[CULTURE]

Il “Grup culturâl furlan scampanotadôrs” di Mosse, lunis ai 2 di Jugn, al organize la fieste “Campane tra la gente”. La manifestazion e tacarà a 9 li dal Centri civic, cu la IV rassegne internazionâl dai scampanotadôrs. Di chê strade si fasarà il zimulament fra i scampanotadôrs di Mosse e i “campanari” bolognês. La fieste e larà indevant dutaldì.

[DIASPORE]

Lunis ai 2 di Jugn a tachin lis pontadis dal program radiofonic “Sgarfefurlans”, indulà che Loris Vescovo al proponarà passe 40 intervistis cui furlans de diaspore logâts in Australie, Gnove Zelande, Tailandie e Chine. La transmission (ogni lunis a 10.30 su radio “Onde furlane” par 8 voltis) e je la conclusion di un proget de Comunitât colinâr. Si pues scoltâ lis intervistis ancje su la rêt: www.friulicollinare.it e www.friuli.it; oben si pues leilis tal “blog” www.travelpod/travel-blog/sgarfefurlans.

[SOCIETÂT]

Tal ambit distretuâl di Tisane, al è stât screât il servizi di transpuart a clamade par viei e personis no autosuficientis. Il servizi al funzione in forme sperimentâl tai dîs di vore (sabide comprindude), di 7 a 19.30. Par favorî la mobilitât solidâl a colaborin public, privât e associazionisim.

[NAZIONS]

La Sassonie e à un Ministerpräsident gnûf, parcè che chel di prin al à scugnût dimetisi par un scandul. Stanislaw Tillich, il sorestant gnûf, nol è dome il prin president che nol sedi “impuartât” dal Ovest, ma sore il dut al è un rapresentant de comunitât di lenghe sorabiche, che e je a stâ sui confins orientâi dal “Land”.

[CULTURE]

Te suaze dal progjet “AssociaGiovani2”, la zoventût di Pesariis e à prontât une tabele ch’e conte la storie de “Pasche di sanc” dal 1945 cuant che i cosacs prime a assediarin e po a brusarin il ripâr De Gasperi indulà che si jerin platâts un scjap di partesans. La tabele e je stade intitolade “Memoria civile in ValPesarina”.

[MOSTRIS]

E restarà vierte dai 3 ai 10 di Jugn la mostre “La piture e la sculture di Olimpio Cari. La memorie e l’insium di libertât dai singars”. Le proponin la Biblioteche statâl di Gurize e l’Institût pai incuintri culturâi mitteleuropeus. Oraris: di lunis fin vinars, 10.30-18.30; sabide 10.30-13.30.

[LIBRIS]

Martars ai 3 di Jugn, a 18 te sale Ajace dal palaç dal Cumon di Udin, Cristina Bianchetti de Universitât di Turin e presentarà il libri di Paolo Nicoloso “Mussolini architetto. Propaganda e paesaggio urbano nell’Italia fascista”.

[CONCORS]

E je partide la seconde edizion dal premi leterari “Lyrike”, inmaneât dal Comun di Prissinins. Il zurì – Giacomo Vit, Franca Mainardis, Fabio Franzin e Marco Marangoni – al tamesarà lis poesiis par furlan e par talian ch’a rivaran dentri di sabide ai 12 di Lui li dal municipi (place Roma 22 - 0431 58038 - fax 0431 589295). La premiazion e sarà fate ai 9 di Avost.

[LIBRIS]

La Pro Tarcento e à decidût di onorâ Chino Ermacora (Tarcint, 1894-Udin, 1957; www.friul.net/dizionario_biografico.php) cu la publicazion dal volum “Il Friuli di Chino Ermacora”. Te opare, curade di Gianfranco Ellero, e je proferide un’antologie di scrits dal inteletuâl fondadôr di “Friuli nel Mondo” e de riviste “La Panarie”.

[CORS]

Dai 17 ai 31 di Avost, lis universitâts di Clanfurt (Carintie), di Maribor e dal Litorâl (Slovenie), dal Friûl e di Triest a organizin a Pleç/Bovec i tradizionâi cors universitaris dal Istât. Chest an a saran dedicâts a la agricolture di Alp-Adrie. Per informazions: Andrea Wernig, 0463 2700 9237 - fax 0463 2700 9293.