[NAZIONS]

Il lûc internet www.eurominority.org/ al propon une presentazion des comunitâts lenghistichis da l’Europe. La sô redazion e je logade in Bretagne, a Kemper. La version furlane e je firmade di Nicola Kosanovic.

[MOSTRIS]

La “Trienâl europeane da l’incision” e je imbastide a Pordenon fintremai ai 11 di Març dal 2007. Chest viaç, e je dedicade ai segns e ai colôrs di Marc Chagall. L’esposizion e je curade li dai spazis espositîfs di cors Garibaldi a Pordenon (cultura@provincia.pordenone.it). Oraris: martars-vinars 14.30-19; sabide e domenie 10-19.

[POLITICHE]

Cjamplunc e Tapoian a tirin adilunc viers la fusion dai Comuns. Dentri dal mês di Novembar dal 2007 la int e varès di pandi la sô decision intun referendum uficiâl. I conseis comunâi a an za votât di “sì”, te setemane dopo di Nadâl, a l’unanimitât. Il sindic di Cjamplunc, Giovanni Cumin, al à spesseât a precisâ su la stampe che il gnûf Comun si clamarà “Campolongo Tapogliano” «senza trattino».

[POLITICHE]

Al operarà par dî di no a la fusion fra i Comuns di Çurçuvint e di Sudri il comitât “Alternativa per Cercivento”, metût sù ai 19 di Decembar te comunitât cjargnele dal cjanâl di San Pieri. Par sensibilizâ e par informâ la int, al intint di promovi dibatiments e confronts publics. Il so puartevôs al è Denis Della Pietra.

[MOSTRIS]

Fintremai ai 5 di Genâr, li dal “Multiseum” di Torean di Martignà, il “Centri furlan di arts plastichis” al presente la XLVI rassegne regjonâl d’art. Oraris: di martars fin vinars, 16-19; domenie, 10-13 / 16-19.

[NAZIONS]

«Un popul s’al reste cence lenghe al reste cence identitât»: al è ce ch’al 9 declarât Romano Prodi, prin ministri talian, daspò di vê incuintrât sul pas di Cjamplunc il president de “Union gjenerâl ladine”, Michil Costa. Intant de convigne, Costa al à presentât i problems e lis necessitâts dai Ladins dolomitans, massime par chel che s’inten l’ûs de sô marilenghe par television ma ancje in cont des speculazions ediliziis ch’a menacin lis valadis ladinis.

[CONVIGNIS]

Vinars ai 5 di Genâr, a Tumieç si discor su “L’orientazion astronomiche de antighe plêf di San Pieri in Cjargne”. Reladôr de serade, inmaneade dal Grop astronomic de “Polse di Cougnes”, al sarà Ferdinando Patat dal Osservatori austrâl europeu. L’apontament al tache a lis 20.45, li de Comunitât montane di Tumieç.

[MOSTRIS]

Il Museu de Plêf e dal tesaur dal dom di Glemone, screât sul spirâ dal 2006, al vierç tai dîs di fieste. Par informazions e apontaments si pues telefonâi al numar 0432 980608. Vot a son lis salis da l’esposizion: piture (1 e 2), sculture (3), miniaduris (4), orisenarie (5 e 6), paraments (7 e 8), plui ingrès e archîf.

[MUSICHE]

Aldo Rossi al à realizât il so prin video uficiâl. Si cjatilu su la rêt, li de direzion: http://www.youtube.com/watch?v=BRn9gcr9nck. Vie pal 2007, l’artist furlan al nunzie une cjerce dal spetacul dal vîf “Ma ce vuelial dî jessi Furlans”.

[CULTURE]

Vie pal 2007, l’Europe e varà dôs capitâls de culture: Lussimburc, tal ducât zenso, e Sibiu, in Rumenie. Cu lis contribuzions finanziariis garantidis di chest ricognossiment, lis dôs citâts a regolaran i centris storics e a finanziaran impuartants programs culturâi. Fra Sibiu e Lussimburc si an vûts grancj rapuarts fintremai dal XI secul cuant che unevore di int lussimburghese e je emigrade viers la regjon transilvane di Siebenbürgen. Ancjemò in zornade di vuê, il 2% dai 170 mil abitants di Sibiu a son di divignince todescje.