[LIBRIS]

“Glesie furlane” e à publicât l’ultin libri di pre’ Antoni Beline, tradutôr de Biblie e diretôr dal mensîl “La Patrie dal Friûl”. Al è intitulât “…et incarnatus est” e al è il numar 3 de golane “Risultivis”. Tal saç, pre’ Beline al propon «la sô perspetive su la Glesie, sul so mût d’intindi il struc de religjon cristiane, des struturis e dai ministeris gleseastics», cemût ch’e marche te jentrade Maria Cristina Bartolomei de Universitât di Milan.

[ECONOMIE]

Par puartâ l’autostrade “A27” fin dilà des Alps, il Venit al smire di passâ pal Cjadovri e pe Cjargne, daspò di vê ricevût un biel «Fertic!» dal Trentin e dal Sud Tirol. Il progjet dal guviernadôr Galan al è un colegament cu la “A23” passant pe Maurie e pal Cjanâl dal Tiliment, cu la benedizion dal guviernadôr triestin Illy. Il judizi de “Magnifiche comunitât di Cjadovri” sul progjet al è ferbint. «Ovviamente gli amministratori locali non sono stati interpellati e nemmeno è stato redatto un progetto – al à scrit il n. 11 dal sfuei “Il Cadore” –, si continua con proclami elettoralistici e promesse mirabolanti di opere poco costose e ad impatto ambientale nullo».

[ART]

Lunis ai 2 di Zenâr, li de sale “L’Alpina” di Comeliàns a lis 20.30, si presente il documentari “San Florean dai Plans” di Wally Agostinis e di Bruno Romanin, promovût dal Comun te suaze di un progjet de rêt europeane “Alleanza nelle Alpi”. L’opare, montade di Gianni Fachin de societât “Imbellinum”, e presente l’art e lis tradizions des comunitâts di Povolâr e di Maranzanis e la liende dal lôr protetôr, san Florean di Lorch.

[ECONOMIE]

Tal lûc internet: www.neprovalter.org a son presentadis lis conclusions dal progjet “Rêt des produzions agriculis carateristichis pe valorizazion e pe cognossince dal teritori alpin”. Te iniziative a jerin ingaiadis lis Regjons Friûl-V. J., Carintie, Slovenie, Venit, Ligurie, Val d’Aoste, Provincie di Bolzan e institût Hblfa dal Staiar.

[CONCORS]

Dentri dai 19 di Mai a an di rivâ li dal municipi di Cordenons i cines ch’a cjapin part a la IV edizion dal “Premi Renato Appi”, in onôr dal inteletuâl cordenonês. Par informazions sul concors si pues domandâ il Comun di Cordenons (0434 932725).

[NAZIONS]

La Cjase pa l’Europe di Glemone, cul Centri europeu d’informazion “Pld Eurodesk”-Informezoventût e je vierte martars, joibe e vinars, des 15 a lis 19. I uficis a son a Glemone, in place dal Fier 9 (0432 972016).

[MOSTRIS]

La citât di Cividât, fint ai 29 di Zenâr, e presente li de glesie di Sante Marie “dei Battuti”, la mostre di Dora Bassi “La leggenda d’oro”. E restarà vierte vinars (16-19.30) e sabide e dîs di fieste (10-12.30 / 15-19.30).

[DIASPORE]

Apontament tradizionâl pe comunitât slovene de provincie di Udin. La dì di Pasche Tafanie, ai 6 di Zenâr, si celebre la zornade dai emigrants. L’apontament al tache a lis 15, li dal teatri “Ristori” di Cividât.

[CINE]

Vinars ai 6 di Zenâr, la Pro loco di Mueç e presente il cine par furlan “Âstu mai pensât di sposâti… in Comun?!”. Proiezion a lis 15 e po tombole par ducj. A lis 20.30, li de glesie de Transfigurazion, si siere la fieste di Pasche Tafanie cul conciert corâl “Nadâl in viaç”. A cjantin la Corâl di Mueç, la corâl “Tre valli” di Cravar e la corâl “Panarie” di Dartigne.

[MUSICHE]

La dì di Pasche Tafanie, ai 6 di Zenâr, la Scuele di musiche di Puçui e propon il saç scuelastic e chel de corâl de scuele mezane. Apontament a lis 16 li dal auditorium “Ipsa”.