[CINE]

Lunis ai 2 di Avrîl, li dal cine “Visionario” di Udin, al ven proietât pal prin viaç in Friûl il cine “Yesterday once more” di Johnnie To, la comedie di Hong Kong ambientade te capitâl furlane. A organizin l’acjadiment il Centri espressions cinematografichis e “Arte video” di Palme.

[INFORMAZION]

Al torne il program radiofonic “Simulisì Simulisà”, te suage dal progjet “Teatro&Scuola”. Dai 28 di Març, ogni miercus a lis 13.45 Radio Spazio 103 al presentarà lis contis di Lia Bront e di Claudio Parrino. Lis frecuencis Fm di seguî a son: 91.9 (Sagrât), 95.7 (Valcjanâl), 97.4/91/103.6 (Cjargne), 97.5 (San Florean), 98.2 (Cjanâl dal Fier), 99.5 (Tarvis), 103.7 (Udin e Basse), 103.9 (Friûl di Mieç).

[MOSTRIS]

Fintremai ai 3 di Avrîl, il Centri culturâl Vaccher di Banie di Vile di Flum al presente la mostre “Colori & Sapori”, dedicade a lis inslustrazions di Federica Pagnucco. L’esposizion e je stade screade ai 16 di Març.

[ART]

Il Centri furlan arts plastichis al à onorât il pitôr Darmo Brusini di Tresesin, di chê strade dal so XCVII cjadalan. La fieste sul cjiscjel di Udin e je stade fate ai 27 di Març.

[CULTURE]

L’Institût pai incuintris culturâi mitteleuropeans al à rinovât une part dal so diretîf. Cul president confermât Marco Grusovin, a colaboraran il secretari gjenerâl Paolo Geotti e il secretari ministratîf Francesco Moise. Tal consei a jentrin Marino Marin, Mario Ascari, Marco Plesinica e Fulvio Salimbeni.

[LIBRIS]

Tal L innovâl dai compatâts di Rome, Gianni Copetti, furlan ch’al vîf fra Belgjiche e France e ch’al guide l’associazion pe promozion de culture taliane tal forest “Assodilit”, al à publicât il libri “L’Europe: une oeuvre inachevée - Les Etats-Unis d’Europe”. L’opare si pues ordenâle li de librarie taliane di Brussel “Piola libri”, in vie Franklin.

[DIASPORE]

La comunitât di San Quarin, in colaborazion cul “Efasce” (ent furlan assistence sociâl e culturâl emigrants), e organize un viaç in Canada pal L di fondazion dal “Club San Quarin di Toronto”. Di chê strade e sarà organizade la convigne “Il Mosaic di Spilimberc a Toronto”. Il viaç al è programât dai 8 ai 14 di Avost.

[MOSTRIS]

Il “Gruppo costumi tradizionali bisiachi”, li dal municipi di Turiac, al à imbastît l’esposizion “Zûcs di len des Alps dal 1835 al dì di vuê”. In mostre e je la colezion di Cjase Oberrichter di Malburghet. Si pues visitâle ogni dì, 10-12 / 17-19. Par apontament si à di telefonâ al numar 347 4612447.

[POLITICHE]

Ai 27 e ai 28 di Mai si vote ancje in Friûl par elegi 24 sindics gnûfs. L’unic caplûc interessât e je Gurize, dulà che l’eventuâl balotazion si le fasarà ai 10 e ai 11 di Jugn. In chei altris paîs, 5 a son chei là che il consei comunâl al è stât disfat prin da l’ore (par muart o par dimission dal sindic) e 2 ju regeve un comissari regjonâl. Ve la note dai Comuns par Provincie. Udin: Darte, Bordan, Buje, Çarvignan, Lignan, Manzan, Pocenie, Preon, Tarvis, Tresesin e Vildivar; Pordenon: Davian, Daçan, Cjasarse, Cimolais, Clausêt, Manià, Prate e Vît; Gurize: Cormòns, Grau, Sagrât e San Cjancian.

[POLITICHE]

Il deputât furlan Jacopo Venier (votât fûr di regjon, tes listis dal “PdCi”), intant de riunion da la Comission forescj de Cjamare cui puartevôs de Samblee nazionâl slovene, al à proponût ch’al sedi publicât e ufiert a dutis lis scuelis talianis il document dai storics talians e slovens su la cuistion dal confin orientâl “Rapuarts fra talians e slovens dal 1880 al 1956”.