[GLESIE FURLANE]

I grops ecumenics “Sae” (secreteriât ativitât ecumeniche) dal Friûl, dal Venit e dal Trentin si dan dongje a Zui, in Cjargne, li de “Polse di Cougnes” par une zornade di confront su “La Peraule” (Glesie evangjeliche-batiste), “La Comunion” (Glesie catoliche) e “Il Spirtussant” (Glesie ortodosse). La samblee e tacarà a lis 10 di domenie ai 2 di Lui. A lis 17.30 lis voris si sieraran cuntune celebrazion ecumeniche de Peraule.

[GLESIE FURLANE]

E sarà un’edizion cence tantis barcjis e cun mancul int chê dal “Perdon di Barbane” 2006. La profonditât dai cjanâi, difat, no je chê otimâl. La grande fieste de Glesie di Grau e tacarà a lis 8.30 di domenie ai 2 di Lui. L’inmagjin de Reine dai Agnui e partissarà de basiliche e e sarà compagnade de motopescje “Papa Giovanni XXIII” di Donato Antonio Santopolo.

[ART]

Li de cuadrerie comunâl “Luigi Diamante”, te vile Mocenigo di Visopuli, il Comun di Fossalte e la Fondazion “Santo Stefano” a presentin “Versi (di) versi”. La serade e tache a lis 20.45 di domenie ai 2 di Lui.

[ART]

La badie carintiane di Millstatt, vie pai mês di Lui e di Avost, e propon lis “Setemanis musicâls” e il “Forum artistic”. Ju apontaments a tachin ai 2 di Lui, a lis 20.30. Il program complet si cjatilu su la ret.

[CULTURE]

Dai 2 ai 9 di Lui, li di cjase “Zecchin” di Manià Livri, a tornin ju apontaments culturâi dal Istât. Di domenie, Bruno Dorigo al proponarà une mostre di tratôrs di une volte. Martars ai 4 di Lui, a lis 21, Maria Breccia Cipolat e presentarà il libri “Storie friulane di acque, di genti, di agane” (cun leturis di Claudio Busatto e musichis di Patrizia Spadon e di Caterina Miotto). Domenie 9, a lis 11.30, Adriana Marcorin, pitore di Manià, e presentarà la conte “Tunin e Tunin” (cun leturis di Aldo Tomè e musichis di Stefano Durat e di Glauco Toniutti).

[MUSICHE]

Dai 3 ai 10 di Lui a tornin ju apontaments musicâi dal concors internazionâl “Seghizzi”. A saran in Friûl 40 corâls cun mil 600 esecutôrs, 35 cjantants, 21 components di zurì, 10 reladôrs. Pal concors di composizion corâl a son rivadis a Gurize 130 partiduris. I concierts a son programâts a lis 21 dai 6, dai 7 e dai 9 di Lui a Grau; dai 5 e dai 8 di Lui a Gurize. Ai 10 di Lui il municipi gurizan al ospitarà ancje la convigne tradizionâl di studis musicologjics.

[CONVIGNIS]

Lunis ai 3 di Lui, la Provincie di Udin e organize un dibatiment su “Lenghis minoritariis, lenghis nazionâls, lenghis uficiâls te leç 482/99”. La convigne e tache a lis 17.30, li di palaç Belgrado, in place dal Patriarcjât 3. A cjacarin Marzio Strassoldo, Valeria Grillo, Daniele Bonamore (autôr dal volum “Lingue minoritarie, Lingue nazionali, Lingue ufficiali nella legge 482/1999”) e William Cisilino.

[CONCORS]

Si à timp fint ai 11 di Avost par presentâ lis fotos su San Zuan pal concors “Pulcinic par inmagjinis”, par cure de Biblioteche comunâl. I fotografs (no professioniscj) no podaran presentâ plui di 4 fotos ineditis.

[ECONOMIE]

Il ministri pai transpuarts sloven, Janez Bozic, intune convigne cui sindics di Tolmin e di Dreka/Drencje, al à imprometût che il colegament stradâl fra Volce e Solarje al sarà pront dentri dal 2008, garantint il passaç dal teritori di Tolmin a chel de Sclavanie furlane suntune strade slargjade e sfaltade.

[POLITICHE]

Obleât a lassâ il so banc a Gianni Cuperlo, tal indoman di vê otignût l’incarghe di sotsecretari dal ministeri dal Cumierç internazionâl e des Politichis comunitariis, Milos Budin al à lassât la comunitât slovene dal Friûl e di Triest cence il so puartevôs tal Parlament talian. E je la prime volte te storie republicane, al à marcât Bojan Brezigar tun intervent sul cuotidian “Primorski dnevnik”, ch’al à tornât a proponi ancje la cuistion de «rapresentance garantide», stabilide de leç 38/2001.