[NAZIONS]

Il circul cultural cividalìn “Ivan Trinko”, prime associazion culturâl Slovene de provincie di Udin, al fiesteze 50 agns di fondazion. Domenie ai 2 di Otubar, a lis 16, a Cividât in vie 9 Agosto, si fasarà la samblee celebrative e l’incuintri cui socis fondadôrs. A lis 18, li dal teatri “Ristori”, la fieste e larà indevant cuntun conciert dal grop macedonic “Kocani orkestar”.

[SCUELE]

Domenie ai 2 di Otubar, e torne la fieste dal “Marconi”, il coleç di Puart di strade dal ’Seminari 34. A son invidâts scuelârs, gjenitôrs, insegnants e amîs. Informazions su la rêt des rêts.

[AMBIENT]

“Biodomenie”, la zornade taliane de biodinamiche, e torne domenie ai 2 di Otubar. L’Aprobio e organize une zornade di mostris, di marcjât, d’informazion e di apontaments culturâi a Udin, in Marcjâtvieri des 9.30 a lis 19.

[NAZIONS]

Dai 27 di Setembar ai 2 di Otubar, la citât francese di Cahors e à organizât la manifestazion “Visages de la Slovénie”, par proponi dutis lis manifestazions de culture Slovene contemporanie. Fra i invidâts ancje il progjet di “Postaja Topolove”.

[ECONOMIE]

Il Comun di San Vît dal Tiliment al propon l’eletrificazion de ferade Cjasarse-Puart e al domande l’impegn di ducj i Comuns interessâts, de Provincie di Pordenon e de Regjon. A chest pro al è stat votât un ordin dal dì firmât di Gennaro Di Bisceglie, di Giobattista Scodeller e di Stefano Lena.

[SPORT]

La furlane Martina Fabello, 36 agn di Udin, socie dal “Aeroclub Far East”, e je in Californie par tentâ il record mondiâl di paracadutisim in grande formazion feminine. Tal mês di Zenâr altris 6 socis de clape, ch’e promôf il “Parco del volo” di Cjampfuarmit, a tentaran il record masculin in Tailandie cun altris 400 paracadutiscj di dut il mont.

[AMBIENT]

Mulins, acuedots, cjanâi pe irigazion a saran visitâts domenie ai 2 di Otubar intant de zornade “Dentri dal paisaç” par cure di “Legambiente”. Apontament a lis 9 a San Florean di Buje. A Ospedâl piçul di Glemone si visitarà ancje il Centri di educazion ambientâl di Mulin Cocconi.

[AMBIENT]

“Legambiente” e Comun di Pordenon, domenie ai 2 di Otubar, a organizin la IV edizion di “Voganoncello”. La manifestazion e tache a lis 9.30 li dal imbarcjadôr Marcolin. Po lis canois a a laran jù pal flum fin al puint di Adamo ed Eva. A lis 11 visitis naturalistichis guidadis e merendìn biologjic. Vie pe zornade a vierzaran “stands” e mostris.

[POLITICHE]

Intervistade de television privade “Telequattro” di Triest, l’assessore comunâl ai Servizis sociâi e sanitaris di chel Comun, Claudia D'Ambrosio, e à dite che il so assessorât al à 450 dipendents.

[INFORMAZION]

Gnûf record di visitis pal lûc internet dal mensîl “La Patrie dal Friûl” – www.friul.net –. Vie pal mês di Setembar 16 mil 931 navigadôrs di dut il mont a an sielzût l’informazion par furlan e sul Friûl ufierte dal puartâl coordenât di Ricart Urban e di Sandro Campigotto.