[NAZIONS]

Te viere capitâl de Corsiche Corti, dai 2 ai 3 di Avost, e torne la manifestazion internazionâl dai moviments separatiscj di dut il mont. A lis “Ghjiurnate internaziunale” a cjapin part delegazions politichis di Corsiche, Sardigne, Euzkadi e dai kanak de Gnove Caledonie.

[MUSICHE]

Par fiestezâ 10 agns di vite, l’institût “Guido Alberto Fano” di Spilimberc al propon la rassegne musicâl “eVenti 2008”. Apontaments il prin dì di Avost a 21 cui “Cameristi del Gran Teatro la Fenice” di Vignesie; ai 2 cui insegnants dai cors internazionâi di perfezionament musicâl e cul cuintet “Spilimbrass”; ai 3 a 17.30 cu la orchestre dai flâts direzûts di Simone Comisso.

[MUSICHE]

A restin a Spilimberc insin ai 3 di Avost i 140 musiciscj ch’a son notâts ai cors internazionâi di perfezionament musicâl par cure dal institût “Guido Alberto Fano”. La sede dai cors a son lis scuelis “G. B. Cavedalis” e “B. Partenio”.

[AMBIENT]

Al tire adilunc, dedicât al alpinist gurizan Julius Kugy tal CL innovâl de nassion (www.friul.net/dizionario_biografico.php), il “Mountain festival” par cure dal Cumon e dal Consorzi di promozion turistich de Valcjanâl. Cors, escursions e proiezions a laran indevant fintremai ai 5 di Setembar.

[CINE]

Il documentari gurizan sul bulisim “Bulli si nasce”, realizât intant dal proget provinciâl “Tre metri sopra... percorsi di pace attraverso il cinema” ch’al à ingaiât scuelis elementârs e superiôrs dal Friûl orientâl, al è stât premiât intant dal “Giffoni film festival”. Il ricognossiment al ven dopo dal prin premi cjapât te XIII edizion dal “Premio Massimo Troisi”.

[SOCIETÂT]

Dal I ai 3 di Avost, la Mont di Anduins e je animade de fieste anuâl par cure de Pro loco Val d’Arzìn. I apontaments ricreatîfs a preparin l’avôt di martars ai 5 di Avost, cu la prucission su la “clapadoria” e la messe grande te gleseute de “Madona da la Nìaf”, a 10.30. Sabide ai 2 di Avost conciert dai Arbe Garbe a 21. Sabide e domenie, torneu di balon “Memorial Daniele Bellini”.

[MOSTRIS]

Sabide e domenie di 17 a 20, fintremai ai 17 di Avost, e je vierte la mostre personâl antologiche di Daniele Bianchi “Rooms: oparis 2006-2007”. Le à imbastide il centri d’art “Cerido” di Flumisel, te sô abitance di borc Sant Antoni 48.

[SOCIETÂT]

Dal I ai 3 di Avost e torne Fieste de Comunitât di Maran. Li de “Vecia pescaria” a saran proponûts i plats de cusine tradizionâl maranese e musiche. Il prin apontament al colarà a 18 di vinars I di Avost, cu “La Festa della Mazzancolla” e cu la presentazion dal libri “Poesia con ironia” di Giuseppe Ghin/Pino delle Are. Sabide i chioscs a vierzaran a 18; domenie a 11 e a 19. La manifestazion e je inmaneade de Comunitât di Maran, ch’e unìs i maranês ch’a esercitin il derit coletîf di propietât sul patrimoni lagunâr.

[GLESIE FURLANE]

Domenie ai 3 di Avost a 18 i arcivescui di Udin Pieri Brollo e Alfredo Battisti e il vescul di Forlì e di Bertinoro Lino Pizzi a cjantaran messe te plêf di san Stiefin di Cesclans e a tornaran a dedicâ l’antighe glesie tornade a fâ sù daspò dal taramot. La liturgjie e sarà compagne des cantoriis di Damâr e di Cjavaç e dal grop di otons de Basse. A 20, li dal centri Caritas e sarà screade une mostre fotografiche su la plêf, ch’e restarà vierte fintremai ai 28 di Setembar (domenie, 10-12.30 / 17-19; vinars e sabide, 17-19).

[LIBRIS]

Il Comun di San Zorç, l’associazion “Ad Undecimum” e il circul ”Nojâr” a presentin il libri “Ritorno a Porto Nogaro storia – ricordi – immagini” di Enzo Paravano. Convigne sabide ai 2 di Avost, a 20.45 li de canoniche di Noiâr.