, ai 7 di Avost dal 2010, al à screât une sezion gnove dal Museu dal teritori a Vlarotz/Fierozzo cu la see “Sog van Rindel”.

[MUSICHE]

Domenie ai 2 di Genâr, conciert dal prindalan li de glesie parochiâl di Lison di Puart, a 16 cu lis corâls di Sumaghe e di Lison.

[GLESIE FURLANE]

Domenie ai 2 di Zenâr a 19, li dal dom di Glemone, “Messa Sanctus Patricius” di Claudio Macchi, cu la corâl “Montasio” dal “Crs. Julia” di Triest (diretôr Claudio Macchi).

[CINE]

Pai fruts di Majan il 2011 al tache a teatri e al cine. Domenie ai 2 di Genâr, lis proiezions dai cines di animazion a tacaran a 16 li dal auditorium. Apontament cul teatri domenie ai 9 di Genâr. A 16 tal auditorium, si presente “Pelle d’oca”, te suage de rassegne regjonâl “PiccoliPalchi”.

[MOSTRIS]

Fint ai 6 di Genâr, li dal Polifunzionâl di Sudri, si podarà rimirâ la mostre “La mia Carnia. Sogni, segni, tradizioni, disegni”. Pro loco e Cumon a proponin i dissens di Cilio Teodoro “Sergio”, dissegnadôr di Zuviel. Dîs di fieste, 10-12 / 14-19; dîs di vore, 14-19.

[SOCIETÂT]

«Dal 1968 al servizi dai plui dispreseâts, dai plui bandonâts, dai mancul protezûts»: cun cheste “identitât”, si presente tal so ultin boletin l’associazion “I nostri amici lebbrosi” di Udin. L’argument plui impuartant de rese di cont dal secont semestri dal 2010 e je la scree dal St. Camillus Maternity Center and Polyclinc, realizât in doi agn tes Filippinis, a Manaoag-Pangasinan. Ma la clape dal dotôr Daniele Sipione e presente ancje lis oparis fatis vie pal 2010 in Indie e in Etiopie. “I nostri amici lebbrosi”, an passât, a àn ricevût e transofrmât in oparis un milion e 750mil euros.

[CONVIGNIS]

Par cure de “Associazione storico-archeologica-culturale Valentino Ostermann” di Glemone, martars ai 4 di Genâr, Mauro Vale al cjacararà su “La Messa del Tallero tra i doni dei Re e i fuochi del crepuscolo”. La convigne e je stabilide a 20.30 li de glesie di sant Micjêl.

[LIBRIS]

Martars ai 4 di Genâr, si presente a Priole di Sudri, li de Cjase di Boc a 18, il romanç di Raffaella Cargnelutti “Il ritratto di Maria”, ch’al conte la liende di une famee cjargnele te Ete dai Cramârs (secui XVI-XVIII).

[CORS]

Te suage di “Montagna amica”, la schirie di iniziativis su la mont par cure des sezions “Cai” dal Friûl e dal Venit, Parc naturâl des Prealps Juliis, sezions montanis dal “Cai”, coleç regjonâl des Guidis alpinis e Scuele di alpinisim di Tumieç a organizin doi cors su la prevenzion dai pericui causionâts des lavinis, intant che si skie o che si cjamine cu lis cjaspis. Il prin apontament al cole ai 13 e ai 14 di Genâr, a Scluse, li dal Centri scuelastic a 20.30.