[NAZIONS]

La clape “Terre sul Confine” di Visc, ch’e opere pal rispiet e pe valorizazion dal vieri cjamp di concentrament inmaneât dal fassisim vie pal 1943 par tibiâ i popui de Jugoslavie, i à mandât un telegram al scritôr sloven di Triest Boris Pahor par condanâ i vandalisims cuintri dal “Kulturni dom” de vile juliane. «L’offesa, tragicamente, si riverbera sul popolo italiano – al à scrit Ferruccio Tassin –, incapace di capire l’enormità del passato fascista, tendendo a derubricarlo in fenomeno da baraccone, evitando di confrontarsi con tutta la carica esplosiva ed eversiva del suo incancrenito razzismo». “Terre sul Confine”, tal so mes, e marche ancje che «non bastano né concerti né incontri fra i grandi, se non sono i popoli a vedere luoghi di abominio che siano memoria dell’odio che fu, per trasformarlo in confronto, accettazione e stima».

[INFORMAZION]

I studiâts de Universitât furlane a àn curât la redazion dal lûc internet www.repubblicadellacarnia1944.uniud.it, ch’al presente la storie de plui grande e de plui lungje Republiche partesane che la Resistence e à imbastît intant de ocupazion naziste in Italie.

[INFORMAZION]

L’artist udinês Ulderico Gropplero, ch’al lavore in Germanie e in France e ch’al è deventât une vore innomenât creant i senaris, i costums e i personaçs dal cine “La storia infinita”, in plui di scrivi e di inlustrâ un grum di libris e di progetâ senografiis teatrâls cetant rimiradis (www.friul.net/dizionario_biografico.php), al à prontât un lûc internet dulà ch’al presente la sô cariere artistiche.

[CINE]

Il cine “Sociale” di Glemone, miercus ai 3 di Novembar, al proiete a 21 il documentari su la prime vuere mondiâl “Gloria: apoteosi del soldato ignoto”, ch’al è stât zirât vie pal 1921 in Aquilee, a Grau, Pordenon, Udin e Triest. Al presentarà il storic Lucio Fabi.

[CULTURE]

Miercus ai 3 di Novembar, il Cumon di Gurize al scree la statue dedicade a Carli Michelstaedter (www.friul.net/dizionario_biografico.php). E vegnarà logade a 17.30 li di strade Rastello, par memoreâ il centenari de sô muart. A 20.45, la cerimonie e larà indevant cul conciert “Michelstaedter e la musiche”, li dal teatri Verdi.

[SPORT]

Dai 3 ai 7 di Novembar, a son programâts a Lignan i campionâts mondiâi di “wheelchair hockey”, al ven a stâi l’hochey zuiât cui biroçs eletrics. Vot scuadris – Australie, Belgiche, Danimarcje, Finlandie, Gjermanie, Italie, Olande e Svuizare – a zuiaran li de palestre “Getur”. La manifestazion e je prudelade di “Uildm (Union taliane lote cuintri de distrofie musicâr).

[POLITICHE]

Il Comitât pe riunificazion ministrative di Plodn/Sapade cul Friûl, ai 28 di Otubar, al à incuintrât a Triest i deans dai grops politics tal consei regjonâl e il president Maurizio Franz. I puartevôs de comunitât cjargnele (in zornade di vuê sot de Provincie di Belum) a àn domandât che il consei al palesi, in curt e in forme uficiâl, il so parê positîf sul passaç di Regjon, ch’al è necessari par ultimâ la razionalizazion ministrative domandade dal 95% dai Sapadins (860 su 903 votants).

[SOCIETÂT]

Tal lûc internet de regjon, e je començade la consultazion publiche par mudâ la leç sul volontariât 12/95. Fintremai ai 31 di Decembar, si podarà spedî cu la pueste eletroniche propuestis su partecipazion, sussidiarietât e promozion sociâl dal volontariât.

[LIBRIS]

Il Museu di storie naturâl, joibe ai 4 di Novembar, al presente a Udin l’ultime fra lis sôs monografiis. E je intitulade “Architettura delle Alpi Friulane” e le à curade Maurizio Ponton. La presentazion e tacarà a 18, li de sale “Ajace” dal municipi. Intervents dal autôr, dal diretôr dal Museu Giuseppe Muscio, di Alberto Castellarin de Universitât di Bologne e di Peter Suhadolc de Universitât di Triest.

[GLESIE FURLANE]

La Glesie di Concuardie-Pordenon e intint di dâi snait al so An pastorâl mediant di un program di convignis diocesanis di preiere. A son programadis joibe a 20.30 a Sant Vît dal Tiliment, a Puart (te glesie di sante Rite) e a Corbolon e vinars a 20.30 te glesie dal beât Durì a Pordenon e tal dom di Manià. I apontaments a colaran ai 4 e ai 5 di Novembar; ai 13 e ai 14 di Genâr; ai 3 e ai 4 di Fevrâr; ai 3 e ai 4 di Març, ai 7 e ai 8 di Avrîl e ai 5 e ai 6 di Mai.