[SCUELE]

Pal cuint an seguitîf, il Consorzi universitari dal Friûl ocidentâl al à sierât il so belanç cuntun risultât positîf (al ven a stâi cuntun valôr di produzion di 2 milions 363 e 303 euros). La samblee dal consorzi e à stabilît l’ingrès di altris 6 Cumons fra i sustignidôrs dal ent. A son: Cjasarse, Lavorêt, Manià, Pasian, Prate e San Martin. Tal comitât di presidence a son: Giovanni Pavan, president; Luciano Padovese, Chiara Mio, Alessandro Ciriani e Pietro Roman. Tal consei di ministrazion a operin: il president Giovanni Pavan, Vittorino Faccin, Giuseppe Amadio, Giovanni Lessio, Chiara Mio, Alessandro Ciriani, Maurizio Cini, Michelangelo Agrusti e Luciano Padovese; il mandât di Dino Baggio, Giovanni Pellegrini e Cinzia Palazzetti al finissarà vie pal 2009.

[CINE]

Sabide ai 2 di Mai, te suage de mostre “Storie di un viaggiatore. Stanislao Nievo”, imbastide li de Cjase des regjons di Rome (te strade Aldovrandi 16), Fondazion Ippolito Nievo (06 8841392) e Fogolâr furlan a proponin la proiezion dal cine “Mal d’Africa”, scrit e direzût di Stanislao Nievo tal 1967 (www.friul.net/dizionario_biografico.php). L’apontament culturâl al tache a 16.30.

[SCUELE]

A 10, 11 e misdì di ogni sabide, la Scuele mosaiciscj dal Friûl e propon te sô abitance di Spilimberc visitis guidadis par cui ch’al vûl cognossi cheste instituzion formative d’innomine mondiâl. Si pues dâsi in note li dai “infopoint” de agjenzie turistiche regjonâl (www.turismofvg.it).

[LIBRIS]

Li de biblioteche civiche “Vicenç Joppi” di Udin, te suage dal “Proget genitôrs e fruts inmigrâts in biblioteche”, a operin i servizis a gratis di leture di sfueis in dutis lis lenghis, di vision e di scolte di cine e di musichis internazionâls, di colegament internet, di scolte di storiis par fruts tes lôr marilenghis. In vore par chest servizi a son i mediatôrs culturâi e lenghistics des “Acli” (www.mediatoriacli-ud.it - mediatoriacli.udine@libero.it), li de Sezion moderne e Sezion fruts.

[POLITICHE]

Domenie ai 3 di Mai, a 20.45 li de sale “Il Caseificio” di Spilimberc (strade Richelda), “Il Caseificio” e il circul Acli “Un tempo per”, in colaborazion cu la clape “Erasmo da Rotterdam” e cul Cumon, a organizin une convigne par discori di “Comunità europea questa sconosciuta! Cos’è? Come funziona? Quali sono i suoi obiettivi? Quali i traguardi raggiunti fino a oggi?”.?

[POLITICHE]

Sabide ai 23 di Mai al scjât il timp risiervât ai malâts dipendents di machinaris par domandâur ai sindics di podê votâ cjase sô. Ospits des cjasis di cure e presonîrs, se lis struturis si cjatin tal so Cumon, par podê votâ cence movisi a varan di fâ la lôr domande ai sindics dentri dai 4 di Jugn. Si votarà sabide ai 6 di Jugn, di 15 a 22, e domenie ai 7 di Jugn, di 7 a 22. Si votarà pes ministrazions comunâls, pe ministrazion provinciâl di Pordenon e pal Europarlamen.

[CINE]

La rassegne “I viei e i zovins. Un secul di storie taliane seont dîs films” e propon i ultins doi apontaments lunis ai 4 di Mai (“Tutta la vita davanti” di Paolo Virzì, 2008) e lunis ai 11 di Mai (“Una vita difficile” di Dino Risi, 1961). Des dôs oparis, a 17 tal salon di palaç Antonini (vie Petracco 8 di Udin), a cjacararan i professôrs Andrea Tabarroni e Cristiana Compagno.

[CORS]

Il Grop costums tradizionâi bisiacs di Turiac al propon cors di conversazion par anglês par zoventût e par grancj a saran programâts dai 22 ai 27 di Jugn cun insegnants di marilenghe anglese. Lezions di 9 a 13 di lunis a sabide, pai zovins, e di 20 a 22 di lunis a vinars, pai viei. Si varà di dâsi in note li de biblioteche, ogni sabide di 11 a 12. Par informazions: 0481 767065.

[POLITICHE]

Martars ai 5 di Mai, e finìs a Pordenon la schirie di convignis inmaneadis de clape culturâl “Carlo Cattaneo” su la cuistion: “Dalle Vicìnie al Federalismo: autogoverno e responsabilità”. A 20.30, li dal auditorium regjonâl di vie Rome, si confrontaran su “Prospettive per una società federale nella penisola italiana. Il federalismo visto e analizzato da diversi punti di vista”: Luigi Marco Bassani de Universitât di Milan, il sociolic Luca Romano e i conseîrs regjonâi Danilo Narduzzi e Mauro Travanut.

[CINE]

Martars ai 5 di Mai, il Cine Sociâl di Glemone al presente l’ultin documentari di Marco Rossitti. “Sulla pelle della terra”, ch’al ven proietât a 21, al presente il taramot dal Friûl e la ricostruzion. Al sarà proietât ancje il documentari “Rifare una città” di Enzo Balboni. Il vuadagn de serade al sarà destinât ai taramotâts dai Abruçs.