[ECONOMIE]

A cressin i depuesits di brevets industriâi. Vie pal prin trimestri dal 2006 a son stadis presentadis 82 invenzions tal Friûl udinês e 27 in chel pordenonês. Di chê strade, ju imprendidôrs a an profitât par domandâ ai uficis competents di garantî, tal câs di controversiis, proviodiments judiziaris plui tempestîfs.

[ART]

Ancje s’al è innomenât come il “pitôr di San Vît”, in veretât Pomponio Amalteo (1505-1588) al è nassût ad or de Livence, a Mote. E la sô citât i dediche une mostre fintremai ai 26 di Novembar, li de “La Castella”, in place dal dom. Si podaran rimirâ, in specialitât, 2 oparis preciosis: un disen preparatori ch’al ven dai “Uffizi” di Florence e la pale dal dom di Trevîs. A Mote a son conservâts ancje un fresc sul palaç ch’al ospite la mostre e, li dal dom, une madone cul frut e i sants Domeni e Francesc.

[SCUELE]

Fintremai ai 15 di Novembar, i students dal Conservatori furlan “Jacopo Tomadini” a puedin cjapâ part al concors pe assegnazion di borsis di studi par 150 oris. Il regolament dal concors si cjatilu su la rêt des rêts.

[NAZIONS]

E je tacade ancje in Italie la popolarizazion dal volum ch’al documente lis violazions dai derits dal om te foreste ecuadoriane, dulà che «ogni barîl di petroli al à dentri une gote di sanc, une part di spirt svinidrît e dibot il dopli di aghe muarte», cemût ch’e à denunciât Esperanza Martinez de associazion “Acciòn Ecologica”. L’Atlant gjeografic dal petroli da l’Amazonie al è stât a presentât a Trent, par cure de clape “A Sud”. Chê convigne si pues tornâ a viodile su la television in rêt www.arcoiris.tv.

[ECONOMIE]

Lis latariis de provincie di Udin a an une marche par protezi e par valorizâ i siei prodots. In zornade di vuê a ’nd è restadis une vincjine, cun 300 socis. La prime latarie turnarie e je nassude a Culine di For di Voltri tal 1880. Sul spirâ dai agns dal Cuarante a ’nd jere 658. Lis aziendis che in zornade di vuê a lavorin il lat ogni dì a son 14.

[CONVIGNIS]

Vinars ai 3 di Novembar, il Club Unesco di Udin al organize une convigne sul decenâl des Nazions unidis dedicât a l’educazion dal svilup sustignibil (2005-2014). A cjacararan: Renata Capria D’Aronco, Nicola Vianello, Marina Vio, Fabio Peron, Nicolino Pagnucco e Maurizio Calderari, a lis 17 li de Universitât furlane, in vie Palladio 8 a Udin.

[MOSTRIS]

Fintremai ai 4 di Fevrâr dal 2007, li di palaç Attems-Petzenstein di Gurize, si pues visitâ la mostre “Di gurize al Imperi otoman, Antonio Lasciac architet”. L’esposizion e presente lis colezions dal Museu Alinari sul architet-poet-musicist gurizan (1856-1946), ch’al à lavorât cetant tal Friûl orientâl ma ancje in Egjit. Par informazions: 0481 547541.

[INFORMAZION]

“Il Cadore”, ch’al è il mensîl de “Magnifiche Comunitât di Cjadovri”, al à cjapât sù un asset editoriâl gnûf. Il vieri diretôr Vittore De Sandre al devente diretôr editoriâl e, a la direzion, i dà la volte Renato De Carlo, cul compit d’incressi la funzion di “propueste sociâl” dal sfuei e par che i Comuns cjadorins a tornin a dâsi dongje tal antîc spirt de Comunitât.

[SCUELE]

Di chest, an Gurize e à 3 Universitâts. In plui dal Ateneu furlan, ch’al è chel plui frecuentât, e di chel triestin, tal mês di Setembar al à screât lis lezions il Politecnic di Nova Gorica, logât in vie Croce, li dal “Solski dom”, progjetât dal architet Max Fabiani tal 1898. I students dal cors di Siencis ambientâls a son un centenâr.

[POLITICHE]

Il grop di studis storics e sociâi “Historia” di Pordenon, cul “LiMes Club” citadin, ai 3 di Novembar al organize une taule taronde internazionâl a Barcelone, là che si confrontin esperts furlans, catalans e talians. Fra i reladôrs: Aureli Argemí dal “Centre internacional Escarré per a les minories ètniques i les nacions”, il professôr Guglielmo Cevolin de Universitât furlane e il president de Provincie di Udin Marzio Strassoldo.