[TEATRI]

Vinars Sant, ai 2 di Avrîl, su lis cuelinis di Cicunins, l’associazion “Un grup di amîs” e torne a presentâ la rapresentazion sacrade de Passion. L’apontament, inmaneât di 120 atôrs direzûts di Riccardo Michelutti, al tacarà a 21.

[TEATRI]

La rievocazion de “Via Crucis” tradizionâl che dal 2002 la int di Vinai a tornin a proponi, daspò de fermade dal 1954, doprant i vieris costums e lis antighis melodiis latinis, chest an e vegnarà rapresentade vinars ai 2 di Avrîl, a 19.30 a Trave e a 21 a Vinai.

[POLITICHE]

A Plodn/Sapade, intant des votazions regjonâls dai 28 di Març, e je scatade la proteste dai paisans ch’a pratindin il rispiet de volontât popolâr pandude tal referendum dal 2007 pe riunificazion ministrative dal Comun cul rest dal Friûl (71,72% di “sì”). 41 schedis a son stadis anuladis cu la scrite «Friuli» e, ai 31 di Març, il president dal comitât pal passaç di Regjon, Danilo Quinz, intervistât dal “Gazetin” di Vignesie, al à sclarît: dopo de votazion di Luca Zaia come president dal Venit, «cambia lo scenario tra le due Regioni: in Veneto noi abbiamo un patto firmato con la Lega, e mai smentito, in cui viene riconosciuto il nostro diritto di scelta (...). Abbiamo richiesto un incontro a Tondo perché ci dica che intenzioni ha la Regione Friuli-V. G.: un suo riconoscimento smuoverebbe senza dubbio le acque anche a Roma dove la proposta Saro è ferma. Ma se Tondo non ci vuole lo dica, non chiediamo l’elemosina».

[MOSTRIS]

Il batisteri dal I secul e il catapan batesimâl plui antîc dal mont (1379-1403), ch’a son doi dai tesaurs plui impuartants dal dom di Glemone, a jentrin te mostre “Il Battesimo. Rito opere e tradizioni in Friuli”, rivade sù di Udin e screade ai 27 di Març. Si podarà visitâle te plêf di sante Marie Assunte cul orari 8.30-12 / 14.30-18, fint ai 4 di Jugn.

[CULTURE]

In gracie di une publicazion, prin, e cuntun spetacul, dopo, e je tacade la valorizazion che Maria Lucia Teresa Beorchia e meretave. Nassude a Trave di Lauc tal 1800, vie pal 1832 e veve scrit il poeme “Stroffuttis per il viners sant”, che magari cussì no al è restât dismenteât fin tal 2009, cuant che lu à stampât tai siei cuaders l’Associazion cjargnele “Amici dei Musei e dell’Arte”. La leture seniche des “Stroffutis” e je stade proponude ai 26 di Març a Lauc di Sara Rainis, compagnade dal “Corut” di Lauc. Al à presentât il filolic Gabriele Zanello, ch’al à curât l’edizion critiche dal manuscrit.

[NAZIONS]

“Popoli”, la “mailing list” taliane sui popui natîfs e su lis nazions cence stât, e segnale 3 libris gnûfs par capî lis comunitâts balcanichis. Si trate di: “Kosovo tutto Ok” di A. Mazzola (“Il Margine”, Trent 2010; www.il-margine.it); “Kosovo: histoire d’un mythe. Essai d’archéologie littéraire” di M. Popovi? (“Editions Non Lieu”, Paris 2010; www.editionsnonlieu.fr); e “Peuples des Balkans” di M. Praneuf, (“L’Harmattan”, Paris 2010; www.harmattan.fr).

[MOSTRIS]

La mostre “Altan/Brane Solce - Storie a fumetti, animazioni e scene teatrali per piccoli e grandi sognatori” e restarà imbastide li dal cine “Visionario” di Udin fint ai 18 di Avrîl, di 16 a 22. Lis scuelis a varan di cjapâ un apontament telefonant al numar 0434 299545.

[INFORMAZION]

Par cure dal “Alef” argjentin, ogni sabide a misdì, al va in onde il program radiofonic “Fuarce Furlans”, transmetût su la frecuence FM Comunicar 90.5. Il spazi al è dedicât ai furlans ch’a vivin in Argjentine, Brasîl e Uruguay e, in specialitât, a chei di Colonia Caroya. Rivât a la cuinte edizion, si pues scoltâlu ancje su la rêt des rêts: www.fm-comunicar.com.ar/.

[CORS]

Vie pal 2010, l’Union regjonâl des societâts corâl e propon trê ’seminaris di preparazion al cjant, direzûts di Paolo Loss e di Bettina von Hacke. A saran programats li di “Getur”, a Lignan ai 10 e a 11 di Avrîl (“Respiro e canto”) ai 8 e ai 9 di Mai (“Cantare con tutto il corpo”) e ai 25 e ai 26 di Setembar (“Voce e postura”).

[SPORT]

Tal mês di Avrîl a partissaran lis ativitâts di “bike trekking” e di “Crosscountry”, par cure de associazion “Forum Julii on Bike” di Cividât. A saran previodudis escursions coletivis e individuâls, preparazion di escursions, formazion tecniche, topografiche e alimentâr pal “biker”.