[SALÛT]

La riviste “L’Ippogrifo”, domenie I di Març, e fiesteze 10 agns di vite. A 17.30 li dal teatri comunâl di Pordenon, e propon la fieste pe culture “La città vista dalla luna”.

[CINE]

Il documentari di Nicole Leghissa “La debole corrente. Pietro di Brazzà un eroe bianco nell’Africa nera”, domenie I di Març, al ven proietât intant dal plui grant festival dal cine african, in Burkina Faso. L’opare e je stade produsude di “Tico Film” e di “Settimarte”. Il “Fespaco”, bienâl de cinematografie africane, al è programât dai 28 di Fevrâr ai 7 di Març, a Ouagadougou.

[MUSICHE]

Domenie I di Març, a tornin a tacâ i concierts internazionâi pe Coresime dal 2009, li de glesie di san Jacum di Pasian di Prât, par cure de Academie organistiche udinese. Il prin apontament al sarà animât di Manuel Tomadin, vincidôr dal premi “Paul Hofheimer”. Il conciert al tacarà a 17.30 cun musichis di Bach e di Mendelssohn. Ogni sabide prin dai concierts, di 10 a 17, il mestri conciertist de setemane al proponarà a gratis lezions di organo.

[CULTURE]

La discuvierte di Cora Slocomb di Brazzà, inviade di “In file” e tire adilunc domenie I di Març cuntune visite guidade li di Cjase Cocel, a Feagne, e tal cjiscjel di Breçà. L’apontament, inmaneât dai “Colonos”, di 15 a 18.

[CULTURE]

Te zornade des “Ferrovie Dimenticate”, domenie I di Març, e ven organizade un’escursion a Davâr. La visite e tacarà a 10.45 li de place dal municipi. Par informazions: 335 8413803.

[CULTURE]

A Cjastiel di Porpêt, domenie I di Març, si fiesteze. A 10 e sarà cjantade messe cu la corâl Ana “Ardito Desio”. Finide la liturgie e sarà benedide la autocarete C39 Spa Cl 39. A 11, li dal tindon pes fiestis, si presentarà l’anuari pal 2008 de clape culturâl “Ad Undecimum” di San Zorç di Noiâr cu la rievocazion storiche de vuere greghe-albanese.

[MOSTRIS]

La sale didatiche de Galarie di art moderne e propon fintremai al I di Març l’esposizion “Omaggio ad Alberto Viani. I tabelloni didattici”. Oraris: di martars fin sabide, 9.30-12.30 / 15-18; domenie, 9.30-12.30.

[MUSICHE]

Al è daûr a girâ ator pal Friûl il spetacul musicâl di Silvano Buchini “Cui cirîso?”, eseguît dal “Emmaus ensemble”, une corâl cun soliscj, un cuartet, il compagnament dal organo e percussions. Il calendari des replichis dal mês di Març al previôt: lunis 2, a Purcie a 17.30; ai 7 a Palme a 20.30; ai 14 a Martignà a 9; ai 28 a Bresse di Cjampfuarmit; ai 5 di Avrîl a Godie. Dutis lis rapresentazions a vegnaran proponudis tes glesiis dai paîs.

[CONVIGNIS]

“MusicistiTreVenezie” e Otel President di Spilimberc (in vie Cividât 10) a organizin une schirie di convignis intitolade “Luned’ìncontro”. Si tacarà ai 2 di Març cun Rocco Burtone e cul so libri “Canzone del disordine”. Ai 9 al interven Licinio Rudivalle; ai 16 Andrea Del Favero (“Andrea & Folkest”); e ai 23 Alessandra Zenarola, autore dal libri “Smagliature”. Dutis lis convignis dal mês di Març a tachin a 21.

[ECONOMIE]

Martars ai 3 di Març a 17 te Sale convignis di Palaç Antonini (Universitât) de strade Petracco 8 a Udin, conference di Luigino Bruni su “L’economia della felicità”.