[CULTURE]

A Gurize e je nassude une instituzion internazionâl gnove. Il so ideadôr, Piergiorgio Gabassi dal Ateneu di Triest, lu à batiât “Institût di ricercje su la negoziazion”. Te suage da l’iniziative, al è saltât fûr il volum “Verso il negoziato - Gorizia, Mitteleuropa, Asia” (Franco Angeli), scrit dai deplomatics furlans Mainardo Benardelli, Giorgio Novello e Lamberto Zannier.

[POLITICHE]

A la barbe di manifestazions cul vescul in place, di comitâts, di volantins e di denunciis, pe Cjamare di cumierç di Udin «Non solo in Carnia e a Redipuglia-Udine Ovest: grande è la voglia di avere elettrodotti». La curiose interpretazion de realtât regjonâl e je stade proponude intal numar dal mês di Lui dal periodic “UdineEconomica”.

[ART]

L’associazion culturâl “Colonos” dai 2 ai 4 di Avost e presente “La gnove opare solâr”: incuintri e azion artistiche di Fabrizio Corneli. E presente Katia Toso. Prin apontament joibe a lis 21, li dal agriturisim di Vilecjace di Listize. Sabide 4 a lis 17, inaugurazion.

[CONVIGNIS]

Francesco Altan, Renato Calligaro, Angelo Campaner, Giorgio Giaiotto e Nicoletta Costa a son i disegnadôrs protagoniscj des “Convignis cui artiscj” programadis sul cjiscjel di Udin dai Museus civics. Ju apontaments a tacaran a lis 19 dai 2, dai 9, dai 23 e dai 30 di Avost e dai 6 di Setembar.

[INFORMAZION]

Ancje Raussêt al à il so lûc internet. Si clame www.rauscedo.org e lu à curât il “webmaster” Michele Leon.

[SOCIETÂT]

Pal “Auser” dal Friûl Disore, Glemone e à di deventâ la “Citât dal volontariât”. Il progjet, proponût a la samblee anuâl de organizazion, al è stât popolarizât ancje intant de convigne comunâl dal volontariât. Seont il president Claudio Sangoi, il volontariât al podarès deventâ un motôr pe rinassince civîl, morâl, economiche e fisiche di Glemone.

[MUSICHE]

Screât ai 20 di Avost in vie Bertaldie 38 di Udin, il circul Arci “Mis(s)kappa”, vinars ai 24 di Avost, al propon un conciert dal grop jazz olandês “Maurits Roes Trio (a lis 21.30). Il grop al è formât di un baterist di Scluse, Emanuel Donadelli e di un pianist todesc. Il liron, po, al è sunât di un ongjarês. Il grop al à bielzà incidût l’album “Essential elements”.

[MUSICHE]

Dai 24 di Avost (conciert a lis 21, li de glesie di Dardâc di Buduee cun Stefano Innocenti) ai 11 di Otubar, al torne il festival di musiche de Livence, par cure de “Associazione culturale altoliventina”. I apontaments a colaran ai 26 di Avost, il I di Setembar, ai 2, ai 9, ai 23, ai 29 e ai 30 di Setembar, ai 2, ai 4 e ai 11 di Otubar. Par informazions: 333 8352808.

[GLESIE FURLANE]

Il munzi apostolic in Lituanie Peter Zurbriggen si è complimentât cun pre’ Paolo Caucig pe seconde edizion dal volum “Luigi Faidutti (1861-1931) Un testimone della fede e della giustizia sociale”, saltât fûr par cure di “Nuova iniziativa isontina” e dal centri studi “Antonio Rizzatti” di Gurize. Mons. Faidut, campion dal Partît catolic popolâr furlan, daspò dal esili decretât dal nazionalisim talian, al à operât li de nunziature di Kaunas, dulà ch’al è sapulît.

[DIASPORE]

Sabide ai 4 di Avost, Friûl pal mont al organize la IV Convention da la furlanetât pal mont. Il dibatiment sul Friûl tal mont globalizât al tacarà a lis 10, li dal municipi di Pontebe, cui intervents di Pier Antonio Varutti, di Mauro Pascolini, di Mauro Ferrari, di Franci Janich, di Marco Macorigh, di Pietro Vacchiano, di Bruno Pizzul e di Alessandro Ortis. Lis conclusions lis fasarà il president di Friuli nel Mondo, ch' al organize la convigne, Giorgio Santuz. Tal indoman, domenie, a lis 9.30 al tacarà l'Incuintri anuâl cu la fieste dai Fogolârs tornâts pes vacancis.