[AMBIENT]

Dai 2 ai 6 di Fevrâr, il circul monfalconês “Green Gang” di Legambiente al propon la campagne “Mal’aria”, in colaborazion cun Cumon e “Apt” di Gurize. Ducj i scuelârs a son invidâts a lâ a scuele a pît o cun mieçs che no incuinin. La manifestazion e sarà sierade domenie ai 15 di Fevrâr cul percors in biciclete “Bike day: tutti in… pista!” (a 9.30 te place de Republiche) e po cu la convigne “Problematiche e proposte per una città più vivibile” (a 11 li dal Centri de zoventût di viâl san Marc).

[CULTURE]

Te polemiche sul gei che il Consorzi industriâl “Cosint” di Tumieç al volarès realizâ a Damâr, al è intervignût ancje il mestri Giovanni Canciani, diretôr de Scuele di musiche di Tumieç. Par lui a saressin bêçs straçâts. Miôr pluitost impegnâsi a recuperâ la fabriche tumiecine di Jacopo Linussio, ch’al è il plui grant monument di archeologie industriâl dal Sietcent e che, in zornade di vuê, al è ridusût une casarme.

[INFORMAZION]

Par insiorâ la ceremonie de intitolazion di Largo Rizzolo al zornalist Alvide De Jeso, inmaneade ai 24 di Genâr dal Cumon di Reane, al è saltât fûr il fassicul “Alvise De Jeso Giornalista del Friuli 1915-1978”. Te publicazion a comparissin intervents dal sindic Edi Colaoni, Piero Villotta, Mario Toros, Gino di Caporiacco, Mario Blasoni, Renato Romanelli, Paolo Stefanato, Bepi Pucciarelli, Luciano Provini e Gianfranco Ellero. Dopo de biografie, al è stât publicât ancje il ricuart e il ringraziament dai fîs di De Jeso, Carla, Gigliola, Adriano e Fabiola. De Jeso, fondatôr dal cuotidian “Friuli Sera”, prin al jere stât “capocronista” dal “Messaggero Veneto” par vincj agns.

[CULTURE]

L’Institût di storie sociâl e religjose di Gurize, te sô samblee di Genâr, al à rinovât il consei diretîf. I gnûfs components a son: pre’ Renzo Boscarol, Peter Cernic, Liliana Ferrari, Marco Grusovin, Alessandro Quinzi, Ferruccio Tassin e Andrea Tilatti.

[LIBRIS]

Martars ai 3 di Fevrâr, si presente il libri “Cjopris e Viscon - I nons dai puescj” di Alessandro Pian e di Maurizio Puntin. La convigne, inmaneade dal Institût Achille Tellini di Manzan e dal Cumon di Cjopris e Viscon, e tacarà a 20, li de sale polifunzionâl di Cjopris (vie Sauro).

[GLESIE FURLANE]

Il vescul di Gurize, monsignôr Dino De Antoni, al à nomenât i gnûfs deans ch’a guidaran i 10 decanâts ch’e je dividude la Glesie diocesane dal Friûl orientâl. A saran: pre’ Lorenzo Boscarol par Roncjis di Monfalcon; pre’ Fulvio Ostroman par Monfalcon; monsignôr Armando Zorzin par Aquilee; pre’ Giampietro Facchinetti par Cervignan; pre’ Ugo Bastiani par Duin; pre’ Carlo Bolcina par Sant Andree; monsignôr Sergio Ambrosi par Cormòns; pre’ Gioacchino Raugna par Visc; pre’ Stefano Goina par Gradiscje Imperiâl; e pre’ Sinuhe Marotta par Gurize.

[TEATRI]

La rassegne teatrâl “Con i nonni a teatro”, par cure di “Ortoteatro” di Pordenon, e tire adilunc li dal auditorium pordenonês “Concordia” ai 4 e ai 18 di Fevrâr; ai 4 e ai 18 di Març. Dutis lis rapresentazions a tachin a 17.

[LIBRIS]

Miercus ai 4 di Fevrâr, a 18 te sale Ajace dal palaç dal Cumon di Udin, presentazion dal romanç “Nel regno oscuro” di Giorgio Pressburger (Milan, 2008).

[CONVIGNIS]

Te suage de schirie di convignis “Vietato vietare. Per capire il ’68”, l’Institût regjonâl Gramsci, joibe ai 5 di Fevrâr, al propon une convigne cun Pasquale Voza de Universitât di Bari e Giampaolo Borghello de Universitât furlane. A 16, li de Biblioteche statâl di Triest (Largo Papa Giovanni XXIII 6), a cjacararan su “Il ’68 tra la Neo-avanguardia e Pasolini”. Ai 12 di Fevrâr e colarà un’altre convigne su “Il ’68 e dintorni a Trieste e nella vicina Slovenia”.

[LIBRIS]

Joibe ai 5 di Fevrâr, convigne cun Federick Mario Fales, te sede de Societât furlane di archeologie (te Puarte Vilalte di Udin). A 18, al cjacararà dal “Museu di Baghdad: daspò dai ladroneçs”.