[ECONOMIE]

La pluipart dai problems di transpuart di int e di marcjanziis passant fra Friûl, Slovenie e Carintie a podaressin jessi disberdeâts cuntun plan organic pal miorament e pal potenziament des infrastruturis feroviariis ch’a esistin za in zornade di vuê, cence liniis gnovis e cjarononis di alte velocitât/capacitât. A son lis conclusions dal studi dal “Wwf” che si pues lei su la rêt des rêts a la direzion: www.wwf.it/client/ricerca.aspx?root=17579&content=1 (cuntun struc in: www.wwf.it/UserFiles/File).

[NAZIONS]

I Ladins dolomitans pal mont a àn un puartâl internet che ju coleghe. Il sît “Ladins tl monn” al è stât presentât ai 12 di Avost a Bolzan. Il servizi informatic al smire di colegâ in mût speciâl i ladins dolomitans che si son sindilâts dal Sud Tirol, dal Trentin e dal Cjadovri.

[SALÛT]

L’associazion “Progetto autismo Fvg”, regalant une sessantine di libris su la malatie, e à permetût di screâ une Sezion autisim, li de biblioteche di Felet.

[LIBRIS]

Al è saltât fûr chest an il VII libri scrit di Guido Candido di Nart. E je une ricolte di storiis te varietât di Rigulât, dulà che l’autôr al è nassût tal 1938. Lis “Canaiàdos/Bambinate” di Candido a son stadis stampadis dal Comun cjargnel, cul jutori de Provincie. Fra chei altris siei libris: “Rigulât de bièlo ô” (1990), “Toponomastico e onomastico riguladoto (antîgo melodîo di nons)” (2004) e “Cjargno di iêr (Carnia di ieri)” (2005).

[SCUELE]

Di miercus 3 a joibe ai 11 di Setembar, li de Universitât furlane ai Riçs di Udin, si fâs lis provis di amission a la Facultât di Medisine. Pai 415 puescj a disposizion (80 tal cors a cicli unic di Medisine e chirurgjie e 335 tai 7 cors di laureade trienâl) a son stadis presentadis mil e 685 domandis. A restaran viertis fintremai ai 5 di Setembar lis preinscrizions pai cors interfacultât in Siencis motoriis e in Biotecnologjiis.

[NAZIONS]

Intant de XII edizion di “Festivaletteratura” di Mantue, dai 3 ai 7 di Setembar, a son proviodûts ancje incuintris cu lis culturis minoritariis. Il Centri di Florence pai popui menaçâts (www.popoliminacciati.org popoli-minacciati@ines.org) al segnale la presince di Boris Pahor, di Joseph Zoderer, di Bernardo Atxaga e di Flavio Soriga. Il program complet si cjatilu su la rêt des rêts.

[CULTURE]

Lis ativitâts dal Grop astronomic Polse di Cougnes, ch’al opere in Cjargne te suage dal centri ecumenic creât daprûf de plêf di San Pieri di Zui, a son proferidis tal lûc internet: http://astro.lapolse.org. Par informazions: 333 7972804 - 393 8210823.

[NAZIONS]

Il rosean al sarà protagonist, sabide ai 6 di Setembar a Štanjel, dal festival internazionâl de culture de Europe centrâl e orientâl “Vilenica”, ch’al è rivât a la XXIII edizion. La rassegne e je programade dai 3 ai 7 di Setembar. L’autôr premiât al sarà il polonês Andrzej Stasiuk. La culture roseane, sabide a misdì, e sarà rapresentade di Matej Šekli e di Roberto Dapit, di Silvana Paletti e di Renato Quaglia. Al sarà presint ancje il grop folkloristic Val Resie. La television slovene, po, e proponarà il documentari “Ta rožina dolina”.

[NAZIONS]

Lis clapis indianistis talianis a son congregadis intal coordenament “Il Cerchio”. Il stes non al è ancje chel de riviste argagn informatîf de socie. Tal numar XIII, prin dal 2008, si scrîf in gjenerâl di dutis lis cuistions indigjins, frontant ancje lis liendis di Inuit, di Maori e di Mapuche.

[LIBRIS]

Si à timp ancjemò fint ai 9 di Setembar par visitâ, a Gurize, la rassegne “StampAntica 2008”, inmaneade de “Libreria editrice goriziana” in vie Verdi 67. Oraris: di martars fin sabide, 8.30-12.30 / 15.30-19.30.