[CONVIGNIS]

Dai 2 ai 5 di Otubar, il proget “SophiaEuropa” patrocinât de Academie pontificie des siencis al propon a Gurize la convigne internazionâl “Human Beings: philosophical, theological and sientific perspectives”. Par anglês e par francês, si confrontaran studiâts di 15 Paîs dal mont.

[AMBIENT]

“Salam Shalom”, joibe ai 2 di Otubar, al torne a Lavorêt par une convigne in municipi su “Lis scovacis di scartum a risorse”. A 20.45 al rivarà come reladôr Mario Tozzi dal “Cnr” e condutôr televisîf.

[CULTURE]

Al è tacât il program culturâl des “Giornate internazionali di letteratura dedicate a Peter Waterhouse”. Al larà indevant fintremai ai 10 di Otubar, par cure di Associazion biblioteche austriache, “Literaturhaus” di Graz e “Literaturbüro Ostwestfalen-Lippe e V”. Ju apontaments a saran proponûts a Gurize, Duin, Aquilee, Grau, Cuar di Rosacis e Graz. Il program complet si cjatilu su la rêt des rêts.

[CONVIGNIS]

Li dal centri civic dal Borgo Ponte, a Cividât, e je vierte fintremai ai 10 di Otubar la mostre “Primoz Trubar veliki neznami Europejec/un grant europeu di scuvierzi”. Al tradutôr de biblie par sloven a son dedicadis ancje convignis e lezions ai 2, ai 6 e ai 10 di Otubar, a Cividât e a Sant Pieri dai Sclavons.

[LIBRIS]

In spiete de sô fieste liturgjiche, ch’e cole ai 5 di Otubar, la Glesie furlane e onore il sant pre’ Luîs Scrosoppi, cu la presentazion di altris doi libris dedicâts al so slas spirtuâl. Joibe ai 2 di Otubar, a 18 li dal centri culturâl “Paolin di Aquilee” di Udin (in borc di Trep) a saran proferîts: “Padre Luigi Scrosoppi: quando l’umiltà si fa gloria” e “Servo fratello e padre: padre Luigi Scrosoppi” di Cristina Siccardi. A intervegnin ancje l’arcivescul Pieri Brollo e il plevan di Tarcint Duilio Corgnali.

[CINE]

Joibe ai 2 di Otubar, al ven proietât in anteprime il film di Giovanni Ziberna “La terra nel sangue”, produsût di “Sine Sole Cinéma” (www.sinesolecinema.com). L’apontament al è programât li dal “Kinemax” di Gurize, cun proiezions a 17.30, 20. e 22.15.

[NAZIONS]

Te suage di “Vilenica 2008”, il festival internazionâl de culture de Europe centrâl e orientâl di Štanjel, joibe ai 2 di Otubar, li dai uficis de Associazion dai scritôrs slovens di Lubiane, si fasarà un dibatiment su “Il dialet sloven e la produzion leterarie a Resie in dì di vuê”. Matej Šekli al fasarà di moderatôr dai intervents di Roberto Dapit, di Milko Mati?etov, di Luigia Negro, di Silvana Paletti e di Han Steenwijk.

[MOSTRIS]

Fint ai 2 di Novembar, li dal centri parochiâl di Landri (Pulfar), e je vierte la mostre cu lis fotografiis di pre’ Giovanni Guion (Biacis, 1877-Valbrune, 1966). Curade dal centri “Nediza”, de clape “Pre’ Blanchini” e de cooperative “Most”, e propon int e paîs des valadis dal Nadison. Oraris: sabide, 15-18; domenie 10-12 / 15-18.

[MOSTRIS]

Li dal Palaç vinizian di Malburghet, e je vierte insin ai 31 di Otubar la mostre “Michele Gortani. La sua vita attraverso le fotografie e i documenti”, par cure di Amanda Talotti e di Beppina Rainis. Oraris: 10.30-12.30 / 15-18 (gjavât lunis).

[MUSICHE]

Ai 27 di Setembar e je stade screade in vie Puccini 141 di Fontanefrede la gnove struture “Life Music”. Il centri al vierzarà ducj i dîs de setemane, di 10 a 24, ufrint 7 salis pes provis, un sistem di regjistrazion, un “Show Room” cun palc e un auditorium cun 80 puescj. Li e funzionarà ancje la scuele “Music Lab”. Curadôrs de struture a son Angela Salvador e Marco Galliazzo.