[POLITICHE]

Si discor dal avignî de montagne cjargnele e de riforme dai siei ents locâi, joibe I di Lui. Il moviment “Carnia in movimento” al à inmaneât une samblee publiche, ch’e tacarà a 20.30 li de Comunitât montane, a Tumieç. A proponaran des relazions Daniela Radina (“L’autonomie cjargnele te storie”), Guglielmo Cevolin (“Il gnûf Ddl pal riordenament dai ents locâi”), l’assessore regjonâl pes autonomiis locâls Federica Seganti (“Propuestis par riordenâ i ents locâi cjargnei”) e Giovanni Canciani (“Motîfs di riflession”).

[ECONOMIE]

Vinars ai 2 di Lui, l’Ordin dai avocats di Gurize al à invidât il professôr Fabio Padovini par une conference publiche su la cuistion: “Abuso di posizioni dominanti”. E tacarà a 19 li de Fondazion Carigo (strade Carducci 2).

[SPORT]

Il circul cjargnel di “Legambiente”, intun document presentât a la Comunitât montane, ai sindics di Tumieç e di Zui e al Inspetorât des forestis di Tumieç, al à motivât dute la sô oposizion a la gare cu lis motocicletis “Trofeu Luigi Varnerin”, programade tai comuns di Tumieç e di Zui dai 2 ai 4 di Lui. La manifestazion e je stade publicizade prin ancjemò de concession des autorizazions necessariis e a la barbe dai dams causionâts massime te localitât Pra’ Castello intant de gare dal 2007.

[AMBIENT]

E je pronte l’ultime relazion anuâl di “Cipra Internazionâl”. Tal “An internazionâl de biodiviersitât”, e proferìs l’impegn di chês feminis e di chei umign ch’a lavorin a pro de “Biodiversità nelle Alpi”. La relazion anuâl de organizazion impegnade pe aplicazion de “Convenzion internazionâl des Alps” e pues jessi domandade a gratis, doprant lis direzions 00423 237 53 53 e international@cipra.org.

[LIBRIS]

Vie pal Istât, la Libreria Editrice Goriziana e invide i letôrs tal so zardin (corso Giuseppe Verdi 67, a Gurize) par incuintrâ libris e autôrs. Vinars ai 2 di Lui apontament cun “Il ritorno del dinosauro” di Piero Dorfles; joibe ai 8 di Lui, “Ipazia. Vita e sogni di una scienziata del IV secolo” di Adriano Petta e di Antonino Colavito; joibe ai 15 di Lui, “La medicina dei Longobardi” di Franco Fornasaro. Lis convignis cui autôrs a tacaran a 17.30.

[CINE]

Te prime setemane di proiezions, la rassegne “Cinema sotto le Stelle” e propon te place Calderari di Pordenon, chescj cines: ai 2 “Il piccolo Nicolas” di Laurent Tirard; ai 5 “Visioni Sonore: Piano Movie”; ai 7 “Alice in Wonderland” di Tim Burton e ai 9 “Alvin Superstar 2” di Betty Thomas. Proiezions a 21.30.

[SALÛT]

Vinars ai 2 di Lui, a 18 li dal Auditorium de culture furlane di Gurize, l’orchestre “Suzuki” di Triest e propon un conciert intitulât “Per Conoscere”, cun musichis tziganis e folk. Il fin dal spetacul, inmaneât de associazion di fameis di pidimentâts “Geco” (Genitori Consapevoli), al è chel di sensibilizâ la comunitât sul inseriment dai “soggetti diversamente abili nell’età evolutiva”.

[LIBRIS]

Cuntune anteprime taliane, vinars ai 2 di Lui, si presente a Udin il libri “Cartolina dalla fossa - Diario di Srebrenica” di Emir Suljagic. Il studi sul maçalizi bosgnac dal 1992 al sarà presentât a 18, par cure dal Centro espressioni cinematografiche, li dal cine “Visionario”.

[TEATRI]

La rassegne “Puf-Burattini Senza Confini-Lutke Brez Meja” e propon i siei apontaments vinars ai 2 di Lui, a 18, li dal parc “Peep” di Felet (Ottavio Caballero dal Paraguay) e, a 21, a Cjarmacis di Tor di Zui (“La casa degli gnomi”). Sabide ai 3 di Lui, spetacul di “Teatro in piedi” a 18, li dal palaç vinizian di Malburghet.

[MOSTRIS]

Par dut il mês di Lui, li dal prin plan dal aeropuart di Roncjis di Monfalcon, e reste imbastide la mostre “Itinerari di arte e fede in Friuli-V. G.”, cu lis fotos e cui tescj di Luciana Ceriani. L’esposizion e sarà screade vinars ai 2 di Lui a 18.30. L’iniziative dal circul “Pre’ Eugenio Brandl” di Turiac e je prudelade de Regjon.