[SOCIETÂT]

In spiete de Setemane europeane de zoventût, l’Union e à creât un lûc internet par popolarizâ l’apontament programât dai 2 ai 9 di Novembar. Il fin de iniziative al è: dibati sui obietîts de politichis europeanis a pro de zoventût; valorizâ i programs europeans pai zovins; svilupâ i valôrs dal An europeu dal dialic interculturâl.

[ECONOMIE]

Il Friûl (cun Triest) al passe il 6% dal faturât complessîf talian vuadagnât cu la produzion di prodots cun marchis “Dop” e “Igp”. In Italie si fature in dut 5 miliarts di euros, cuntun gîr di afârs di 7,2 miliarts. Te graduatorie des Regjons, la prime e je l’Emilie-Romagne, la seconde la Lombardie, po al ven il Trentin-Sud Tirol.

[MUSICHE]

A tirin adilunc i concierts in onôr dal composidôr Zuan Batiste Candotti (www.friul.net/dizionario_biografico.php) tal innovâl de sô nassion. L’organist Stefano Barberino si esibissarà domenie ai 2 di Novembar a Colorêt di Montalban (a 18) e lunis ai 3 di Novembar a 20.45, li dal dom di Cividât.

[AMBIENT]

Al nassarà in Carintie il tierç geoparc de Austrie. Al vegnarà realizât te Gailtal e al sarà grant mil chilometris cuadrâts, dal Tirol orientâl a Feistritz. Il centri pai visitadôrs al sarà imbastît a Dellach. Chei altris doi geoparcs austriacs a son a Eisenwurzen, tal Staiar, e a Kamptal, te Austrie Basse.

[SOCIETÂT]

La Buteghe dal mont di Udin ancje chest an ur ufrìs ai siei aventôrs l’oportunitât di regalâ a clients e amîs i pacs di Nadâl juscj e solidâi. Fra lis possibilitâts: geis bio, geis salâts, scjatulis di Nadâl e il gei cuintri la mafie cui prodots de cooperative “Libera Terra”.

[SCUELE]

Trente agns indaûr, il I di Novembar dal 1978, e tacave la prime lezion de Universitât dal Friûl. Tal indoman dal taramot, e je nassude in gracie di une mobilitazion popolâr che mai prime a ’nd jere stade une compagne in dute la storie dal Friûl. Chê lote, culminade te presentazion de propueste di leç d’iniziative popolâr inmaneade dal Comitât pe Universitât furlane e firmade di 125 mil eletôrs, e je contade par fîl e par pont dal so protagonist, Tarcisio Petracco, tal libri “La lotta per l’università friulana”, saltât fûr tal 1998.

[SCUELE]

«Vuê e je une zornade impuartante; vuê la nestre universitât e finìs 30 agns. E je une zornade di riflession e di analise, dulà che s’incrosin passât, presint e avignî», e à dit il retôr Cristiana Compagno intant de comemorazion organizade ai 30 di Otubar e marcade dal indotorament “honoris causa” dal arcivescul Alfredo Battisti. «Ai protagoniscj de nestre storie – e à zontât il retôr – o volìn dâur un ricognossiment fuart e simbolic. O volìn ricognossi il puest che monsignôr Battisti e la Glesie a àn vût par fâ nassi la nestre universitât, ma o volìn ancje ricognossi ce ch’e à fat dute la nestre int e chês 125 mil firmis ch’a permeterin la fondazion de nestre universitât. Za fa 30 agns la int e jere in place par vê la nestre universitât. Vuê la zoventût e je indaûr in place e a protestin par vê un’universitât fuarte e sigure te nestre tiere».

[CINE]

La colaborazion fra Centri volontaris cooperazion pal svilup “Cvcs” e Kinoatelje di Gurize e permetarà l’organizazion de rassegne cinematografiche “Travelling Africa”. Vie pal mês di Novembar, ator pal Friûl orientâl, a saran presentâts i miôr films dal Festival dal cine african, de Asie e de Americhe latine, inmaneât a Milan pe XVIII volte te Vierte stade. Te organizazion e je ingaiade ancje la clape “Ex-Border” (www.exborder.it).

[CORS]

Al tacarà ai 12 di Novembar il laboratori teatrâl par mularie dai 16 ai 29 agns, par cure dal “Css”, teatri stabil regjonâl d’inovazion. Lis lezions a saran proponudis li dal centri civic e li dal teatri Pasolini di Cervignan, ogni miercus a 20. Par inscrizions: 0432 504765.

[POLITICHE]

La zonte regjonâl e à nomenât i siei puartevôs tal consei di ministrazion de Agenzie regjonâl pe lenghe furlane “Arlef”. A saran: Lorenzo Zanon (destinât a deventâ president), Paolo Paron, Simone Bressan, Fabiana Castellarin e Vittorio Zanon.