[GLESIE FURLANE]

Domenie ai 2 di Avrîl, te suaze des celebrazions pe “Fieste nazionâl furlane”, li dal dom di Cormòns a lis 10.45, i vicjaris gjenerâi des Glesiis furlanis di Concuardie, di Gurize e di Udin a cjantin messe, compagnâts de corâl “Sant Adalbert”.

[CULTURE]

Il Comun di Aquilee, cu la Pro loco e cun “Glesie furlane”, al dediche la fieste dai 3 di Avrîl a la riflession sul teme “Tes venis maestris dal timp il nestri mût di jessi”. I apontaments programâts a colaran ducj domenie 2. A lis 10 in municipi si presentin il volum dai ats di “Incuintris di popui e culturis-La ascesi tai prins secui dal cristianesim” e il cd “I mosaics de basiliche di Aquilee”. A 12.15 conciert di otons in place dal Cjapitul. A lis 15 presentazion dal ristaur de ancone de Madone dal Rosari. A lis 16.30 li dal municipi, Antoni Beline al cjacare dal titul de zornade e po al cjante messe cui predis di Glesie furlane, li de basiliche patriarcjâl a lis 18.30. Si siere cuntune serade culturâl par cure dal institût “Achille Tellini” (leturis dal grop “I Viandants” e cjantis di Alessandra Kersevan.

[MOSTRIS]

Intant de fieste nazionâl dal Friûl, la Pro loco di Aquilee, domenie ai 2 di Avrîl, e propon un marcjât dal artesanât, di libris par fruts e dal libri par furlan (li de Pinacoteche cu la colaborazion de Scuele elementâr). Apontaments tes contradis Caligareciis, Pons Piscariae e Platea Vetus.

[SCUELE]

Domenie ai 2 di Avrîl, a lis 10 li dal auditorium “Concordia” di Pordenon, il Centri iniziativis culturâls al organize la premiazion dal concors “Videocinema&Scuola”, rivât a la XXII edizion.

[DIASPORE]

Domenie ai 2 di Avrîl, a Mortean li de vile di Varmo, Comune e svareadis realtâts culturâls a proponin une zornade par cognossi esperiencis e relazions fra furlans d’Argjentine e argjentins dal Friûl. L’apontament al tache a lis 11 e al tire adilunc fint dopomisdì.

[POLITICHE]

La citât di Udin e fiesteze i 3 di Avrîl memoreant Fausto Schiavi, president e strissinadôr dal prin “Moviment Friûl”. A lis 10.30, in vie Palladio, si scree une lapide sul palaç là ch’e jere l’abitance dal moviment autonomist te ete di pre’ Checo Placerean, di Corrado Cecotto, di Gino Di Caporiacco, di Gianni Nazzi e di Gianfranco Ellero. A lis 17, po, li dal cine “Visionario”, presentazion de opare “La Patrie dal Friûl”, par cure di Franco Fabbro e di Lorenza Vorano.

[SCUELE]

Centri d’iniziative democratiche dai insegnants e Comunitât montane de Cjargne, lunis ai 3 di Avrîl, a proponin la convigne “La scuola che vogliamo”, par tirâ dongje «ideis e propuestis pal avignî de scuele». Lis voris a tachin a lis 16, li de de sale riunions de Comunitât montane a Tumieç. Si cjacararà di autonomie scuelastiche, di continuitât, di “curriculum” verticâl, di dispersion scuelastiche, di adolessence e di preadolessence.

[SALÛT]

Il fondadôr dal “Gruppo Abele” di Turin e di “Libera”, associazion cuintri des mafiis, pre’ Luigi Ciotti, lunis ai 3 di Avrîl al è in Cjargne par une convigne li de sale San Jacum di Paluce, inmaneade di Franco Corleone, te suaze de sô campagne eletorâl pes votazions provinciâls. Il dibatiment su «40 agns de bande dai debui e dai emargjinâts» al tache a lis 20.

[POLITICHE]

Il sucès furlanist tal referendum di Cint e la mobilitazion in chei altris Comuns dal Friûl concuardiês ancjemò sot di Vignesie (Concuardie, Cjaorlis, Danon, Fossalte, Puart e San Stin) al à dismot – alfin – ancje l’interès dai candidâts furlans a lis elezions politichis. Flavio Pertoldi dal centri-sinistre al à declarât di no capî «cemût mai che un guvier “des libertâts” al piert la pazienze se i citadins a pandin opinions e sieltis. Cence drams, lis dôs zontis regjonâls in convigne, finidis lis votazions, a varessin di frontâ la cuistion». Di chê altre bande i candidâts dal centri-drete Renzo Tondo e Roberto Asquini ancje lôr a an marcât la necessitât di vierzi une discussion, evitant lis polemichis e lis baricadis. «La domande di passâ Regjon – pai 2 sorestants – e va guviernade».

[SCUELE]

Cu la presentazion a la stampe di martars ai 4 di Avrîl, a lis 11.30 li de Fondazion “Crup” a Udin, e partìs la gnove edizion di “Start Cup”, al ven a stâi il concors par “business plan” da l’Universitât furlane. L’edizion di chest an, promovude simpri de Fondazion de Casse di sparagn furlane, e smire di profondî lis colaborazions dal Ateneu cun “Agemont”, “Confartesanât”, “Assindustrie” e “Coldiretti”.