[POLITICHE]

Vinars ai 2 di Fevrâr, lis “Acli” di Pordenon a screin la schirie di convignis dedicadis a profondî la cuistion: “Cemût stae la Regjon Fvg?”, programadis insin al mês di Mai. A lis 20.30, li dal covent di San Francesc, si discorarà di pâs cul assessôr Roberto Antonaz, intervistât di Alessandro De Paoli dal circul “Acli” di Pordenon, e cul sotpresident des “Acli” regjonâls, Marta Pajer.

[POLITICHE]

Par compagnâ la mostre “La rinassince dal Parlament. De liberazion a la Constituzion” (imbastide a Triest fintremai ai 28 di Fevrâr), il Consei regjonâl al propon ancje a Gurize 2 convignis. Ju apontaments a colin ai 2 (oris 17) e ai 13 di Fverâr (oris 17.30), li da la Provincie in cors Italia 55. A discoraran sul dibatiment de samblee constituente sul Friûl orientâl e su la comunitât slovene Dimitri Girotto, Ariella Verrocchio, Anna Di Giannantonio e Gorazd Bajc.

[CONVIGNIS]

Si discor di ricercje informatiche in Friûl, vinars ai 2 di Fevrâr, intant di “In file”, li dai Colonos di Vilecjace di Listize. La seconde serade de schirie di convignis dal 2007 e tache a lis 20.30 cun Luca Chittaro, Roberto Ranon, Fabio Buttussi e Daniele Nadalutti. E sune la ghitare Marina Valusso.

[LIBRIS]

Cuntune leture teatrâl vinars ai 2 di Fevrâr, Claudio Moretti e Elvio Scruzzi a presentin li dal teatri di Cjamin di Codropi, il libri dal “Teatro Incerto”, “Garage 77” (edizions “Kappa Vu”). La convigne e tache a lis 20.30.

[LIBRIS]

Sabide ai 3 di Fevrâr, a lis 20.30 li de sale “L’Alpina” di Comeliàns, Bozidar Stanisic, Annalisa Comuzzi e Mario Turello a presentin il libri di pre’ Pierluigi Di Piazza “Nel cuore dell’umanità storia di un percorso”. A organizin il Comun di Comeliàns e la Glesie di San Vicent di Tualiis.

[CULTURE]

Pai siei socis e pai sustignidôrs, la Pro loco da la Val dal Argìn e à prontât un “cd rom” dedicât a la Mont di Anduins, «un piccolo mondo antico», a àn scrit su la cuvierte i curadôrs Pietro Gerometta, Nicholas Gerometta e Simone Marian. Su la Mont, la int di Anduins, daspò de vuere a an tirât sù la gleseute de Madona da la Nìaf, tant che avôt pal salvament de distruzion dal paîs, intant de dominazion naziste e lassù, ogni an, a tornin par preâ e par fâ la grande fieste dal paîs.

[CULTURE]

A San Zorç di Noiâr al è nassût un gnûf sportel pe lenghe furlane. L’operadôr al è Maurizio Biasizzo. I telefons: 0431 620281 - fax 0431 622326.

[MUSICHE]

Domenie ai 4 di Fevrâr, il “Coro da camera udinese Collegium Apollineum”, direzût di Marco Feruglio, al propon un conciert a Rome, li de glesie dai artiscj dedicade a Santa Maria in Montesanto (in place dal popul). L’esecuzion di musichis di Vivaldi e di Händel e tache a lis 21 e e scree la rassegne “Quaranta concerti nel giorno del Signore”.

[NAZIONS]

Se tes votazions dai 3 di Mai il “Scottish National Party” al rivarà adore di vê la maiorance relative, al à garantît ch’al proponarà il referendum pe secession de Scozie dal Ream unît. Te ultime consultazion, il partît nazionalitari al jere rivât secont cul 23.8% dai vôts. La combinazion e je che, de bande anglês, al sarà clamât a frontâ la “secession”, il scozês Gordon Brown, che ai 26 di Lui i darà la volte a Tony Blair, tant che prin ministri di Londre.

[CORS]

La “Scuelute furlane di Palme”, cul institût “Achille Tellini” di Manzan, e à inmaneât une convigne fra i arlêfs dai Cors pratics di lenghe e di culture furlanis di Sant Zorç di Noiâr e di Palme. Di chê strade al sarà presentât il libri “Santuts e preieris - il respîr de anime furlane” di Anita Salvador di Teôr. L’apontament al cole ai 5 di Fevrâr a lis 20.30, li dal “Polifunzionâl San Marc”, a Palme.