[CULTURE]

La Magnifiche comunitât di Cjadovri, ai 29 di Avrîl, e à fiestezât i zovins indotorâts vie pal 2005. Il premi consegnât li de abitance di Plêf di Cjadovri – cemût ch’al à marcât il president Callisto Fedon – al rapresente un at simbolic di augûr e di leam cul teritori. Fra i 89 neodotôrs ancje i sapadins Katrin Kratter, Beatrice Kratter e Sandra Puicher Soravia.

[AMBIENT]

La cooperative “Cirignicule” e organize une visite li dal caseifici di Tambre, tal Cansei. L’apontament al è stabilît par vinars ai 2 di Jugn a lis 9 (cun partence di Udin a lis 6.30). A lis 11 si fasarà la visite al “Bar Bianco” e dopomisdì al Museu di archeologjie dal Cuarp forestâl.

[GLESIE FURLANE]

A son viertis lis inscrizions pal piligrinaç a San Florean, par cure dal Institût di storie sociâl e religjose di Gurize. La visite a la Plêf di Dieç e a la mostre dedicade a San Martin e je programade par domenie ai 11 di Jugn. Partence di Gurize a lis 8. Par informazions: 0481 530392.

[MUSICHE]

La rassegne di art corâl par cure de “Comunitât colinâr” e propon i siei apontaments dal mês di Jugn ai 2, ai 9 e ai 16 di Jugn. Ducj i concierts a tacaran a lis 20.45. Li dal auditorium di Majan il prin, cu lis corâls “Picozza” di Dignan e “Amici della Montagna” di Ruvigne e cu l’armoniche di Sebastiano Zorza. Li de glesie di Cjarpât di Dignan il secont, cu “La Nuova Corale” di Cosean e il “Coro Guarneriano” di San Denêl (musiciscj Sebastiano Zorza e Giacomo Pascolini). Ultin apontament ai 16 di Jugn, a Buje li de Cjase de zoventût di San Stiefin, cu lis corâls “Harmonia Mundi” di Trep Grant e “Egidio Fant” di San Denêl.

[GLESIE FURLANE]

La Glesie di Sante Marie de Purificazion di Puart Vieli (tal comun di Puart) e je daûr a fiestezâ i ristaurs de sô glesie. Sabide stade il vescul Ovidio Poletto al à dedicât il gnûf altâr. Vinars ai 2 di Jugn, la corâl “gospel” dal Friûl-V. J. e presentarà a lis 21 un conciert. Domenie ai 4 di Jugn a lis 10 si screin i lavôrs, presint il soreintindint Maioli, e po a lis 11 e vegnarà cjantade messe grande.

[SCUELE]

L’Institût comprensîf di Comeliàns, il I di Jugn al organize il conciert di presentazion dal cd realizât de orchestre di flâts des scuelis secondariis di prin grât dal Cjanâl di Guart. La regjistrazion e je intitolade “the power of music”. Diretôr de orchestre al è il mestri Flavio Serci. Il conciert al tache a lis 20.30 in Fuina.

[SOCIETÂT]

Domenie ai 11 di Jugn, il circul “Don Eugenio Brandl” di Turià e la societât sportive “Karate club 2003” a organizin une gjite a “Gardaland”. Par dâsi in note si à timp fint ai 5 di Jugn. Par informazions: 0481 470549 o 338 8296122.

[TEATRI]

Il spetacul di Bruna Braidotti e di Bianca Manzari “Italia” al è dedicât al LX cjadalan de prime partecipazion des feminis talianis a lis votazions (ai 2 di Jugn dal 1946: referendum monarchie/republiche e constituente). L’opare e ven proponude vinars ai 2 di Jugn a lis 21, li dal teatri di Pulcinic, par cure de companie di “Arti & Mestieri”.

[MUSICHE]

La colaborazion fra “Polifonica friulana Jacopo Tomadini” e Comun di San Vît e la partecipazion dal Conservatori di Como a rindin il tradizionâl conciert di San Vît dal Tiliment pai 2 di Jugn un apontament fûr dal ordenari. I musiciscj dal institût musicâl di Como a proponaran i madrigâi di Claudio Monteverdi, gjavâts fûr dal VI libri. Il spetacul al tacarà a lis 17.30, li dal teatrut dal 1700.

[MUSICHE]

La “Scuele di musiche” di Mortean, vinars ai 2 di Jugn, e propon un conciert dai soliscj dal teatri “Alla Scala” di Milan, a lis 20.45 li de glesie de Trinitât. Il benvignût ai artiscj milanês lu an preparât la corâl de scuele e la ”Ugo Pellis” di Cjasteons.