[NAZIONS]

Tal mês di Genâr cu ven, Bulgarie e Rumenie a fasaran il lôr ingrès te Union europeane. La decision le à cjapade la Comission europeane, visant però che i 2 Paîs a varan di finî lis riformis politichis, instituzionâls e economichis stabilidis dai compatâts di adesion.

[NAZIONS]

Il parlament europeu al à votât une risoluzion dulà ch’al domande a la Turchie di rispietâ ducj ju impegns in cont di democrazie e di libertât religjosis e civîls cjapâts sù in prevision de adesion a l’Union europeane. Il ralentament tes riformis imprometudis, seont il parlament di Strasburc, al risie di improibî l’unificazion. Su la cuistion, il vicjari apostolic da l’Anatolie, il vescul concuardiês Luigi Padovese, al à sclarît la posizion dai vescui catolics: parê positîf a l’adesion ma condizionât de aplicazion dai derits des minorancis.

[TEATRI]

La miorance regjonâl di “Intesa democratica” e je daûr a prontâ une riforme de leç 68/1981, ch’e intint d’intitolâ “Normis di riordinament dai intervents a pro dal spetacul dal vîf”. Il fin dal proviodiment, elaborât di Tamara Blazina (Ds), al è chel di razionalizâ i finanziaments, concentrantju a pro dai ents di «caratar regjonâl». Te note dal stampon chei di Triest a son 5; 4 te provincie di Udin, 1 te provincie di di Pordenon, nissun in chê di Gurize.

[SCUELE]

Cuntune lezion di Piera Rizzolatti da l’Universitât furlane su la fevele di Pordenon, ai 2 di Otubar, l’Universitât de Tierce etât de capitâl dal Friûl ocidentâl e à screât il so XXV an academic. L’abitance de instituzion culturâl e je li de Cjase Zanussi di vie Concuardie 7.

[MOSTRIS]

Il “Museu de art de medaie e de citât di Buje” al è imbastît in Borc San Laurinç, su la mont di Buje. Dal mês di Otubar al mês di Avrîl, si pues visitâlu sabide e domenie, des 15 a lis 18.

[MOSTRIS]

Lunis ai 2 di Otubar, si scree la mostre “Fantasia e realtà” di Massimo Malipiero, li de IV Circunscrizion di Udin, in vie Pradaman 21. A lis 18 al presente la rassegne Vito Sutto e Bepi Agostinis al lei poesiis di Lucia Gazzino. Te iniziative al à colaborât il grop pa l’art figurative dal Institût “Marinoni”.

[DIASPORE]

Martars ai 3 di Otubar, la capitâl da la République du Congo, Brazzaville, i da acet a la cinise di Pieri Savorgnan di Brazzà, puartade di Algeri là ch’e jere tignude cont dal 1905. L’esploradôr furlan deventât francês (1852-1905) al vegnarà memoreât intun mausoleu te uniche citât di dute l’Afriche ch’e puarte ancjemò il non de ete coloniâl, par rispiet de onestât e de umanitât dal so fondadôr, che si è simpri batût cuintri de sclavitût.

[CORS]

Cuntune riunion organizative martars ai 3 di Otubar, al tache il cors di sloven par cure de associazion culturâl di Roncjis di Mafalcon/Ronke “Jadro”. Il cors al è destinât ai grancj e al durarà 6 mês (50 oris), de metât di Otubar. Lis lezions (2 oris par setemane) a vegnaran proponudis a Vermean/Romjan, in vie Monte 6 Busi. Par informazions: 0481 482015 - 0481 776123 - 0481 779843.

[SCUELE]

Ducj i zovins che no son indotorâts di plui di 18 mês a puedin concori, fintremai ai 31 di Otubar, ai garzonâts finanziâts dal progjet europeu “Leonardo”. Lis borsis di studi par 20 setemanis tal forest a son di 3 mil 600 euros. La selezion e je curade de Universitât dal Friûl.

[GLESIE FURLANE]

Lis Glesiis dal Friûl orientâl ch’a an un lûc internet a son 6: San Martin di Doberdò /Doberdob (www.parrocchiadoberdò.org/; sît bilengâl sloven/talian); Sants Elar e Tazian di Gurize (http://lnx.arcidiocesi.gorizia.it/cattedrale/); San Roc di Gurize (www.sanroccogorizia.it); San Salvadôr di Gradiscje Imperiâl (http://web.tiscali.it/gradisca/); Sant Dree di Mosse (www.parrocchiamossa.too.it); Sante Marie Nunziade di Romans (http://utenti.lycos.it/santamariaannunziata/index_old.html); San Roc di Vilès (http://lnx.arcidiocesi.gorizia.it/villesse/).