[GLESIE FURLANE]

Domenie ai 29 di Avrîl, il “Corriere della Sera” i à dedicât miege pagjine al impegn sociâl di mons. Raffaele Nogaro, il vescul furlan di Caserta. Tal articul “Il vescovo occupa la discarica e si scontra con la Cei e i politici”, si cjacare de sô posizion sul scandul des scovacis in Campanie. Nogaro al è nassût a Gradiscje di Sedean e al è vescul dal 1982. «O patìs pai ministradôrs locâi – al à declarât –. Ma cemût fasino a no capî che la discjarie (chê di Lo Uttaro, ndr.) e je leade cu lis gjavis e duncje cul mont de camore?».

[CINE]

Il responsabil de biblioteche e dai progjets su lis colezions da la “Cineteche dal Friûl”, Luca Giuliani, al è jentrât tal diretîf de “Federazion internazionâl dai Archîfs dal cine”. La nomine e je vignude intant dal LXIII congrès de “Fiaf”, celebrât a Tokyo.

[LIBRIS]

Il centri florentin sui popui menaçâts al segnale i libris gnûfs sul colonialisim talian scrits di Angelo Del Boca: “A un passo dalla forca. Atrocità e infamie dell’occupazione italiana della Libia nelle memorie del patriota Mohamed Fekini” (Milan, 2007 - www.bceditore.it) e la ristampe di “I gas di Mussolini. Il fascismo e la guerra d'Etiopia” (Rome, 2007 - www.editoririuniti.it).

[CULTURE]

Il Consei di ministrazion de Agjenzie regjonâl pe lenghe e à nomenât Massimo Duca diretôr. Dotôr in Conservazion dai Bens culturâi e funzionari de Provincie di Udin, al è stât president de “Union Scritôrs Furlans” e al è sotpresident dal Consorzi “Centri Friûl Lenghe 2000”. «Furlan a scuele, furlan te Rai e tai mieçs di comunicazion e completament dal Grant Dizionari Bilengâl Talian-Furlan a saran lis mês prioritâts»: al à declarât Duce al lûc internet “lenghe.net”.

[MUSICHE]

Fintremai ai 5 di Mai, a Cjasielis di Mortean e tire a dilunc la rassegne musicâl “Festintenda”, ch’e finìs 24 agns. Il program dai concierts si cjatilu su la rêt.

[SOCIETÂT]

Miercus ai 2 di Mai, li de glesie de Trinitât di Davâr a saran memoreâts i muarts dai 2 di Mai dal 1945. A lis 10.30 e sarà cjantade messe. In chê dì di 62 agns indaûr, daspò di un atentât dai partesans cuintri dai cosacs in ritirade, si discjadenâ une rapresalie sanganose. Lis vitimis, di une bande e di chê altre a forin desinis e desinis.

[AMBIENT]

Li dal ministeri pes ativitâts produtivis, ai 2 di Mai, si discor dal progjet di eletrodot soterani Würmlach-Somplât progjetât di Burgo Group, la imprese turinese ch'e dirêç la cjartere di Tumieç. Se il progjet di colegament fra la Carintie e il Friûl al sarà aprovât, dificilmentri al podarà jessi realizât il colegament svolant ipotizât di Alpe Adria Energia, in dite des impresis Pittini e Fantoni di Osôf.

[CONVIGNIS]

Udin e Gurize i dan acet a la convigne su “Il pinsîr di Graziadio Isaia Ascoli, 100 agns daspò de sô nassion”. I lavôrs a son coordenâts dal Centri internazionâl sul plurilenghisim de Universitàt furlane, dai 3 ai 5 di Mai.

[CULTURE]

Dai 3 ai 8 di Mai, il “Progjet integrât culture” dal Friûl di Mieç al onore Amedeo Giacomini cui percors “Aghe e piere. Cjâr e grin”. Apontaments ai 3 di Mai a lis 21 li dal “Ferarut” di Rivignan; ai 4 a lis 21 li dai “Colonos” di Vilecjace; ai 5 li de biblioteche di Codroip a lis 18.30; ai 6 li de biblioteche di Codroip a lis 11 e li di vile Giacomini di Vildivar a lis 21; ai 7 a Cjasarse li dal centri studi “Pasolini” a lis 18; ai 8 li di palaç Montereale Mantica a lis 21.

[SCUELE]

Ai 3 e ai 4 di Mai il teatri di Manià al ospite “Teatro di voci”, a conclusion dal progjet di educazion vocâl e di cjant corâl in forme teatrâl. Si esibissaran lis scuelis di Brugnere, di San Zorç de Richinvelde, di Montreâl, di Vivâr, di Mafalcon e di Rorai Piçul.