[SALÛT]

Vinars I di Lui, a Pordenon, si presentin i risultâts de campagne di prevenzion alcologjiche fate li dal “Deposito Giordani” fra Avrîl e Mai. Mil e 500 personis, fra i 15 e i 40 agns, a son stadis sensibilizadis sul abûs di bevandis alcolichis; 261 a an fat l’alcul-test e 108 a an cjapât dai biliets omaç o dai cd par vê pandût compuartaments adatâts. L’iniziative le à inmaneade il Servizi di alcologjie de Ass Friûl ocidentâl, cun Comun di Pordenon e “Deposito Giordani”, Acat, Crôs rosse e Coop consumadôrs Nordest.

[SALÛT]

Dal I ai 14 di Lui, li dal covent di San Francesc di Pordenon, e reste vierte la mostre “MosaicaMente: percors di mosaic te citât di Pordenon”. La rassegne, screade a lis 17.30 di vinars, e presente i risultâts dal laboratori artistic organizât de Fondazion fruts e autisim onlus cul Comun e cu la Scuele mosaiciscj dal Friûl di Spilimberc. Daspò dai 14 di Lui, li oparis si podarà rimirâlis li dal “Showroom dell’Officina dell’Arte” in vie Molinari 41.

[AMBIENT]

Il Comitât pe protezion dal ambient alpin al organize une convigne par discori su l’emergjence eletrodots. “Teritori, popolazion e svilup industriâl. Puedino coabitâ?” al sarà il titul dal confront, ch’al tache a lis 20.30, li de Comunitât montane di Glemone, vinars I di Lui.

[ECONOMIE]

I parlamentârs leghiscj Pietro Fontanini e Francesco Moro, cul conseîr regjonâl Alessandra Guerra, vinars I di Lui, a organizin une convigne publiche su la crise dal “Triangul de cjadree”. Int e operadôrs economics a son invidâts a lis 20.30, li dal ristorant “Da Menotti”, a Solescjan di Manzan.

[MUSICHE]

Il I e i 2 di Lui, li de badie di Sest, e ven organizade la tradizionâl rassegne regjonâl di jazz. A lis 21, a sunaran, vinars il “Quintetto Echos”; sabide il “Quintetto Namòs”. Diretôr artistic de manifestazion al è Armando Battiston. Si jentre sore nuie.

[MOSTRIS]

Dal I ai 31 di Lui, a Monfalcon li de Galarie d’art contemporanie e di “Altern’art” e a Roncjis di Monfalcon li di vile Vicentini, e restarà vierte la mostre “Pino Furlan… quello che ha fatto l’uomo”. “Altern’art” e la Galarie a son viertis ducj i dîs (gjavât lunis) des 18 a lis 21. Vile Vicentini di lunis fin vinars (10-13) e lunis e miercus ancje des 16 a lis 19.

[MUSICHE]

Te suaze di “Hic et nunc 2005”, il percussionist osovan U. T. Gandhi, cun Nevio Zaninotto, Luca Zampar e Marta Bevilacqua, al propon il conciert “Universal Tribes”. Il spetacul al tache a lis 21 li dal auditorium civic di San Vît dal Tiliment, vinars I di Lui.

[MUSICHE]

L’associazion “Musicisti Tre Venezie”, in colaborazion cul ambient di Buri “Enoteca”, vie pal mês di Lui, e organize une schirie di concierts ch’a tacaran a lis 22. Il calendari al propon: Barbara Errico e Arno Barzan il I di Lui; Alex Johnson ai 8; Alberto Chicayban ai 15 e Rocco Burtone ai 29.

[SCUELE]

Sabide ai 2 di Lui, a lis 20.30 li de scuele “Giuseppe Marchetti” di Glemone, si presente il “Progjet Cosacchi”. L’ativitât di ricercje dai students dal institût glemonat in colaborazion cui scuelârs dal liceu-gjimnasi di Krasnodar te Russie di Misdì e je stade publicade su la rêt a la direzion www.itcmarchetti.net. Di chê strade de presentazion a saran un Friûl i puartevôs de scuele russe cu l’insegnante Valentina Pavlovna.

[MUSICHE]

Te suaze dal progjet “Meditazions sacradis”, il “Coro Polifonico” di Rude al fiesteze 60 agns di ativitât musicâl. Il conciert celebratîf al tacarà a lis 21 di sabide ai 2 di Lui, li di vile Iachia, a Rude. A saran presints i mestris e i coriscj che par tancj agns a an tignût sù il grant e innomenât complès.