[ECONOMIE]

Dai 2 ai 4 di jugn, il Club universitari di Clanfurt al torne in Friûl pal so simposi anuâl. La convigne si fasarà li de Badie di Rosacis (Manzan) cu la partecipazion di uns 80 “manager” e sorestants. La cuistion ch’a varan di frontâ, guidâts di une desine di academics, e je: “Lis bramis dal Homo oeconomicus e i siei limits”.

[DIASPORE]

La Regjon e à metût su la rêt un gnûf lûc internet dedicât a emigrants e ai rimpatriâts. La direzion e je: www.emigrazione.regione.fvg.it, dulà che si cjatin informazions e documentazions par mantignî i leams cul Friûl o cun Triest o par tornâ a insedâsi te Regjon.

[GLESIE FURLANE]

Joibe ai 2 di jugn, i 2 mil 870 catechiscj de Glesie udinese a son invidâts a la lôr samblee diocesane. Li dal institût “Tomadini” di Udin, des 9.30, si confrontaran su la cuistion: “Comunicâ il Vanzeli intun Friûl ch’al gambie”.

[SOCIETÂT]

Dai 2 ai 6 di Jugn, a San Zorç e torne la fiere “ItinerAnnia tra gust e art”. La manifestazion e cjape dentri 7 Comuns de Basse: Cjarlins, Cjasteons di Strade, Maran, Muçane, Porpêt, Tor di Zuìn e San Zorç proponint gastronomie, artesanât tradizionâl e artistic, agroalimentâr e ecoturisim.

[CINE]

Li dal “Kinoatelje” di Gurize, a van indevant lis proiezions di “Heimat”, l’opare cinematografiche di Edgar Reitz. Apontament cui episodis 5 e 6 de tierce schirie joibe ai 2 di Jugn e martars ai 14 di Jugn.

[ECONOMIE]

Dai 3 ai 5 di Jugn, a Tei, tal Friûl concuardiês sot di Vignesie, si torne a fâ la manifestazion “Etichementri”: fin de setemane dedicât al avignî sustiginibi, a l’economie di justizie e ai derits dai popui. A rivaran a Tei Serge Latouche, Maurizio Pallante, Paolo Hendel e Moni Ovadia.

[SOCIETÂT]

Il Friûl al fâs memorie dal so sant patriarcje Beltram. L’epicentri des celebrazions a San Zorç de Richinvelde, là ch’al fo sassinât tal 1350. Il Cumon al propon il spetacul teatrâl di Vanni De Lucia “Chi di spada”, vinars ai 3 di Jugn, a lis 20.30 li dal centri studi. E po, domenie 5, a lis 10, la tradizionâl ceremonie sui prâts de Richinvelde cu la prucission e l’omaç dal façolet. A lis 15, li dal centri studi, la Scuele di musiche Beltram di Aquilee e propon i saçs finâi dai siei scuelârs.

[LIBRIS]

Vinars ai 3 Jugn, a lis 18, l’Associazion culturâl “Ad Undecimum” di Sant Zorç di Noiâr e la “Societât filologjiche furlane”, intant de fieste “Itinerannia”, a organizin la presentazion dal secont volum di toponomastiche dal teritori comunâl “Inta Svuìzis”, par cure di Luîs dal Piçul.

[AMBIENT]

Emilio Rigatti al è il protagonist de convigne dai 3 di Jugn “Ho appeso il volante al chiodo”, a lis 20.30 li de Buteghe dal cumierç just e solidâl di vie Battisti 7, a Udin. E organize la cooperative “Dynamo”.

[AMBIENT]

Te suaze di “Scarpe&cervello” par cure di “Legambiente”, domenie ai 5 di Jugn, si fasarà un’escursion ator pes risultivis de Stele. Si cjatisi a lis 9 a Flambri par un itinerari di 4 oris.