[CONVIGNIS]

Sabide ai 2 di Genâr, al sarà a Ravasclêt par presentâ la sô esperience di “frut soldât”, l’academic ugandês John Baptist Onama, ch’al insegne Europrogetazion li de Universitât di Padue. Ingaiât tai agns dal Otante, Onama al à scugnût combati cui vuerilîrs cuant ch’al jere un canai. La convigne di Ravasclêt, cuntune jentrade di Giuliano Prandini di “Amnety international”, e tacarà a 17.30 li de sale comunâl dongje de viere “Seggiovia”.

[MOSTRIS]

E restarà vierte fint ai 14 di Fevrâr la mostre che la Galarie “Sagittaria” e il Centri iniziativis culturâls di Porenon i dedichin a Anzil e, in specialitât, a la sô produzion dai agns dal Sessante e a lis sôs oparis ineditis dal 1935 al 1990. Il critic Giancarlo Pauletto, curadôr de mostre cun Maria Francesca Vassallo, al definìs Giovanni Toffolo “Anzil” (Munic, 1911-Udin, 2000; www.friul.net/dizionario_biografico.php) «un testemoni essenziâl». La mostre e podarà jessi visitade tai dîs di vore (16-19) e in chei di fieste (10.30-12.30 / 16-19; fale che ai 6 di Genâr).

[DIASPORE]

Li de biblioteche comunâl “Pre’ Gilberto Pressascco” di Codroip, e je vierte fintremai ai 9 di Genâr la mostre “Insieme/Ensemble. Da Codroipo a Hennuyères. Nelle fornaci e fonderie del Belgio: durezza del lavoro e civile accoglienza”. L’esposizion e vierç di martars fin vinars, 9-12.30 / 15-19; lunis e sabide, 15-19.

[CONCORS]

Si à di dâsi in note dentri dai 30 di Genâr pal I concors talian par grops “emergenti” e par cjanteautôrs “Scrivere in musica. Canzoni d’autore”. L’organizazion e je curade de clape “Cem” culture e musiche di Pordenon (Vicolo Chiuso 4). La finâl e je stabilide par sabide ai 20 di Fevrâr, li dal auditorium di Majan, soresere.

[SOCIETÂT]

Franco Bagnarol di Cjasarse, volontari dal 1966 cui scouts dal “Asci” e po dal “Agesci”, al è deventât president dal “Movi”, il moviment talian di volontariât. Dal 1995 al 2001, al è za stât president dal Comitât talian di volontariât di protezion civîl e al à vût responsabilitâts ancje tes struturis regjonâls dal setôr. Pal neopresident dal “Movi”, il volontariât al à di restâ fidêl ai principis de cjarte dai valôrs, scrite tal 2001 de “Fivol”, e confermâ la sô sielte di gratuitât e di solidaritât, massime cui puars, par scombati cuintri di ogni discriminazion e di ogni injustizie te societât.

[POLITICHE]

Dopo che la Regjon e à scugnût disfâ ancje il consei comunâl di Vildivar, par colpe des dimissions antecipadis dal sindic Graziano Vatri, a son deventâts 9 i Cumons dulà che, te Vierte dal 2010, si scugnarà rinovâ la ministrazion comunâl. Te provincie di Pordenon a saran: Barcis, Cjanive, Claut, Montreâl e Travês; in chê di Udin: Cividât, Premariâs, Visc e Vildivar.

[AMBIENT]

La rêt di Cumons “Alleanza nelle Alpi”, par prudelâ i siei components te sielte di un’impostazion ministrative sustignibil tal frontâ i mudaments climatics, e propon la convigne internazionâl: “I comuni aiutano il clima. Interventi di mitigazione al banco di prova”. E je programade dai 21 ai 22 di Genâr a Mäder, in Austrie. L’inscrizion e je obligatorie.

[MUSICHE]

La manifestazion “Aria di Natale”, e rive insom domenie ai 3 di Genâr cul conciert “A dream for Christmas”, proponût li da teatri comunâl di Monfalcon a 18 de clape “Voci di Donna”. Il spetacul al sarà proponût dal “Cadmos Ensemble” e dal grop vocâl “Le Pleiadi”.

[CONVIGNIS]

Domenie ai 3 di Genâr, fra lis cidulis di Povolâr e di Maranzanis (ai 31 di Decembar) e chês di Comeliàns (ai 6 di Genâr, a 17), si presente li de sale “L’Alpina” il videu “Las cidulas a Comeliàns”, prontât di Ulderica Da Pozzo cu la zoventût di Comeliàns, Povolâr, Maranzanis e Tualiis, te suage dal proget “La tradizione come incontro, ricerca e futuro”. La serade e tacarà a 18, cu la partecipazion di Gian Paolo Gri, ch’al cjacararà su “I fûcs rituâi, îr e doman”.

[CULTURE]

Il Museu archeologic di Zui, domenie ai 3 di Genâr, al propon a 16 un percors guidât par scuviergi l’antiche vile romane di Iulium Carnicum. Par informazions: 0433 92562.