[SCUELE]

Universitât pe ricercje, util e responsabil: cheste e je l’Universitât dal Friûl, 28 agns daspò de sô fondazion e dal so strasordenari svilup. Par onorâ la sô organizazion e la sô mission di «motôr di svilup teritoriâl», il I di Març a son rivâts a Udin i puartevôs dai Ateneus di Banja Luka, Bolzan, Bratislave, Bucarest, Clanfurt, Cjaodistrie, Cracovie, Hyderabad, Iasi, Maputo, Maribor, Osijek, Padue, Szombathely, Timisoara, Trent, Triest, Verone, Vignesie e Yaondé.

[SCUELE]

La comunitât e je une «componente essenziâl dal sistem di riferiment di un’Universitât moderne; e je interlocutôr speciâl, ch’al puarte valôrs e perspetivis preciosis e che no si pues sostituî». Dome s’e ten cont de Patrie cussì – al à dit il retôr Furio Honsell il I di Març, screant a Udin il XXVIII an academic dal Ateneu furlan – «la nestre Universitât e sint di realizâ la sô mission statutarie e di rispuindiur a la passion e a lis spietis dal Friûl e dal popul furlan che, tal indoman dal taramot dal 1976, al à volût tacâ la riconstruzion dal sô paîs no des cjasis, ma dai puescj di vore tes fabrichis e fasint sù la “fabriche de cognossince”, al ven a stâi l’Universitât».

[SCUELE]

Ancje chest an, il il retôr Furio Honsell screant a Udin il XXVIII an academic dal Ateneu furlan, il I di Març, al à cjacarât par furlan, par sloven, par anglês e par talian. Par furlan al à dit: «Pocjis peraulis di salût a ducj, a non dai professôrs, dai students, dal personâl de Universitât di Udin e dal Friûl, par fâ sunâ in cheste zornade speciâl jenfri i mûrs de sole universitât in tiere ladine la melodie de lenghe dal lûc». E al à motivât: «L’Universitât furlane e crôt che il plurilenghisim al sedi un patrimoni fondamentâl e che la sô promozion e sedi une responsabilitât tai confronts di dute l’umanitât».

[ECONOMIE]

Li de cooperative di Bresse di Cjampfuarmit, joibe ai 2 di Març, il Coordenament regjonâl tra i Comitâts pe ministrazion disseparade dai Ûs civics e i Consorzis di comunions familiârs des Tieris coletivis si da dongje a lis 18 par fâ bon il statût de “Consulte taliane de Propietât coletive”, ch’e vegnarà metude sù a Rome ai 7 di Març cu ven.

[CINE]

Cuatri lezions li dal cine “Visionario”, ai 2, ai 9, ai 16 e ai 23 di Març (17.30-19.30), a son la propueste dal cors d’inzornament sul lengaç cinematografic par insegnants par cure dal “Centri espressions cinematografichis”. Professôrs a saran Giorgio Placereani e Luca Giuliani.

[TEATRI]

Joibe ai 2 di Març, il balet e l’orchestre dal “Sng” di Maribor” a presentin “La bella addormentata” direzude di Dinko Bogdanic. Il spetacul al tache a lis 20.45, li dal teatri “Verdi” di Gurize, te suaze di un progjet di cooperazion transconfinarie fra Gurize e Nova Gorica.

[CONVIGNIS]

Il professôr Giorgio Campanini, joibe ai 2 di Març, al è stât invidât a Udin de Scuele catoliche par cjacarâ dai cristians te societât atuâl, tra intimisim e militance. La lezion e tacarà a lis 18, li dal Centri culturâl “Paolin d’Aquilee” di borc di Trep.

[CONVIGNIS]

La schirie di convignis su l’atualitât civîl, sociâl e culturâl, par cure dal “Centri talian feminin” dal Cjanâl de Bût e de Cjargne, joibe ai 2 di Març, e propon une riflession dal zinecolic Mario Gasparini su “Abort: aspiets miedis, psicologjics, legâi e etics”. A lis 20.15 li de Scuele D’Aronco di Paluce (ex “Irfop”).

[CULTURE]

La riflession dai “Colonos” sul Nûfcent, vinars ai 3 di Març a lis 20.30, e propon un confront cun Guido Crainz e Maria Carminati, biel che Claudio Cojaniz al sune il pianoforte.

[GLESIE FURLANE]

La Glesie di Concuardie-Pordenon, intant de Coresime dal 2006, e je impegnade a rifleti su la condizion dai presonîrs. Domenie ai 12 di Març, dutis lis Parochiis dal Friûl ocidentâl a rifletaran su lis domandis “Cuale preson? Cuale justizie?”. Sabide 18, la Diocese e organize une convigne a Pordenon, ch’e finissarà cuntune prucission devant des presons dal cjiscjel. Tal indoman, domenie 19, fieste a Cordenons cui ex presonîrs de cooperative “Oasi”.