[POLITICHE]

Il comitât ch’al propon la riunificazion ministrative dal Cumom di Midune cul Friûl i à presentât al sindic Vincenzo Berra la domande par imbastî il referendum pal mudament di Regjon. Dal 1923 incà, la vile furlane su la Livence e je stade stralozade sot de provincie di Trevîs, ma e continue a jessi une purizion de Glesie di Concuardie cu lis sôs vilis di Briscje, di Lorenzaghe furlane, di Malgher e di Muris di Midune. La popolazion e je di 2 mil e 900 animis. Tal comitât a operin la presidente Marica Fantuz e i conseîrs Laura Vendramini, Roberta Pesce, Stefano Zoia, Adriano Padovan e Armando Sartori.

[CONVIGNIS]

La Librarie Editrice Goriziana e organize une convigne su “L’Italie fra politiche e cuintripolitiche” cul zornalist Marco Travaglio. Il scritôr talian al cjacararà, vinars ai 2 di Novembar a lis 21, li dal auditorium de culture furlane in vie Rome.

[MUSICHE]

“Via dei Canpi” (peraulis e musiche di Roberto Bonini, interprits Lara Cernic e Ada Fachin); “La Mariarosa” (peraulis di Michela Glavich Devetta e musiche di Silvia Pierotti, interprits Quei de Vermean - Starsi Ensemble Quartet, cun Stelio Brumat, Boris Cernic, Alberto Loro e Giorgio Rorato direzûts di Silvia Pierotti); e “Un istant de puro infinit” (peraulis, musiche e interpretazion di Nahàni Liviero) a son lis cjantis ch’a an vinçût l’edizion 2007 dal “Cantafestival de la Bisiacarìa”, celebrât a Mafalcon, par cure de Pro loco, ai 27 di Otubar.

[MUSICHE]

La Pro loco di Mafalcon, cul jutori dal Comun e dai comitâts des borgadis, e propon l’apontament itinerant “Castagne, ribolla, musica e poesia”. Ju apontaments, da lis 16 a lis 20, a colaran ai 2 (Aris San Polo), ai 9 (Largo Isonzo), ai 16 (Panzan), ai 21 (centri) e ai 29 Novembar (Vie Romane).

[SOCIETÂT]

La clape “Concordia et pax” di Gurize e di Nova Gorica, sabide ai 3 di Novembar, e torne a proponi la celebrazion “Trois di memorie e di riconciliazion / Poti spomina in sprave”. A lis 14.30, l’apontament al sarà a Temnica (Rence), in Slovenie; a lis 16 devant dal monument a la resistence di Panzan di Mafalcon, cun ricuarts storics, testemoneancis e preieris. La pâs – a disin ju organizadôrs – e nas cuant che si cîr la justizie, ma e je inlidrisade tal perdon e te riconciliazion.

[CINE]

Dai 3 ai 11 di Novembar, al torne il Festival dal cine sudmerecan di Triest, rivât a la XXII edizion. Li dal teatri Miela a saran proponûts 160 titui, 15 cines in concors, rassegnis e documentaris. Diretôr artistic al è Rodrigo Diaz.

[MOSTRIS]

Si à timp dome fin sabide 3 e domenie 4 di Novembar, da lis 16 a lis 20, par visitâ la mostre dal fotograf Giuseppe Assirelli (http://assirelli.splinder.com), li dal “Cerido” di Flumisel, in borc Sant Antoni.

[TEATRI]

Sabide ai 3 di Novembar, li dal auditorium Piccini di Buri, il “TeatroSpesso” al propon l’opare di Laurin Zuan Nardin “Il titul provisori”.

[CONVIGNIS]

Il professôr Bruno Londero, sabide ai 3 di Novembar, al propon une relazion su “Carducci in Friûl”, a lis 16, li de Biblioteche Guarneriane di San Denêl.

[CONVIGNIS]

Nadia Carestiato dal Dipartiment di geografie da l’Universitât di Padue, domenie ai 4 di Novembar, a lis 15 li de ostarie “All’ancona” di Salârs di Ravasclêt, e proponarà une relazion su la cuistion dal paisaç come ben comun, “fra gnovis oportunitâts e sensibilitâts antighis”. La convigne e siere la mostre fotografiche “10 Cartoline dalla Valcalda. Il paesaggio nelle cartoline illustrate del primo Novecento”, imbastide de Pro loco tal ambient public par dut l’Istât.