[GLESIE FURLANE]

In dutis lis Glesiis dal Friûl e varà une solenitât speciâl, chest an, la memorie liturgiche di sant Cromazi di Aquilee, ch’e je stabilide pai 2 di Decembar. Tal 2008, difat, al cole il MDC innovâl de sô muart (www.friul.net/dizionario_biografico.php). Il grant dotôr de Glesie aquileiese al è ricuardât intune mostre imbastide li dal palaç patriarcjâl di Udin e ancje Pape Benedet lu à vût inliment tes sôs catechesis dal miercus. Par san Jaroni, grant amì di Cromazi cun Rufin di Concuardie, il sant vescul al fo pe Glesie di Aquilee grant come Besleel, il construtôr dal tabernacul dal Antîc testament.

[AMBIENT]

La Regjon Friûl-V. J no je in regule cul obietîf dal 35% te ricolte disferenceade des scovacis. Difat, si è fermade al 33,3%. Lu à pandût il “Rapuart anuâl scovacis 2008”. Des provinciis furlanis a son in regule Pordenon, cul 45,3%, e Gurize, cul 41,6%, un tic plui indaûr la provincie di Udin, cul 32,7%. Un disastri il 16,7% de provincie di Triest.

[LIBRIS]

L’editôr di Puart “Nuovadimensione” al à publicât un gnûf volum de golane ”Memoria”. Si trate de opare “Tutto questo va detto. La deportazione di Maria Rudolf” di Gabriella Nocentini. Tal libri e je contade la storie de “stafete partesane” di Gurize Maria Rudolf (classe 1926), depuartade a Auschwitz, Flossenbürg e Plauen. Postfazion di Marco Coslovich. In prevision de “Zornade de memorie”, ch’e cole ai 27 di Genâr dal 2009, al sarà possibil di organizâ convignis cu l’autore.

[CORS]

“Oari” e “Avulss” a proponaran a Glemone un cors pal volontariât sociâl di 48 oris. Al tacarà ai 13 di Genâr dal 2009, a 20 li dal Ospedâl. Lezions ogni martars e vinars.

[POLITICHE]

Il Moviment “Provincia Pordenone-Portogruaro”, ch’al opere di agns e di agnorums par favorî la riunificazion ministrative di dut il Friûl concuardiês, ancje chês parts che in zornade di vuê a son zontadis cu lis provinciis di Vignesie (Mandament di Puart) e di Trevîs (Midune, Lorenzaghe furlane e Malghèr), al popolarize la sô ativitât politiche tal lûc internet: www.in-friuli.org/.

[LIBRIS]

Martars ai 2 di Decembar, il cicloviazadôr Emilio Rigatti al cjacararà a Gurize dai siei libris plui preferîts. Lu à invidât cun chel fin la librarie Ubik di vie Verdi, a 17.30. Il scritôr gurizan, fra l’altri, al à scrit “La strada per Istanbul”, “Minima Pedalia” e “Yo no soy gringo. Taccuini sudamericani di coincidenze, truffe e piccoli miracoli”.

[MUSICHE]

Il Centri di musiche antighe “Dramsam”, martars ai 2 di Decembar, al propon une lezion/conciert par presentâ i siei cors di musiche antighe de Ete di Mieç e de Rinassince. La convigne e tacarà a 19, li dal “Kulturni Center Lojze Bratuz” (in viâl 20 Settembre, a Gurize). L’iniziative e je inmaneade in colaborazion cul Centri sloven di educazion musicâl “Emil Komel”.

[LIBRIS]

Martars ai 2 di Decembar, si presente il volum “Avifauna del Comune di Udine” par cure dal Museu furlan di storie naturâl. A 18, te sale Ajace dal municipi di Udin, a intervegnaran Giancarlo Fracasso dal grop “Nisoria” e l’autôr Roberto Parodi.

[DIASPORE]

Martars ai 2 di Decembar, la Cjamare di cumierç taliane pe Ongjarie organize la Cene di Nadâl par operadôrs e amîs. E tacarà a 20 li dal Institût talian di culture a Budapest (Bródy Sándor utca 8.). Pe organizazion al à colaborât ancje il Fogolâr furlan de capitâl ongjarese (pietro.vacchiano@gmail.com).

[SOCIETÂT]

Il grop “Amnesty International” di Glemone “Gruppo Italia 143, cul Coordenament des associazions culturâls e di volontariât sociâl, al celebre il LX de Declarazion universâl dai derits dal om cuntune serade dedicade a la Bosgne. Miercus ai 3 di Decembar e tacarà a 20.30, li dal Centri parochiâl di Salcons. Intervents di Caterina Quadrio e di Federica Moro; leture di poesis par cure di Jasmina Zivkovi´c e di Predrag Pijunovi´c; presentazion di un apel di “Amnesty International” e rinfresc cun prodots bosgnacs.