[POLITICHE]

Il Comitât pal passaç in Friûl dal Comun concuardiês di Tei, ai 27 di Avost, al à consegnât al sindic Mestriner lis firmis necessariis par domandâ il referendum. Cumò i tocje al Consei comunâl di deliberâ la domande formâl de consultazion popolâr a la Cort di cassazion. Si scrupule che il referendum “pro Friûl” al podarà jessi fat te Vierte dal an cu ven, cuant ch’a votaran ancje i citadins di Cint e di Pramaiôr. A Gruâr, impen, si è ancjemò daûr a tirâ sù lis firmis.

[TEATRI]

Provincie di Pordenon e associazion “Ortoteatro”, vinars ai 2 di Setembar a lis 21, a presentin a Frisanc (place Centrâl) il spetacul “Il saltimbanco racconta”, produsût dal “Centro teatrale Corniani” di Mantue e di “Mnimax” di Valencia. Par informazions: 0434 961052 o 348 3009028.

[MUSICHE]

Dai 2 ai 11 di Setembar, la rassegne musicâl dal Friûl orientâl “Squarci Rock” e presente i siei apontaments intant de “Sagra de le raze” di Starançan. A son programadis 8 seradis cun concierts a lis 22 di sere, daûr de biblioteche.

[MOSTRIS]

Il Museu di Tumieç al ospite, dai 2 di Setembar ai 23 di Otubar, la mostre “Il pizet in Crauazie”, imbastide cu la colaborazion dal Museu etnografic di Zagabrie. L’esposizion e restarà vierte ducj i dîs de setemane (gjavât lunis), 9-13 / 15-18.

[GLESIE FURLANE]

Sabide ai 3 di Setembar, lis Glesiis furlanis di Gurize e di Udin si dan dongje cun chês slovenis di Lubiane, di Maribor e di Koper/Cjaodistrie e cun chê carintiane di Clanfurt pal “Piligrinaç dai 3 popui”. L’apontament al sarà li dal santuari di Monsante/Sveta Gora di Gurize. La messe grande, cjantade dai vescui e tacarà a lis 11.

[ECONOMIE]

Dai 3 ai 11 di Setembar, il cuartîr fieristic di Pordenon al presente “Multifiera”. Di chê strade, la Confartesanât dal Friûl ocidentâl e propon il Salon dal artesanât di Alp Adrie e la Zornade dal artesanât.

[DIASPORE]

Alessio Cecon di Cormòns e Luciano Specogna di Cividât a son lis 2 vitimis furlanis de tragjedie di Mattmark, ch’a vegnaran memoreadis ai 3 e ai 4 di Setembar in Svuizare. Ai 30 di Avost dal 1965, 88 operaris ch’a jerin daûr a fâ sù une dighe te localitât alpine a forin sapulîts di un slac di tiere e di glace. In plui dai 2 furlans, si contarin 54 talians muarts, 27 svuizars, 2 todescs, 2 spagnûi, 1 austriac e 1 operari cence sotanance.

[CONVIGNIS]

E tire adilunc fint ai 7 di Setembar, la convigne internazionâl “Active roles of the organism in biological evolution”, inmaneade de Facultât di agrarie de Universitât furlane. Lis voris a son programadis li dal Convit “Pauli Diacul” di Cividât. Lunis ai 5 di Setembar, a lis 18, la session e sarà logade li de glesie di Sante Marie cun intervents di Patrick Bateson, di Marcello Buiatti, di Telmo Pievani e di David Hoptam.

[LIBRIS]

Sabide ai 3 di Setembar, li dal Centri culturâl “Casa Antonio Zanussi” di Pordenon, si presente il volum cui corsîfs di pre’ Luciano Padovese, saltâts fûr par 20 agns sul mensîl “Il Momento”, firmâts “Ellepi”. A lis 18.30, a cjacarin de opare Elio Bartolini, Giancarlo Pauletto, Fulvio Dell’Agnese e l’autôr.

[SCUELE]

Te suaze des manifestazions inmaneadis de “Societât filologjiche furlane”, sabide ai 3 di Setembar, li dal centri culturâl di Soclêf, e ven organizade une serade in memorie dal mestri Romualdo Fachin, furlanist e ideatôr de rassegne dal artesanât cjargnel. Intant de convigne, ch’e tacarà a lis 20.30, al sarà presentât ancje il libri “La strada bianca” di Luigi Pittino.