[ECONOMIE]

La “Cjase dal volontariât” di San Denêl (strade Garibaldi 23), martars ai 2 di Març, e organize une serade a 20.30 sui mudaments de comunitât locâl, te suage des convignis “Riflettori sul territorio - osservatorio sulla crisi”. In specialitât si resonarà su la crise dal lavôr.

[SALÛT]

Al tache joibe ai 18 di Març il cors di inzornament “Disabilità e Invalidità: norme, prassi, benefici e provvidenze”, par cure dal “Centro InfoHandicap”. A saran proponudis cuatri lezions, a 17 li de cooperative “Hattiva Lab” (strade Villalta 59 - www.hattivalab.org - info@hattivalab.org). Si varà di dâsi in note dentri dai 12 di Març.

[CORS]

Institût superiôr di siencis religjosis di Puart e centri “Jacques Maritain” a proponin une schirie di percors formatîfs ch’a laran indevant fin tal mês di Mai. A son tacadis lis lezions dai cors su Dutrine sociâl de Glesie, ben comun e sussidiaritât (lunis a 18.30); di psicopedagogie dal malstâ e de disabilitât (martars a 16); su “welfare”, tierç setôr e culumie civîl (martars a 18); e su sience e religjon (vinars a 16). La sede dal “Issr” e je a Puart, te strade dal ’Seminari (la scretarie e vierç, di lunis fin miercus, 16-19).

[LIBRIS]

La leture de opare di Arthur Schnitzler “La signorina Else”, dopo dal esordi dai 23 di Fevrâr, e tire adilunc martars ai 2 di Març e martars ai 9 di Març, a 18.30 li dal “Caffè Nuovo” di Pordenon (plaçute Cavour). Lis “Leturis tal cafè” a son proponudis di Sandro Buzzatti.

[AMBIENT]

Il Cumon di Pordenon al à screât un ufici par judâ i citadins a sfrutâ lis oportunitâts garantidis par cui ch’al sparagne energie o ch’al dopre energiis alternativis. Al è stât imbastît li de Circunscrizion Centri, te strade dal Mercato. Oraris: sabide, 9-12 (0434 392540).

[POLITICHE]

La Buteghe dal mont di Udin e organize la partecipazion a la XV “Zornade dal ricuart e dal impegn in memorie des vitimis da lis mafiis”, programade a Milan ai 20 di Març. Partence dal centri “Balducci” di Çuian a 4 di sabide. Par adesions: 0432 507490.

[AMBIENT]

In gracie dal sistem “cjase par cjase”, in doi agns Pordenon al à rivât a passâ dal 29% al 76,24% te ricolte disferenceade des scovacis. Vie pal 2008, il riciclament al jere za cressût fint al 44%. Par miorâ ancjemò, il Cumon al proponarà sconts dal 30% par cui ch’al tache a fâ dibessôl il compostamet. Vie pal 2009, la medie anuâl di scovacis produsudis di ogni citadin e je passade dai 548 chilos dal 2007 a 490 chilos (cun 112 chilos di scovacis organichis).

[CONVIGNIS]

A tirin adilunc a Sacîl, li di palaç Carli a 20.30, lis convignis su sience e Biblie, inmaneadis dal Centri di studis biblics. Incuintris ai 3 di Març cul fisic Simone Morandini; ai 11 cul antropolic Fiorenzo Facchini, ai 18 cul neurosienziât Filippo Tempia e ai 25 cul informatic Angelo Montanari.

[LIBRIS]

Ai 3 di Fevrâr, in gracie dai “Amici della Cultura”, al è nassût a Pordenon il grop “Leggere Insieme”. Ogni prin miercus dal mês, a 18.15 li de biblioteche comunâl, i partecipants a condividaran lis sôs leturis. L’apontament dai 3 di Març al sarà dedicât a “La Ballata di Iza” di Magda Szabò.

[AMBIENT]

Il Parc des Prealps Juliis, ogni domenie dal mês di Març, al propon un’escursion naturalistiche. Domenie ai 7 “Eriche in fiore in Val Resia”; ai 14 “Fioriture in Val Alba”; ai 21 “La primavera nelle risorgive del Pradulin”; e ai 28 “Scialpinisimo sul monte Poviz”.