[POLITICHE]

I referendums par mudâ Regjon a puedin jessi vinçûts, ancje cuintri de burocrazie e dai regolaments cuintriconstituzionâi. Un incoraziment ai furlans dal Mandament di Puart ur rive dal Comun belumat di Lamon, 3 mil 800 abitants, daprûf des Dolomitis di Primiero-San Martin, innomenât pai siei fasûi. Lassù il referendum par sindilâsi cu la Provincie di Trent al è passât, nocate l’oposizion mastine dal president venit Giancarlo Galan, ch’al à tornât a tacâ lis Regjons a statût speciâl. Pal sotpresident de zonte regjonâl venite, Luca Zaia, invecit, il vôt di Lamon «al pant la volontât di autonomie e di federalisim che, in veretât, ducj i venits a an tal cûr. Al è sbaliât fâ la vuere cuintri di Trent e di Bolzan, parcè che il vêr nemì al è il stât centralist roman».

[MOSTRIS]

E tire adilunc fint ai 4 di Decembar, l’esposizion fotografiche “Vita delle cose”, cu lis inmagjinis su la civiltât contadine dedicadis al mestri Ettore Guatelli. La mostre, curade di Riccardo Toffoletti, e je imbastide li dal centri di educazion ambientâl di Mulin Cocconi (oraris: sabide e dîs di fieste 10.30-12.30 /15-18).

[LIBRIS]

Miercus ai 2 di Novembar l’editôr di Puart “Ediciclo” al cure l’anteprime taliane dal ultin libri di Emilio Rigatti. A lis 18, li de librarie “Mondadori” di Vignesie, si presente “Yo no soy gringo. Taccuini sudamericani di coincidenze, truffe e piccoli miracoli”. La vore dal scritôr-ciclist-insegnant gurizan e je inlustrade di Francesco Tullio Altan.

[DIASPORE]

Dai 3 ai 15 di Novembar, Barcelone e propon “L’acuile e il drâc”, une “Sierade furlane” di culture e di apontaments inmaneade dal Fogolâr de capitâl catalane cul jutori dal Institût talian di culture, de Cjase dai talians di Barcelone e dal Consolât d’Italie. Il program si cjatilu su la rêt.

[TEATRI]

Tal cjadalan de muart dal poet di Cjasarse, Pieri Pauli Pasolini, Teatri Gnûf, Teatri Club e Comun di Udin a presentin une schirie di manifestazions par onorâ l’inteletuâl furlan. Ai 3 di Novembar convigne li dal teatri cun Gianfranco Scialino, Ippolita Nigris Cosattini e Giacomo Trevisan; domenie 6, Giovanna Marini e presente il spetacul “Le Ceneri di Gramsci”; sabide 29, li dal Palamostre, al torne a Udin Andrea Centazzo cu l’opare “Le ombre e il silenzio”.

[TEATRI]

Joibe ai 3 di Novembar, il teatri stabil furlan pe sperimentazion “Centri servizis e spetacui” al presente al public la seson 2005-06 di “Teatro Contatto”, ch’e je stade intitolade “Cibo nutriente”. Apontament a lis 23, li dal circul “Pàbitelè” di strade Fiume 13, a Udin.

[POLITICHE]

Un dibatiment su la “democrazie malade”, ai 2 di Novembar, al à screât la schirie di apontaments dal “Centri internazionâl Luigi Sturzo” dedicade al rinovament de democrazie tal timp de globalizazion. Lis convignis a vegnaran fatis li de Facultât di Economie de Universitât furlane (in vie Tomadini 3/a aUdin) ai 9, ai 16, ai 23 e ai 30 di Novembar e po ai 7 di Decembar, a lis 18.

[MOSTRIS]

Fint ai 6 di Novembar, li dal vieri covent di San Francesc e li dal Museu des siencis, a Pordenon, e je vierte la IX edizion di “Scienzaarteambiente per un mondo di pace”. Par informazions su lis propuestis pes scuelis: 0434 392315.

[AMBIENT]

Vinars ai 4 di Novembar, sot de Comunitât montane di Tumieç, il “Comitât difese dal teritori” al organize un’altre manifestazion cuintri dal eletrodot. L’Ent comprensoriâl, difat, svicinantsi la decision finâl di Rome su la linie eletriche di 220 mil volts ch’e varès di colegâ la Carintie cun Osôf, passant pal cjanâl de Bût, al decît cemût jessi rapresentât e par dî ce. La proteste e tache a lis 17; po a lis 21, si fasarà ance une convigne publiche a Paluce, li de sale San Jacum.

[SALÛT]

Ancje i passe 260 Clubs dai alcoliscj in tratament dal Friûl, dai 4 ai 6 di Novembar, a cjapin part al congrès talian dai Clubs ch’a puartin indevant la metodologjie ecologjiche e sociâl pal tratament dai problems leâts cul alcul elaborade dal professôr crauat Vladimir Hudolin. La convigne e je programade a Salsomaggiore Terme.