[CONCORS]

L’Associazion “Progettoautismo Fvg onlus” e propon il concors “Premio 2 Aprile: come ho insegnato a…” par videus curts destinâts a l’educazion di personis autistichis. Lis oparis a varan di jessi spedidis dentri dai 2 di Avrîl tai uficis di strade Sottovilla 8, a Cjavalì.

[CINE]

“Dentro/Fuori”: al è il titul de edizion 2010 dal cineforum su la salût mentâl “Le Folle e il folle”, screât a Palme ai 29 di Genâr. Par cure dal circul “Cinemanova”, al larà indevant fint ai 17 di Decembar, cuntune proiezion al mês li dal auditorium “San Marco”. A colaborin tal proget il Dipartiment di salût mentâl de Aziende Basse furlane e il centri culturâl “Il Villaggio” di Udin. I cines a tachin a 20.30, il dibatiment al sarà animât dal dotôr Bertoli dal Dipartiment.

[MOSTRIS]

Fint ai 14 di Fevrâr, li de Galarie comunâl di place Meyer, a Prate, si podarà visitâ la mostre dedicade de associazion “Ctg Kennedy” al dissegnadôr pordenonês Paolo Cossi. Classe 1980, Cossi al è autôr di oparis come “Corona, l’uomo del bosco di Erto” (2002), “Tina Modotti” (2003), “Il terremoto del Friuli” (2005) e “Medz Yeghern. Il grande male”, dedicât al genocidi armen (2007). In esposizion (martars, joibe e sabide, 17-19; domenie, 9.30-12 / 16-19), i dissens originâi dal lavôr “1432 il veneziano che scoprì il baccalà”. Cossi al sarà a Prate par discori dal so lavôr cun Vincenzo Bottecchia sabide ai 6 di Fevrâr a 17.30.

[SCUELE]

L’Institût comprensîf di Tavagnà, di cinc agn incà, al cure il sît internet www.vivinfvg.it par proponi il turisim scuelastic e familiâr in Friûl. Lis propuestis didatichis a son inzornadis di un continui cun percors gnûfs. In cinc agn di sperimentazion, il sît regjonâl al à vût passe 244mil visitis. Vie pal 2009 i navigadôrs di passaç a son stâts 68mil 565, cuntune medie di 200 visitis in dì. Tal sît, patrocinât de Direzion regjonâl pe istruzion publiche, insegnants e scuelis a puedin burî fûr informazions precisis su lis risorsis dal teritori par inmaneâ visitis e ativitâts didatichis.

[MOSTRIS]

Li de viere becjarie Buzzi di Ravasclêt, e je imbastide fint ai 16 di Fevrâr la mostre di mascaris e di fotografiis “Incontro fra tradizioni. I Tomàts di Tarcento; Der Zahrar Voschankh a Sauris; il Contrasto dei mesi a Ravascletto”. Si pues visitâle, par cure de Pro loco di Ravasclêt, di Salârs e di Zuviel, di 10 a 18.

[POLITICHE]

Te sô ultime opare, intitulade “The World’s Modern Autonomy Systems: Concepts and Experiences of Regional Territorial Autonomy”, il studiât sudtirolês Thomas Benedikter al presente il panoram mondiâl dai sistems autonomistics, profondint in mût sistematic lis problematichis leadis cun autonomie, federalisim e regjonalisim. Colaboradôr de Academie europeane di Bolzan, vie pal 2008, al à publicât il saç “Democrazia diretta: più potere ai cittadini. Un approccio nuovo alla riforma dei di-ritti referendari”.

[GLESIE FURLANE]

Miercus ai 3 di Fevrâr al cole l’innovâl di muart di pre’ Emilio De Roja (1919-1992; www.friul.net/dizionario_biografico.php). Par chel, ducj i ospits, i amîs e i sorestants de “Cjase Inmacolade” di Udin si dan dongje a 18, li de “aula magna”, par cjantâ messe. E animarà la liturgie eucaristiche la corâl dal “Mondo Unito” di Duin.

[LIBRIS]

Miercus ai 3 di Fevrâr a 18, te sale Ajace dal Cumon, in place Libertât a Udin, Mario Turello al presentarà il libri “Due racconti ottomani” di Cristiano Caracci. La convigne e je inmaneade de Biblioteche civiche Joppi cu la colaborazion dal assessorât comunâl a la culture e dal Club Unesco.

[CONCORS]

La Biblioteche comunâl di Rude e propon la IV edizion dal concors “Raccontami una storia”, cu lis sezions: narative libare par fruts che no àn finît 15 agns; narative su la solidarietât; narative coletive pes scuelis. Lis oparis ineditis, par talian, a varan di jessi consegnadis dentri dai 30 di Jugn.

[CONCORS]

Il Cumon di San Vît dal Tiliment al organize il premi di poesie par oparis publicadis e par une “opera prima”, saltadis fûr dal 2007 incà, par talian o ben tes lenghis mancul pandudis. I volums a varan di jessi consegnâts li de segretarie dal concors dentri dai 14 di Fevrâr.