[ART]

La Galarie d’art moderne di Udin e onore Dora Bassi, muarte pôcs dîs indaûr (www.friul.net/dizionario_biografico.php), esponint 3 oparis ch’a rapresentin il so percors artistic, tra piture, sculture e scriture: la piture “Nave fantastica”; l’opare cinetiche “Mutazione riflessa” e il bronç “Abbraccio”. La biografie di Dora Bassi si cjatile su la rêt ancje te sezion “Udine Museale” dal lûc internet dal Comun udinês.

[GLESIE FURLANE]

La prime fieste dai Scampanotadôrs dal Gurizan/Pritrkovalci Goriske si le fasarà domenie ai 2 di Setembar, li dal santuari di Monsante. Si tacarà cuntun conciert di cjampanis a lis 15 e a lis 17 il vicjari gjenerâl di Gurize, Adelchi Cabass, al cjantarà messe compagnât de corâl “Ars Musica”. A lis 18 al vegnarà presentât il progjet “Scampanotadôrs dal Gurizan”, ch’al cjape dentri dutis lis scuadris dal Gurizan des valadis dal Lusinç e de Vipau, dal Cuei, dal Cjars, de Bisiacarie e de Basse e ch’al è stât incorazît dai vescui di Gurize Dino De Antoni e di Cjaodistrie Metod Pirih. Di chê strade pre’ Luîs Tavano al presentarà une relazion su “Monsante e il Gurizan: un rapuart di tornâ a scuviergi” e Anna Bombig la “Preiera dai Scampanotadôrs”. Par informazions: 0038 6 31535752; 338 2250535; 348 2119547.

[CULTURE]

Domenie ai 2 di Setembar, li dai “Colonos” di Vilecjace, la manifestazion culturâl “Avostanis” e assegne “Il mus d’aur” 2007. Da lis 21, a presentin Emma Montanari e Marisa Scuntaro. Invidade speciâl de serade Fey von Hassell, la fie dal imbassadôr todesc a Rome sassinât pe sô oposizion al nazisim, intant de seconde vuere mondiâl, femine di Detalmo Pirzio Biroli, deplomatic furlan (www.friul.net/dizionario_biografico.php).

[SALÛT]

Dai 3 ai 7 di Setembar, la fondazion “Bambini e Autismo onlus” e propon a Cordenons il “Punto Gioco 2007” par fruts cul autisim. L’apontament al sarà li di vile Respiro.

[SALÛT]

Lunis ai 3 di Setembar, l’Aziende sanitarie dal Friûl Disore e torne a inviâ il program di “screening mamografic” a gratis par feminis fra 50 e 69 agns. A son invidadis a fâsi visitâ chês feminis che no an fat l’esam tai ultins 2 agns.

[TEATRI]

Lunis ai 3 di Setembar, e tache la campagne abonaments pe seson 2007-08 dal Teatri udinês “Zuan di Udin”. A son previodudis 3 fasis: la prime pai abonâts di an passât; la seconde dai 12 di Setembar pai gnûfs abonaments; e la tierce dai 17 di Setembar par ducj chei ch’ intindin di mudâ forme di abonament.

[SALÛT]

Tal Istât dai macilis su lis stradis e de grande enfase mediatiche su la colpe des bevandis alcolichis tune grande part dai incidents, in Friûl al è sucedût che ancje un autist di coriere al sedi stât denunciât pal superament dal limit di positivitât dal alcultest. Il grâf episodi al è capitât dongje Paluce, in Cjargne, e al è stât scuvierzût parcè che la coriere e jere implicade intune trussade cuntun camion. Un pôcs di passizîrs a an scugnût ancje jessi ricoverâts a Tumieç.

[NAZIONS]

Martars ai 4 di Setembar lis comunitâts lenghistichis de Provincie di Trent si dan dongje pe “Convigne des minorancis”, implantade de leç provinciâl 4/1999. La riunion e tacarà a lis 10.30 li dal municipi di Fierozzo/Vlarotz. Si discorarà in specialitât dal Test unic des leçs di tutele e di instruzion.

[MUSICHE]

Martars ai 4 di Setembar, la LXIV edizion de Mostre dal cine di Vignesie e à par protagonist il composidôr e musicist pordenonês Remo Anzovino. Li de sale “Tropicane” dal Otel “Excelsior” al presentarà “Cinematic e_motions”.

[SALÛT]

Miercus ai 5 di Setembar, li de glesie di san Grivôr di Sacîl si presente il documentari “Suoni di Vita - Percorso di Musicoterapia nelle demenze e nell'Alzheimer”. Lu à realizât il musicoterapeut Alberto Chicayban. La serade e tacarà a lis 20.30, par cure di Comun, Cjase pai viei, cooperative “Itaca” di Pordenon e clape “Aqua - Art for Health” di Genue.