[CONVIGNIS]

Ai 2 e ai 3 di Genâr, li dal “Indira Gandhi national centre for arts” di Delhi, in Indie, la cuistion indigjine e ven frontade te convigne internazionâl “Indigenous peoples in the post-colonial world” (www.bhasharesearch.org.in). La gnove e je segnalade dal Centri di documentazion dai popui menaçâts di Florence.

[POLITICHE]

Pal president de Regjon Friûl-V. J. Riccardo Illy la cuistion dai Comuns furlans sot dal Venit ch’a bramin la riunificazion ministrative cu la Patrie e podarès jessi disbratade cuntun compatât «serio e vantaggioso». Ma la propueste no je stade cjapade in considerazion dal president Venit, Giancarlo Galan. Illy lu à pandût intune interviste cui setemanâi diocesans dal Friûl e di Triest. «A Galan – al à motivât il president regjonâl – ho detto che Sappada e tutti i comuni del Veneto che hanno parte del Friuli storico, compresi tra il Livenza e il Tagliamento, se chiederanno di aderire al Friuli, la Regione farebbe bene a dare il suo assenso».

[CINE]

Il grant fotograf di cine Pierluigi Praturlon (Pasian di Pordenon, 1924- Rome, 1999; www.friul.net/dizionario_biografico.php) al ven onorât cuntune mostre a Buenos Aires, inmaneade li de Societât furlane fintremai ai 20 di Genâr. Le àn imbastide “Cinemazero” e l’“Efasce”, sielgint fra lis oparis tignudis cont dal archîf fotografic de clape cinematografiche pordenonese.

[LIBRIS]

La storie di Cormòns, tant in prose che in poesie, e je contade ancje te setime edizion dal volum “Orizzonti friulani”, par cure di Eraldo Sgubin e dai “Amis da mont Quarine”.

[SCUELE]

Vie pal 2007, a an mudât dean 5 facultâts dal Ateneu furlan. I gnûfs sorestants a guidaran lis facultâts fintremai tal 2010. A son: Antonella Riem Natale a Lenghis e leteraduris forestis; Massimo Bazzocchi a Medisine; Bruno Stefanon a Medisine vetrinarie; Danilo Castellano a Jurisprudence; e Carlo Tasso a Siencis matematichis, fisichis e naturâls.

[POLITICHE]

Il president dal consei regjonâl, Alessandro Tesini, “Ds” furlan, al à imbastît su la rêt il so “blog” dulà ch’al comente in mût personâl e no uficiâl i fats da la politiche e de vite publiche. La direzion e je: http://alessandrotesini.it. Fra lis cuistions plui cjaldis, chê dal gnûf statût regjonâl.

[SOCIETÂT]

Il prin di Genâr al è muart te sô cjase di Cormòns “Vanni” Giovanni Padoan, il comissari politic de division “Garibaldi-Natisone”, ch’e je stade une des primis e la plui grande formazion de Resistence furlane e duncje taliane. Padoan, clas 1909, emigrant in France e perseguitât dal Fassisim, al è stât un protagonist de vuere di liberazion in Friûl e ancje de riflession storiche e culturâl sun chei acjadiments tant decisîfs e dramatics. Om libar e sclet, nol è stât capît ni dai siei compagns ni dai aversaris politics. La sô reditât a restin i siei libris (“Abbiamo lottato insieme. Partigiani italiani e sloveni al confine orientale”; “Un’epopea partigiana alla frontiera fra due mondi”; “Porzûs strumentalizzazione e realtà storica”…) e l’azion ferbinte pe riconciliazion te veretât fra partesans ros e verts.

[SOCIETÂT]

Lis esecuiis dal comissari politic de division “Garibaldi-Natisone”, Giovanni Padoan “Vanni”, muart il I di Genâr a 98 agns, a saran celebradis li dal municipi di Cormòns, joibe ai 3 di Genâr a lis 14.30. Fuît in Cecoslovachie e in Rumenie daspò dal procès pal maçalizi di Purçûs, al jere tornât in Friûl daspò da l’amnistie, marcant simpri la sô nocence e pandint la sô version de tragedie tal libri “Porzûs, strumentalizzazione e realtà storica”. Ai 23 di Avost dal 2001, cun pre’ Redento Bello “Don Candido”, al à firmât la storiche declarazion a pro de riconciliazion te veretât fra lis dôs animis de resistence furlane.

[INFORMAZION]

“Novi Glas”, il setemanâl catolic sloven des Glesiis di Gurize e di Triest, al à prontât la sô version informatiche. Si le cjatarà, cun gnovis par anglês, par sloven e par talian, a la direzion www.noviglas.eu. Il gnûf lûc internet al è stât presentât dal diretôr Jurij Paljk e dal president de cooperative editore “Goriska Mohorjeva druzba”, Damjan Paulin.

[MUSICHE]

L’opare comiche intun at di Mozart “Bastiano e Bastiana” e ven proponude joibe ai 3 di Genâr li dal auditorium di Cime Sapade/Z’Plodn, a lis 21. La version ritmiche par talian di Elisabetta Oddone e di Rosa Suzzi e sarà recitade di Ilaria Zanetti, di Francesco Paccorini e di Riccardo Ambrosi. Mestri conciertadôr al pianoforte, Elia Macrì. Si jentre sore nuie.