[ECONOMIE]

Sabide ai 2 di Decembar, il “Forum” pordenonês dal “Tierç setôr”, mediant da l’“Officina della decrescita” al organize a Vilote di Cjons la II fieste de diminuzion “Festa della decrescita felice 2006”. L’apontament al comence a lis 9, li de cjase dai Alpins e de scuele primarie.

[SALÛT]

Li dal centri sociâl di Denemonç, sabide ai 2 di Decembar, si discor sun cemût che i Clubs dai alcoliscj in tratament a judin lis fameis ch’a an dificultâts. La convigne,vierte a dute la int de Cjargne, e tache a lis 14.30, inmaneade dai Clubs 341 e 48 di Denemonç.

[SCUELE]

I Salesians dal Friûl e di Triest, dutun cul centri culturâl “Il Villaggio”, a organizin une convigne su la formazion professionâl intitolade “C’è ‘cura’ per la dispersione”. L’apontament al tache sabide ai 2 di Decembar a lis 17.30 li dal Teatri San Zorç di Udin, in borc di Greçan.

[CONVIGNIS]

Su lis dôs batais ch’a an transformât l’Europe, sabide ai 2 di Decembar, il grop di studis storics e sociâi di Pordenon “Historia” al organize une “cene geopolitiche” cul professôr Dino Minichelli de Universitât furlane. L’apontament al tache a lis 20 li dal Otel Da Gelindo tai Magrêts di Vivâr.

[TEATRI]

La companie teatrâl “Siro Angeli” di Cjavaç e presente l’opare di Dario Fo “No ducj i laris a vegnin par fâ dam” a Tumieç, sabide ai 2 di Decembar a lis 16 li dal auditorium comunâl. L’apontament al è organizât par popolarizâ la prevenzion cuintri dai tumôrs dal pet des feminis. Daprûf a an lavorât il Comitât tumiecin dal “Andos” e l’Associazion oncologjiche dal Friûl Disore.

[MUSICHE]

I grops “G Seven” (Lorenzo Bearzot, Alberto Celotti, Giorgetto Di Lena, Giancarlo Salvador, Mario Tarticchio e Giorgio Tonelli) e “Usl Band” (Paolo Del Fabbro, Fortunato Munirò, Vittorio Segatti, Marco Mattotti, Silvia Buziol e Enzo Del Cet), sabide ai 2 di Decembar a lis 21, a presentin il conciert “Ma non vedete nel cielo” cun musichis di Battisti, De Andrè, “Eagles” e “Queen”. Al presente, li dal auditorium Zanon, Rocco Burtone. La manifestazion si propon di popolarizâ l’ativitât de clape “Agmen Fvg”.

[CULTURE]

I poets da la Val dal Argìn sabide ai 2 di Decembar a son i protagoniscj de serade di poesie e di musiche “Clapadoria Peravoladoria - Rimas di clap”, inmaneade a Zuviel di Ravasclêt (a lis 20.30 li dal Otel Harry’s). Il cjanteautôr Aldo Giavitto al insiorarà cu lis sôs cjantis la serade organizade des Pro loco di Ravasclêt e di Anduins. E presente la scritore Maria Sferrazza Pasqualis.

[CULTURE]

Mons. Roberto Bello, Maria Fanin, Roberto Ongaro e Gianni Passalenti a son i 4 personaçs sielzûts dal Circul culturâl laurinzian pal “Premi Nadâl furlan” 2006. La consegne e je stabilide par sabide ai 2 di Decembar a lis 17, li de Cjase de zoventût di San Stiefin di Buje.

[SCUELE]

L’Universitât furlane, i dà acet a la finâl dal “Premi talian da l’Inovazion”. Lunis ai 4 di Decembar, a lis 20.30 li dal Teatri “Zuan di Udin”, a saran proclamâts i vincidôrs. A lis 9.30 li dal Pôl sientific dai Riçs si fasaran i ultins scrutinis dai 36 progjets ch’a an vinçût lis “Start Cup” locâls.

[ECONOMIE]

Pe int di Pesariis, chê dai 2 di Decembar e je stade une zornade di fieste. Si son dâts dongje par gustâ li dal Otel di Pradibosc celebrant la conclusion de prime fase dai lavôrs di modernament de struture. L’inviestiment al è stât di 400 mil euros e al à permetût di mudâ i sieraments dal plan tiere, d’imbastî une lavanderie e di rinovâ i aredaments des 29 cjamaris, dal salon, dal bar e de “reception” de Propietât coletive. Di chê strade e je stade ancje screade la gnove seson di ospitalitât.