[CULTURE]

Il 2008 al è stât proclamât “An europeu dal dialic interculturâl” e al varà par argument di riflession il sproc “Insiemit te diviersitât”. Pal comissari de culture Ján Figel’ al varà di zovâ par miorâ il dialic e i rapuarts fra lis culturis. Par informazions: http://europa.eu/50/news/article/071221_it.htm.

[NAZIONS]

Par prudelâ la propueste di ricognossi la Lenga d’Òc “patrimòni mondial de l'umanitat”, la “Chambra d’Òc” e propon un progjet ch’al rindarà visibil il grant spazi lenghistic e culturâl da l’Ocitanie, ch’al va de Catalogne a l’Italie (12 valadis alpinis in Piemont, une piçule aree in Ligurie, il comun di Guardia Piemontese in Calabrie), passant pa la France. Dai 30 di Avost ai 7 di Novembar, fra Vinadio (Valle Stura) e Vielha (Val d’Aran) al sarà proponût un percors a pît di mil e 300 chilometris e 70 dîs di viaç.

[ECONOMIE]

Ancje i esperts furlans a an cjapât part a la convigne ch’e à tematizât in Italie la “sindrome dal spopolament dai boçs des âfs”, proponint une metodologie multidissiplinâr par cognossi lis causis e par elaborâ strategiis di cure. La riunion e je stade fate a Rome ai 29 di Genâr. Lis contribuzions furlanis a son stadis puartadis di Pierantonio Belletti de Universitât furlane e president dal Consorzi dai apicoltôrs de provincie di Gurize e di Moreno Greatti, responsabil dal Laboratori apistic regionâl e tecnic sperimentadôr dal Ateneu furlan.

[MUSICHE]

La “Philharmonische Camerata Berlin”, al ven a stâi i arcs dai “Berliner Philharmoniker”, vinars I di Fevrâr, a proponin a Mafalcon, li dal teatri comunâl, musichis di Stravinskij, di Beethoven, di Snitke e di Sostakovic. Il conciert al tacarà a lis 20.45.

[CINE]

Sabide ai 2 di Fevrâr, Franco Battiato al è a Monfalcon par incuintrâsi cul public ch’al viodarà il so cine “Niente è come sembra”. La proiezion e tacarà a lis 21 li dal teatri comunâl in Cors dal popul.

[MUSICHE]

L’Anbima regjonâl, ch’e ten dongje lis bandis autonimis dal Friûl e di Triest, e organize un “stage” par mestris di bandis e di orchestris di flâts, sabide 2 e domenie ai 3 di Fevrâr, a Lignan (li de “Getur”). Lis lezions a saran proponudis dal composidôr Stephen Melillo. A lis 17 di domenie, la convigne e finissarà cuntun conciert de bande dai zovins da l’Anbima, direzude dai mestris Melillo e Marco Somadossi.

[TEATRI]

La companie “handydays” dal centri “Punto Zero” e presente li dal centri civic di San Vît dal Tiliment il spetacul teatrâl “Il punto d'incontro. Commedia del Teatro delle Diversità”. L’apontament al tache a lis 16 di sabide ai 2 di Fevrâr.

[MOSTRIS]

Dai 2 ai 10 di Fevrâr, li di vile Mauroner di Tissan, si podarà rimirâ la mostre “Fotogrammi, pitture, scritture”, vogladis di îr e di vuê sul mût di vivi tun teritori. La rassegne e vûl presentâ il teritori ch’al à insipirât il documentari di Ferdinando Birri “Elegia friulana” (www.friul.net/dizionario_biografico.php). Si podarà visitâ la mostre sabide e domenie, 10.30-12.30 / 14.30-18.30; di lunis fin vinars, 15-18. A l’inaugurazion di sabide 2, a lis 11.30, al sarà presint ancje il regissêr argentin.

[MOSTRIS]

La mostre “Stifter x 3. Une famee di artiscj” e restarà vierte a Triest fintremai ai 11 di Avrîl. E je imbastide li de biblioteche statâl di Triest, cul orari: lunis-vinars, 8.30-18.30; sabide, 8.30-13.30.

[CULTURE]

La corâl “Alpe Adria” di Trep e à prontât un lunari pal 2008, proferint fotografiis incoloridis, informazions utils (oraris des corieris e dai servizis publics), ma ancje une biele rieste di personaçs des vilis dal comun: Geanut, Geà, Vendoi, borc Salaris, Trep Piçul, Cjasâi Calandrin, Cjarvà e Trep Grant. I “grancj” dal paîs sielzûts a son: Luciano Fabro, Pietro Menis, Luigi Fantino, Umberto Danelutti, Marisa Plos, Luciano Spizzo, Pio Menis e la sô gjernazie, Mariangela Pezzetta, Ugo Spizzo, Edi Fasiolo, Luigi Moretti e Roberto Ponta.