[INFORMAZION]

Si pues firmâ ancje li de Buteghe dal mont di Udin (in borc di Trep), la petizion “Ho pagato il canone Rai. Voglio di più”. La campagne e intint di sensibilizâ la “Rai” su la necessitât di vierzi une sede di corispuindince in Afriche, di realizâ une transmission setemanâl su la pâs e sui derits dal om; di eliminâ la publicitât intant dai programs pai fruts; di viergi lis puartis a lis organizazions de societât civîl impegnadis a pro de pâs, de justizie e de democrazie.

[SCUELE]

E je intitolade “Doppio sguardo sulla Grande Guerra” l’opare multimediâl su la prime vuere mondiâl realizade da “La Cineteche dal Friûl”. Le componin 2 “dvd” e un librut, curât dal consulent storic dal progjet Lucio Fabi. Daprûf dai documentaris al à lavorât Gianpaolo Penco.

[MOSTRIS]

Fintremai ai 31 di Avost, li de Colezion etnografiche di For di Voltri, si pues visitâ la mostre fotografiche su lis transformazions dal paîs cjargnel vie pal Nufcent.

[CONCORS]

Turisim e ambient; turisim e impat culturâl; i mistîrs leâts cul turisim: a son lis cuistions ch’a varan d’inlustrâ lis fotos destinadis pal concors “Il viaggiatore attento: le contraddizioni del turismo”. La consegne e je stabilide dentri dai 30 di Setembar. E organize la clape di Brescia “Tures”.

[MUSICHE]

Tai ripârs des Alps orientâls, e tire adilunc fintremai ai 11 di Avost la rassegne di notis e di peraulis “in rifugio”. Ducj i spetacui a tacaran a lis 11. Miercus ai 2 di Avost li dal “Pellarini”; vinars 4 li dal “De Gasperi”; sabide 5 li dal “Giaf”; lunis 7 li dal “Padova”; joibe 10 li dal “Corsi” e vinars 11 li dal “Rinfreddo” (in Cjadovri). Informazions su la rêt des rêts.

[SCUELE]

Cun 86.5 ponts, l’Universitât dal Friûl e risulte VII te graduatorie dai miôr ateneus in Italie, realizade dal “Censis”. Fra i servizis valutâts lis struturis (86 ponts, suntune scjale di 66 a 110), servizis (88), borsis di studi (75) e web (97). La cualitât di vite a Udin e tes sedis universitariis furlanis e je calcolade “alte” e il cost dai fits “mezan-bas”.

[SCUELE]

Il scandai dal “Censis” su lis Universitâts in Italie al scrutine ancje dutis lis Facultâts. Chês furlanis a an otignût chescj risultâts: Agrarie VIII puest cun 90.2 ponts (suntune scjale di 66 a 110); Economie XV cun 82.4; Jurisprudence X cun 90.8; Ingegnerie VI cun 95.8; Letaris e filosofie X cun 88.4; Lenghis e leteraduris forestis I cun 100.2; Medisine e chirurgjie I cun 99.8; Siencis de formazion II cun 97.8; Siencis matematichis fisichis e naturâls VIII cun 88.2; Vetrinarie no je stade valutade.

[CONCORS]

Fintremai ai 15 di Setembar, i Comuns alpins a puedin proferî progjets finalizâts al svilup sustignibil e pe aplicazion des cognossincis tiradis dongje tal program “Futuro nelle Alpi”. Te suage de iniziative comunitarie “Dynalp2”, prudelade de rêt di Comuns “Alleaza nelle Alpi”, a son a disposizion 500 mil euros.

[LIBRIS]

Roberto Russi al è l’autôr di “Friuli Venezia Giulia in Mtb”, il volum dedicât di “Ediciclo” di Puart ai miôr itineraris par bicidimont in Friûl e a Triest. L’opare e propon 35 gîrs cun oportunitâts speciâls par fruts e par fameis.

[MUSICHE]

Dai 6 ai 11 di Avost al torne il laboratori liric-teatrâl “I giovani all’Opera”. L’iniziative de clape culturâl “L’ape musicale” e sarà direzude di Claudio Desderi, a Tumieç. Informazions sul “workshop” si cjatilis su la rêt des rêts.