[POLITICHE]

“Modifica dei confini regionali e specialità interregionale”: sun cheste cuistion il Moviment Provincie Pordenon-Puart e i Comitâts “Pro Friûl” dal Mandament di Puart a organizin un confront politic cui candidâts venits. La convigne e tacarà a 17.30 li de viere sale consiliâr di Tei, miercus ai 2 di Avrîl. A cjacararan Roberto Strumendo, president onorari dal moviment, il sindic di Tei Sandro Mestriner e i politics Paolo Scarpa Bonazza Buora, Rodolfo Giuliano Viola, Daniele Stival, Pietrangelo Pettenò, Ugo Bergamo, Gianfranco Pavan, Fabrizio Comencini.

[LIBRIS]

Miercus ai 2 di Avrîl a 20.30, te sale Paulin di Aquilee in Borc di Trep a Udin, presentazion dal libri “Gesù di Nazaret” di Joseph Ratzinger/Benedet XVI. Intervents di Sergio Belardinelli (“Gesù di Nazaret, la parola che rompe il silenzio di Dio”), di mons. Marino Qualizza (“La storia umana luogo della comunione con Dio”) e di Raimondo Strassoldo (“La famiglia, la comunità e il popolo nella vita di Gesù”).

[CINE]

La X edizion dal festival dal cine asiatic “Far East Film”, programade a Udin dai 18 ai 26 di Avrîl, il Centri espressions cinematografichis che le organize al à nunziât il “trailer” che il regissêr di Hong Kong Pang Ho-cheung al à volût dedicâi a la rassegne furlane. Il piçul cap d’opare (inlustrât tal “blog” www.fareastfilmtheblog.com) al sarà proietât pal prin viaç intant de serade inaugurâl dai 18 di Avrîl.

[MUSICHE]

L’associazion culturâl “el tomât” di Buje, miercus ai 2 di Avrîl a 20.30 li de ostarie “Parùs” di Soremont, e organize le convigne “Spietant la fieste de Patrie dal Friûl 10 agns di Musiche furlane fuarte”. Reladôr Paolo Cantarutti di Radio onde furlane.

[ECONOMIE]

I contignûts e lis oportunitâts dal Program di svilup rurâl 2007-2013 a saran presentâts intune schirie di convignis inmaneadis in plene campagne eletorâl de direzion regjonâl da lis risorsis agriculis. Ju apontaments a colaran vie pal mês di Avrîl a Udin ai 3 (a 14, li de Regjon in vie Sabbadini 31), a Damâr ai 8 (a 14, li di Agemont), a Pordenon ai 10 (a 20, li de Regjon in vie Rome), a Palme ai 17 (a 20, li dal auditorium San Marc) e a Gurize ai 29 (a 20, li dal auditorium de culture furlane).

[GLESIE FURLANE]

Li de mariglesie di Plêf di Cjadovri, dai 21 di Març, e art la lum puartade di Aquilee par memoreâ i leams di dutis lis Glesiis cjadorinis cu la Glesie dai sants Ramacul e Fortunât. Chest an, ch’al cole il DCCC innovâl de autonomie gleseastiche da lis Plêfs di Cortine, di San Vît, di Valle di Cjadovri, di Domegge, di Vigo di Cjadovri, di Auronzo e di San Stiefin, al restarà marcât dal piligrinaç di 400 cristians cjadorins li de basiliche patriarcjâl acuileiese. Il ferâl impiât in Aquilee e benedît dai vescui di Gurize Dino De Antoni e di Udin Pieri Brollo al viazarà po par dut il Cjadovri fintremai ai 13 di Avrîl.

[MOSTRIS]

Tal innovâl dal congrès constitutîf dal “Cantiere navale triestino” dai fradis Cosulich, Monfalcon al celebre il prin centenari dai siei cantîrs. Di chê strade, joibe ai 3 di Avrîl, a 17.30 li dal “Palazzetto Veneto”, e sarà screade la mostre “I Cosulich. Una storia per immagini”. Subit dopo, li de Galarie comunâl d’art, a vierzaran altris dôs mostris sul centenari: chê dedicade a Vito Timmel e al teatri di Panzan e che di Tranquillo Marangoni “Un artista in cantiere. I oraris, fintremai ai 15 di Jugn, a son: di martars fin vinars, 16-19; sabide e dîs di fieste, 10-13 / 16-19.

[TEATRI]

La filodramatiche “Sot la Nape” di Lavorêt, cul Cumon di Vildivar e cu la corâl “Euterpe” di Sedean, e fiesteze l’innovâl de Patrie dal Friûl cun dôs rapresentazions dedicadis a la storie e a la culture, joibe ai 3 di Avrîl li de gleseute di sante Marize di Vildivar e sabide ai 5 di Avrîl li de glesie di sante Redengonda di Madrîs. Ducj i doi i spetacui a tacaran a 21.

[LIBRIS]

Joibe ai 3 di Avrîl, a 20.30 te sale dal consei comunâl di Lestize, presentazion de publicazion “Las Rives”, contribûts pe storie dal teritori dal Cumon di Lestize, rincurâts de Associazion “Las Rives”. Ospit de serade il professôr Giacomo Viola.

[TEATRI]

L’atore Tiziana Bagatella, joibe ai 3 di Avrîl, e propon un “recital” poetic cun tescj di Pieri Pauli Pasolini (www.friul.net/dizionario_biografico.php), li dal Fogolâr di Rome, in vie Aldovrandi 16, a lis 18.30.