[SOCIETÂT]

Anna Fasano e Alberto Fabris dal Centri di volontariât internazionâl “Cevi”, joibe ai 15 di Març a presentin la lôr mission in Sierra Leone e i risultâts dal progjet prudelât de “ong” furlane. La convigne e tache a lis 20.30 li de parochie udinese di San Marc.

[CONVIGNIS]

Joibe I di Març, il “Gruppo ’89” al organize li dal auditorium comunâl di San Zuan di Manzan un confront sul Centri di permanence temporanie di Gradiscje Imperiâl. L’apontament al comence a lis 20.30, in colaborazion cu la Parochie.

[AMBIENT]

La clape “L’ambiente è vita” e à tornât a denunciâ i grâfs incuinaments causionâts dal aeropuart militâr di Davian. Par Giuseppe Rizzardo, intervistât dal setemanâl “Il Popolo” dai 18 di Fevrâr, fintremai tal 1995, i sorestants merecans a an fat doprâ te base tant che diserbo il “bromacite”, ch’al è chel istès incuinant burît fûr tai poçs di Lavorêt, di Fontanefrede e di Purcie. Altris incuinaments, tantetant, si cjatiju tes sclavitûts militârs di Lavorêt, di Cordenons e di Malnîs.

[GLESIE FURLANE]

L’Italie e à fat “Cavaliere dell’Ordine della Stella della Solidarietà” pre’ Vitaliano Papais di Ramussiel, plevan de Patrick’s Church di Toronto e consulent gleseastic dal “Efasce” pal Canada. Prin di ocupâsi dai emigrants, pre’ Vitaliano al à operât te Glesie di Concuardie, tes comunitâts di Fontanefrede, dal Cûr di Jesù di Pordenon e di Volveson.

[ECONOMIE]

In gracie dal Consorzi universitari di Pordenon (www.unipordenone.it), su la rêt des rêts al esist, al esist un puest virtuâl dulà ch’a puedin incuintrâsi la domande di lavôr o di garzonât dai students e dai neodotôrs furlans e lis ufiertis des impresis e dai ents pal personâl cun formazion universitarie. La direzion dal gnûf sît e je: www.unicurricula.it.

[CONCORS]

Le television web dal Friûl ocidentâl “Pnbox”, par popolarizâ il servizi dal lûc internet www.unicurricula.it, e organize cul Consorzi universitari di Pordenon il concors “Prove libere di videocurriculum”. Dentri dai 10 di Avrîl dotôrs o students universitaris a varan di realizâ un “curriculum” video di 60 seconts par persuadi eventuâi parons. Il regolament si cjatilu su la rêt: www.unicurricula.it - www.unipordenone.it.

[LIBRIS]

La storie di Mario Tonzar e di Milio Cristian, compagns di presonie in Jugoslavie, e je contade tal libri “La Valigia e l’Idea. Memorie di Mario Tonzar”, ch’al ven presentât vinars ai 2 di Març a Vile Santine. L’apontament de schirie “Seradis culturâls”, al tache a lis 20.30 li dal Centri sociâl (parsore de Pueste).

[CONVIGNIS]

Lis convignis sul art ch’a compagnin la mostre “Mestris antîcs. Pituris par une colezion”, a son stabilidis a lis 17 di vinars ai 2, ai 9 e ai 10 di Març, li dal cjiscjel di Susans. A saran presentadis 2 relazions par volte: “Storia di una grande Collezione: i Colloredo di “Santa Sofia” tra politica e mecenatismo” (Antonino di Colloredo Mels ) e “Arte del Settecento tra il Friuli e la Toscana” (Gilberto Ganzer); “Incontri veneziani: Sebastiano Bombelli e Luca Carlevarijs” (Isabella Reale) e “Collezionando gli Antichi Maestri” (Luciano Franchi); “L´estro capriccioso di Giuseppe Bernardino Bison” (Annalia Delneri) e “Nicola Grassi, aggiunte al catalogo” (Andrea Piai).

[CONVIGNIS]

Vinars ai 2 di Març, l’artist Arrigo Poz al è il protagonist de convigne su “Art contemporanie tai lûcs di cult”, inmaneade a Felet dal Centri culturâl “Settetorri per il Terzo Millennio”. La riunion e tache a lis 20.30, li dal municipi.

[POLITICHE]

L’ultin numar dal 2006 dal boletin dal Moviment Provincie Pordenon-Puart “Dai monti al mare” al è dedicât ai referendums pal passaç di Regjon che, su lis olmis dai Comuns concuardiês sot di Vignesie, a son daûr a slargjâsi par dute l’Italie. In zornade di vuê a an votât 16 Comuns in 6 voltis; 11 a son i Comuns indulà che i “Sì” a an superât la baridure dal “quorum” dopli. Altris 9 Comuns a votaran in curt. Magari cussì no, fra i Comuns dulà che il “quorum” al à comprometût il risultât positîf a jentrin i paîs furlans di San Micjêl, di Gruâr, di Pramaiôr e di Tei.