[GLESIE FURLANE]

La Glesie di Concuardie-Pordenon, dal I ai 5 di Otubar e celebre la VI Setemane sociâl diocesane. Lis convignis (li de Fiere di Pordenon, a lis 20.30) a saran 3: lunis I “Partecipazion e responsabilitât”; miercus 3 “Justizie e biel acet”; viars 5 “Consums, ambient e sobrietât”.

[SOCIETÂT]

L’Agenzie informative de Comission internazionâl pe protezion des Alps “alpMedia” e ricuarde i 6 muarts slovens, copâts des montanis dal mês di Setembar. Lis zonis plui colpidis chês di Železniki e dal parc nazionâl dal Triglav, su lis Alps Juliis (http://24ur.com/bin/article.php?article_id=3105845).

[SOCIETÂT]

Associazion tutele salût mentâl, Comun di Brugnere e Ambit distretuâl Ovest 6.1 a organizin un cors di formazion pai “Amministratori di sostegno”. A saran proponudis 7 riunions li dal municipi di Brugnere, tacant dal I di Otubar. Par informazions: 0434 21286 - 333 4991392 - 333 4379461.

[LIBRIS]

Il X innovâl de muart di Felice Vit al è stât memoreât dai siei amîs cu la publicazion dal libri “Felix, Felice Vit. Le sue poesie nel friulano di Prodolone”. L’opare le à curade Mario Trevian. Par domandâ il libri si pues telefonâ al numar: 0434 81864.

[NAZIONS]

Il comitât su lis minorancis lenghistichis talianis dal ministeri pai Bens culturâl al à publicât un studi su “Il mare e le etnie in Italia tra lingua e letteratura. I popoli che arrivano dal mare”. La realtât furlane e je rapresentade di Pieri Pauli Pasolini. Curadôr de ricercje al è Pierfranco Bruni.

[NAZIONS]

Ai 3 di Otubar, la Gjermanie e fiesteze il XVII innovâl de riunificazion todescje. Chest an lis fiestis uficiâls a saran sul mâr Baltic, a Schwerin, capitâl dal Meclemburc-Pomeranie, dai 2 ai 3 di Otubar.

[GLESIE FURLANE]

Ai 2 di Otubar a son 100 agn che lis muiniis francescanis missionaris dal cûr di Jesù a operin a Udin. A rivarin tal 1907 par viergi il lôr covent di vie Ronchi 29, dulà che in zornade di vuê ur dan il biel acet a un troput di studentis da l’Universitât furlane. La lôr congregazion e je nassude a Glemone ai 1861.

[MOSTRIS]

Fintremai ai 4 di Novembar, la Galarie “Sagittaria” di Pordenon e propon la mostre des oparis grafichis di Virgilio Tramontin (1908-2002). Si podarà rimirâle seont i oraris: 16-19.30 tai dîs di vore; 10.30-12.30 / 16-19.30 dîs di fieste.

[SOCIETÂT]

L’Universitât e il Friûl a an un “Centri interdipartimentâl di ricercje su la pâs”. Al è stât screât di chê strade de “Zornade mondiâl de noviolence” ai 2 di Otubar. Pe scree a son rivâts a Udin Johan Galtung, Ekkehart Krippendorff, Giuliano Pontara e Rocco Altieri. Il Centri universitari si propon di studiâ lis condizions sociâls, economichis, tecnichis e sientifichis, lenghistichis e culturâls pe realizazion di une coabitazion pacifiche fra i popui. Diretôr al è il professôr Luigi Reitani; secretarie Ottavia Zanzotti.

[LIBRIS]

Miercus ai 3 di Otubar, il Centri interdipartimentâl di ricercje su la pâs da l’Universitât furlane e la Biblioteche civiche “Joppi” a organizin la presentazion dal libri “L’antibarbarie. La concezion etico-politica di Gandhi e il XXI secolo” di Giuliano Pontara. Apontament a lis 18, li de Universitât furlane in vie Petracco 8 di Udin.