[AMBIENT]

La zonte regjonâl, il I di Jugn, e à trombonât ducj i doi i rigassificadôrs progjetâts pal golf di Triest, tant chel di Zaule che chel “off shore” tal mieç dal mâr. Il guvier di Riccardo Illy, di Gianfranco Moretton e di Lodovico Sonego – scoltant, alfin, i parês des ministrazions locâls e dal mont ambientalistic – al à scugnût ameti di no «podê pandi un parê di compatibilitât ambientâl», dal moment che no je stade «provade la mancjance di pericui pa la salût umane e pal ambient» dai doi implants pe transformazion dal metan licuit in gâs. La ministrazion regjonâl si è impegnade a segnalâ al Ministeri dal ambient dutis lis pecjis documentâls e progjetuâls des dôs propuestis, marcant che, se ancje il ministeri al rivàs adore di superâ lis dificultâts segnaladis, la Regjon e podarà consintî dome un implant sôl, pal “principi di precauzion”.

[GLESIE FURLANE]

E je rivade in Friûl il I di Jugn la delegazion francese di Montcuq-Saint Gènies guidade dal vescul di Cahors e di un dissindint de famee dal patriarcje Beltram par cjapâ part a lis celebrazions in onôr dal sant vescul. Sabide ai 2 di Jugn i piligrins francês a cjaminaran su lis stradis segnadis dal cjaluni di Tolose Clément Tournier tal libri “Le Voyage en Frioul”. Domenie ai 3 di Jugn a saran a lis 10 li de gleseute di San Nicolau di San Zorç de Richinvelde pe eucaristie in memorie di Beltram, tal lûc là che ai 6 di Jugn dal 1350 al fo sassinât de nobiltât furlane.

[ART]

Daspò 47 agn di servizi, monsignôr Zuan Carli Menis al à lassât la direzion dal Museu diocesan di art sacrade e des Galariis dal Tiepolo di Udin. Il cumiât al è stât organizât de Glesie udinese, presint l’arcivescul Pieri Brollo, ai 31 di Mai. Tal puest dal professôr Menis al è stât clamât Giuseppe Bergamini.

[INFORMAZION]

Ancje in consei regjonâl, e je rivade la denuncie pal «pressapochismo linguistico» di “Rai Triest”. L’ultin scandul ch’al à sburtât il conseîr Giancarlo Tonutti a presentâ un’interogazion al è capitât ai 28 di Mai, cuant che i zornaliscj triestins a àn let par francês il non dal mulin di Merêt di Tombe, ch’al è deventât «mulen de marscè» impen di Mulin di Marchet. Tonutti al domande s’al è chest il mût di rispietâ il contrat di servizi fra “Rai” e Regjon, ch’e pae salât par che il furlan al sei promovût. «No saressial il câs – al domande il sorestant codroipin – che almancul cualchidun dai zornaliscj nol frecuenti un cors di geografie e di lenghis regjonâls?».

[MOSTRIS]

Vie pal mês di Jugn, si podarà visitâ a Udin la mostre “Chernobyl, la reditât scuindude”. Le proponin lis clapis “Sism Udin e “Il sole di Mino”, li dal cine “Visionario” di vie Asquini.

[DIASPORE]

La “Clape Friûl dal Mont”, ch’e da dongje ju emigrants tornâts in Patrie, e à screât il so lûc internet. Si cjatilu a la direzion: www.clape.it. Lis direzions de clape, ch’e je unide cul Ent Friûl pal Mont, a son: vie del Sale 9, Udin (347 4483819).

[NAZIONS]

Te suage de manifestazion “Itinerannia” di San Zorç di Noiâr, la clape “Gruppo ’89” di San Zuan di Manzan, sabide ai 2 di Jugn, e propon la mostre “Terra” di Salgado. A lis 20.30 al sarà organizât ancje un conciert di “bossa nova”, intitolât “Brasiliando”.

[TEATRI]

Sabide ai 2 di Jugn, la fiere anuâl “Eticamente” di Tei e propon il laboratori creatîf “L’Uomo mangia carta…” par imparâ a riciclâ e a no strassâ. Apontament a lis 16.30.

[SOCIETÂT]

Sempeter daprûf Piran, in Slovenie, al organize la VII edizion de convigne dai paîs dedicâts a San Pieri, compridût Speter/San Pieri dai Sclavons. Il program culturâl e musicâl al tacarà a lis 20 dai 2 di Jugn, li de cjase de culture. La int di San Pieri dai Sclavons e partissarà a lis 7.30 di buinore devant dal municipi.

[MUSICHE]

I scuelârs de Scuele di musiche diocesane di Mortean, sabide ai 2 di Jugn, a organizin il saç anuâl di studi. Al tacarà a lis 16.30 li de glesie de Trinitât.