[AMBIENT]

Martars ai 2 di Avost, a lis 9 di buinore devant dai uficis regjonâi di Udin (in vie San Francesc), il comitât “Assieme per il Tagliamento” al proteste cuintri de decision de Regjon di no spietâ la fin des audizions prin di convocâ la comission ch’e varà di esprimisi su lis cassis d’espansion. La domande di spietâ ancjemò par podê fâ altris verifichis le an fate ancje i sindics dai 5 Comuns interessâts de contestade opare idrauliche.

[SOCIETÂT]

Ancje lis Caritas dal Friûl a son mobilitadis par socori i rumens colpîts des montanis dal mês di Lui. Lis regjons plui colpidis a son chês dulà ch’a son logâts cetancj dissindints dai furlans emigrâts in Rumenie tai timps dal imperi austroungaric (Bacau, Braila, Galati e Vrancea).

[CINE]

E comence a Grau la II edizion di “Lagunamovies”. Lis proiezions a laran indevant dai 2 ai 16 di Avost. Il program lu à prontât Sergio Naitza e al è curât di “Volpe&Sain”.

[DIASPORE]

In prevision de “Convention de furlanetât pal mont”, che si fasarà ai 6 di Avost a Monfalcon, il Comun de citât dai cantîrs navâi al premiarà il Fogolâr monfalconês e l’Ent Friûl pal Mont. Une ceremonie di pueste e tacarà a lis 17.30 di martars ai 2 di Avost, li dal municipi. A lis 18.30 si larà indevant tal program screant 3 mostris, imbastidis li de Galarie comunâl di place Cavour: cu lis voris di Aldo Bressanutti, sul viadot “La Polverilla” di Salta in Argjentine e su la resistence in Friûl e a Triest.

[CINE]

Dai 2 ai 25 di Avost, “Cinemazero” al presente a Pordenon li de “aula magna” dal Centri studi une rassegne sul cine di fantassience european. Lis peliculis proietadis a son stadis ziradis fra 1955 e 1971.

[MUSICHE]

Li dal “Bar Elite” di Udin, in place San Jacum, la clape “Musicistitrevenezie” e propon une schirie di apontaments pal mês di Avost. Si tache martars 2 cul “Rock Blues Trio“ di Marco Locatelli, di Giulio Biasinutto e di Alessandro Dri e si larà indevant martars 16 cun “Mas-que-nada”. I concierts a tachin a lis 21.

[CORS]

Il “Servizio informaestero” dal “Irse” di Pordenon al segnale un cors di gaelic, dai 17 ai 22 di Avost. Lu organize la “Ionad Foghlama Chléire su l’isule di Cape Clear.

[CONVIGNIS]

Vie pal mês di Avost, la XVI edizion dal “Agosto archeologico” in Cjargne e propon lis sôs convignis a Davâr (lunis 1, oris 20.30, glesie di San Martin); a Sauris Disore (joibe 4, 18.30, Centri etnografic); a Malburghet (miercus 10, 20.30, palaç vinizian); a Verzegnis (vinars 12, 15, place dal municipi); a Raviei (sabide 20, 17, ex asilo); a For Disore (vinars 26, 15, place dal municipi).

[POLITICHE]

«Ovviamente nessuno ci ha interpellati per decidere questo riparto. So perché lo ha riportato la stampa che la delibera di giunta ha penalizzato le tre province del Friuli». Cussì il president dal consei des autonomiis locâls, Giorgio Brandolin, al à comentât sul cuotidian di Udin la decision dal guvier Illy di concentrâ a Triest il 56% des contribuzions regjonâls destinadis a l’inovazion. La linie de zonte e je stade contestade ancje dal president de Confindustrie regjonâl, Piero Della Valentina, e dai sindicâts. «Da tempo Cgil, Cisl e Uil ripetono che le leggi riguardanti il lavoro non sono accompagnate dalla giusta attenzione nei confronti di Udine», al à motivât Natalino Giacomini secretari de Cgil dal Friûl udinês.

[POLITICHE]

Il Consei d’Europe al domande che ducj i Paîs aderents e i stâts osservadôrs ur concedin i derits eletorâi locâi a ducj i citadins, cence condizion di residence, di nazionalitât e di etnie. Cui ch’al paie lis tassis al varès di podê votâ e di jessi votât.